థియేటర్లలో ఆహార పదార్థాలు, కూల్ డ్రింక్స్ వ్యాపారంపై ,,, విచారణకు డిప్యూటీ సీఎం ఆదేశం

రాష్ట్రంలో సినిమా హాళ్ల నిర్వహణపై ఏపీ డిప్యూటీ సీఎం పవన్ కళ్యాణ్ కీలక ప్రకటన చేశారు. సినిమా హాళ్ల నిర్వహణను పకడ్బందీగా చేపట్టాలని స్పష్టం చేశారు. సినిమా హాళ్లల్లో ప్రేక్షకులకు మెరుగైన సేవలు అందించాలని, ఆ దిశగా సంబంధిత ప్రభుత్వ శాఖలు ఎప్పటికప్పుడు పర్యవేక్షణ చేయాలని డిప్యూటీ సీఎం పవన్ కళ్యాణ్ స్పష్టం చేశారు. ఇక కొత్త చిత్రాలు విడుదల సమయంలో టికెట్ ధరల పెంపు కోసం నిర్మాతలు, వారికి సంబంధించినవారు వ్యక్తిగత హోదాలో కాకుండా.. తెలుగు చలన చిత్ర వాణిజ్య మండలి ద్వారానే ప్రభుత్వాన్ని సంప్రందించాలని పవన్ కళ్యాణ్ స్పష్టం చేశారు. ఆ విధానాన్ని అమలు చేయాలని పవన్ కళ్యాణ్ దిశానిర్దేశం చేశారు.

సినిమాలు హాళ్ల బంద్ ప్రకటనల నేపథ్యంలో సినిమాటోగ్రఫీశాఖ మంత్రి కందుల దుర్గేష్.. తన శాఖ ద్వారా చేపట్టిన చర్యలను, తాజా పరిణామాలను పవన్ కళ్యాణ్‌కు వివరించారు. ఈ సందర్భంగా పవన్ కళ్యాణ్ పలు కీలక సూచనలు చేశారు. టికెట్ ధరల పెంపు, సినిమా హాళ్ల నిర్వహణ సహా సినిమాలకు సంబంధించి ఏ విషయంలోనైనా ప్రభుత్వ శాఖలు తమ విధులను, పర్యవేక్షణను పకడ్బందీగా నిర్వహించాలని పవన్ కళ్యాణ్ ఆదేశించారు. త్వరలో విడుదలయ్యే హరిహర వీరమల్లు సినిమాకు కూడా టికెట్ ధరల పెంపు కోసం నిర్మాత వ్యక్తిగతంగా కాకుండా చలనచిత్ర వాణిజ్య మండలి ద్వారానే ఏపీ ప్రభుత్వానికి అర్జీ ఇవ్వాలని, ఆ విధంగానే సంప్రదింపులు చేయాలని స్పష్టం చేశారు. ఇందులో తనమన బేధాలకు తావులేదని పవన్ కళ్యాణ్ స్పష్టం చేశారు.

సినిమా టికెట్ ధరల కంటే సినిమా థియేటర్లలో పాప్ కార్న్, కూల్ డ్రింక్స్, మంచి నీళ్ల సీసాల ధరలు ఎక్కువగా ఉన్నాయనే విషయాన్ని పవన్ కళ్యాణ్ చర్చించారు. ఈ నేపథ్యంలో థియేటర్లలో తినుబండారాల ధరలు, విక్రయాలు, నాణ్యతా ప్రమాణాలపై అధికారులు పర్యవేక్షణ జరిపి.. నియంత్రణ చేపట్టాలని పవన్ కళ్యాణ్ ఆదేశించారు. అలాగే మల్టీప్లెక్సులు, సింగిల్ స్క్రీన్ థియేటర్లలో ఆహార పదార్థాలు, కూల్ డ్రింక్స్ వ్యాపారంలో గుత్తాధిపత్యం సాగుతోందనే విషయంపై విచారణ చేపట్టాలని సినిమాటోగ్రఫీ శాఖ మంత్రి కందుల దుర్గేష్‌కి సూచించారు.

ప్రేక్షకులు కుటుంబాలతో సినిమా హాళ్లకు రావాలంటే తినుబండారాలు, పానీయాల ధరలు చూసి వెనుకంజ వేసే పరిస్థితి రాకూడదని అభిప్రాయపడ్డారు. ఇలాంటి వాటి ధరలు తగ్గితే థియేటర్లకు వచ్చే ప్రేక్షకుల సంఖ్య కూడా పెరుగుతుందన్న పవన్ కళ్యాణ్.. తద్వారా పన్ను ఆదాయం కూడా పెరుగుతుందని అభిప్రాయపడ్డారు. ఈ అంశంపై పన్నుల శాఖతో పరిశీలన చేయించాలని.. థియేటర్లలో తాగునీటి ఏర్పాటు, పారిశుధ్య నిర్వహణ పాటించేలా స్థానిక సంస్థలు చూసుకోవాలని పవన్ కళ్యాణ్ ఆదేశించారు.