బిల్డింగ్ మీద నుంచి భార్యను తలకిందులుగా వేలాడదీసి,,,,భర్త పైశాచికత్వం

భార్య అంటే టేకెన్ ఫర్ గ్రాంటెడ్‌గా తీసుకునే వారు మన సమాజంలో కోకొల్లలు. కుటుంబ సభ్యుల మీద, బయటి విషయాల్లో కోపం వచ్చినా, ఆఫీసులో చికాకులైనా సరే ఆ కోపన్నంతా భార్య మీద చూపించే ప్రబుద్ధులు చాలా మందే ఉన్నారు. చిన్న చిన్న కారణాలకే భార్యలను చిత్రహింసలు పెట్టి.. రాక్షసంగా హింసించే మూర్ఖులు కూడా లెక్కలేనంత మంది మన చుట్టూనే నిత్యం కనిపిస్తుంటారు.

తాజాగా ఓ భయానక ఘటన వెలుగు చూసింది. భార్య మీద కోపంతో.. ఆమెని బిల్డింగ్ మీద నుంచి తలకిందులుగా వేలాడదీశాడో మూర్ఖశిఖామణి భర్త. సుమారు 5 నిమిషాల పాటు ఆమెను అలానే గాల్లోనే వేలాడదీశాడు. భయంతో ఆమె రక్షించమని కేకలు వేడయంతో ఇరుగుపొరుగు వారు వచ్చి ఆమెను కాపాడారు. ఇందుకు సంబంధించిన వీడియో ప్రస్తుతం నెట్టింట వైరల్‌గా మారింది. ఆ వివరాలు..

ఈ భయానక సంఘటన ఉత్తరప్రదేశ్, బరేలీలో వెలుగు చూసింది. భార్య మీద కోపంతో ఆమెను బిల్డింగ్ మీద నుంచి తలకిందులుగా వేలాడదీశాడో భర్త. ఇందుకు సంబంధించిన వీడియో వైరల్ కావడంతో పోలీసులు బాధితురాలి భర్తతో పాటుగా మరో ముగ్గురు వ్యక్తుల మీద కేసు నమోదు చేశారు. వారు తెలిపిన వివరాల ప్రకారం.. బరేలీకి చెందిన నితీష్ సింగ్ అనే వ్యక్తి తన భార్య డాలీ విషయంలో ఇంత రాక్షసంగా ప్రవర్తించాడు. వారికి 12 ఏళ్ల క్రితం వివాహం అయ్యింది.

వివాహం అయిన నాటి నుంచి దంపతుల మధ్య సరైన సఖ్యత లేదు. నిత్యం గొడవలు పడుతూనే ఉండేవారు. నితీష్ తాగి వచ్చి భార్యను చిత్రహింసలు పెడుతుండేవాడు. సోదరుడు, తల్లి అతడికి సహకరించేవారు. ఇలానే రెండు రోజుల క్రితం భార్యాభర్తల మధ్య మళ్లీ గొడవ మొదలయ్యింది. ఆగ్రహంతో విచక్షణ కోల్పోయిన నితీష్.. భార్య డాలీని బిల్డింగ్ మీద నుంచి తలకిందులుగా వేలాడదీశాడు. ఐదు నిమిషాల పాటు అలానే ఉంచాడు.

భర్త చర్యలతో బిత్తరపోయిన డాలీ.. భయంతో కేకలు వేసింది. కాపాడమని కోరింది. ఆమె అరుపులు విన్న చుట్టుపక్కల వారు పరిగెత్తుకుంటూ వచ్చేసరికి వారికి తలకిందులుగా వేలాడుతున్న డాలీ కనిపించింది. క్షణం ఆలస్యం చేయకుండా.. వెంటనే ఆమె దగ్గరకు వెళ్లి.. క్షేమంగా కిందకు దించారు. డాలీ సోదరుడికి ఈ విషయం తెలియడంతో అతడు పోలీస్ స్టేషన్‌కి వెళ్లి.. నితీష్‌తో పాటు అతడి తల్లి, సోదరుల మీద ఫిర్యాదు చేశాడు. కేసు నమోదు చేసిన పోలీసులు.. నిందితులను అదుపులోకి తీసుకున్నారు. వీడియో చూసిన జనాలు.. ఇదే పైశాచికత్వం రా నాయనా.. నిన్ను కూడా ఓసారి అలానే వేలాడదీస్తే.. నీకు తెలిసేది అని మండిపడుతున్నారు.