బ్రిటన్ మాజీ ప్రధానమంత్రి బోరిస్ జాన్సన్ మరోసారి తండ్రయ్యారు

బ్రిటన్ మాజీ ప్రధానమంత్రి బోరిస్ జాన్సన్ మరోసారి తండ్రయ్యారు. ఆయన వయసు ప్రస్తుతం 60 సంవత్సరాలు కాగా, ఇది ఆయనకు 9వ సంతానం. బోరిస్ జాన్సన్ అర్ధాంగి క్యారీ జాన్సన్ శనివారం ఈ శుభవార్తను ఇన్‌స్టాగ్రామ్ ద్వారా వెల్లడించారు. మే 21వ తేదీన తమకు కుమార్తె జన్మించిందని, చిన్నారికి పాపీ ఎలిజా జోసెఫైన్ జాన్సన్ అని పేరు పెట్టినట్లు ఆమె తెలిపారు. క్యారీ, బోరిస్ దంపతులకు పాపీ నాలుగో సంతానం.ఈ సంతోషకరమైన వార్తను పంచుకుంటూ క్యారీ జాన్సన్ తన ఇన్‌స్టాగ్రామ్‌లో భావోద్వేగపూరితమైన పోస్ట్ చేశారు. "మే 21న జన్మించిన పాపీ ఎలిజా జోసెఫైన్ జాన్సన్‌కు ఈ ప్రపంచంలోకి స్వాగతం. నువ్వు ఇంత అందంగా, చిన్నగా ఉన్నావంటే నమ్మలేకపోతున్నాను. చాలా అదృష్టంగా భావిస్తున్నాను. మేమంతా నీ రాకతో ఉప్పొంగిపోతున్నాం. నువ్వు పుట్టినప్పటి నుంచి ఒక్క నిమిషం కూడా నిద్రపోయానో లేదో తెలియదు, ఎందుకంటే నీ అందాన్ని చూడటం ఆపలేకపోతున్నాను" అని క్యారీ పేర్కొన్నారు.పాపీ తమ గ్యాంగ్‌లో చివరి సభ్యురాలు అని కూడా ఆమె తన పోస్టులో సరదాగా వ్యాఖ్యానించారు. బోరిస్ జాన్సన్-క్యారీ దంపతులకు ఇప్పటికే ముగ్గురు పిల్లలు విల్‌ఫ్రెడ్, రోమీ, ఫ్రాంక్ ఉన్నారు. కరోనా సంక్షోభ సమయంలో, ఏప్రిల్ 2020లో విల్‌ఫ్రెడ్ జన్మించగా, డిసెంబర్ 2021లో రోమీ పుట్టింది. ఆ సమయంలో బోరిస్ జాన్సన్ బ్రిటన్ ప్రధానిగా బాధ్యతలు నిర్వర్తిస్తున్నారు."విల్‌ఫ్రెడ్, రోమీ, ఫ్రాంక్ చాలా సంతోషంగా ఉన్నారు, ముఖ్యంగా రోమీకి చెల్లెలు కావాలని ఎంతో ఆశపడింది. ఇక మ్యాచింగ్ డ్రెస్సులు వేయించడమే తరువాయి. మా గ్యాంగ్‌లో చివరి సభ్యురాలు" అని క్యారీ రాశారు. "ఇప్పుడే ఆసుపత్రి నుంచి ఇంటికి వచ్చాం. నా ఒడిలో నిద్రపోతున్న చిన్నారితో కాక్‌టెయిల్స్, పిజ్జా సమయం. ఇంతకంటే జీవితంలో ఆనందం ఏముంటుంది" అంటూ తన సంతోషాన్ని పంచుకున్నారు.బోరిస్ జాన్సన్‌కు తన మాజీ భార్య మెరీనా వీలర్‌తో లారా లెట్టిస్, మిలో ఆర్థర్, కాసియా పీచెస్, థియోడర్ అపోలో అనే నలుగురు పిల్లలు ఉన్నారు. అలాగే, హెలెన్ మెకింటైర్‌తో స్టెఫానీ అనే మరో కుమార్తె కూడా ఉంది. ఇప్పుడు పాపీ రాకతో ఆయన తొమ్మిది మంది పిల్లలకు తండ్రి అయ్యారు