మహానాడు ఒక గ్రాండ్ తెలుగు సెలబ్రేషన్ అని లోకేశ్ అభివర్ణన
Andhra Pradesh Telugu | Suryaa Desk | Published : Tue, May 27, 2025, 07:17 PM
తెలుగుదేశం పార్టీ యువనేత, మంత్రి నారా లోకేశ్ మహానాడుకు సంబంధించిన ఒక గ్లింప్స్ వీడియోను సోషల్ మీడియా వేదికగా పోస్ట్ చేశారు. ఈ వీడియో ద్వారా మహానాడు ఉత్సాహాన్ని, ప్రాధాన్యతను ప్రజలతో పంచుకునే ప్రయత్నం చేశారు. ఇందులో మహానాడు తొలి రోజు విశేషాలను పంచుకున్నారు. మహానాడు కేవలం ఒక కార్యక్రమం కాదని, అదొక వైబ్రేషన్ అని, గ్రాండ్ తెలుగు సెలబ్రేషన్ అని అభివర్ణించారు. అంతకుముందు, మహానాడులో మాట్లాడుతూ కుల, మత, ప్రాంతాలకు అతీతంగా తెలుగువారంతా ప్రపంచంలో ప్రథమ స్థానంలో నిలవాలని, అన్ని రంగాల్లో మన తెలుగువారే అగ్రగామిగా ఉండాలన్నదే తమ అజెండా అని లోకేశ్ స్పష్టం చేశారు. ఈ దిశగా అందరూ కలిసి పనిచేయాలని పిలుపునిచ్చారు. తెలుగుదేశం పార్టీలో యువతకు పెద్దపీట వేయబోతున్నట్లు నారా లోకేశ్ ప్రకటించారు. పార్టీలో సీనియర్లను గౌరవిస్తూనే, జూనియర్లను కూడా ఆదరిస్తామని, నిబద్ధతతో పనిచేసే ప్రతి ఒక్కరినీ ప్రోత్సహిస్తామని హామీ ఇచ్చారు. మన రాష్ట్రంలో బలమైన యువశక్తి ఉందని, వారికి సరైన అవకాశాలు కల్పిస్తే అద్భుతాలు సాధిస్తారని లోకేశ్ విశ్వాసం వ్యక్తం చేశారు. యువతకు అన్ని రంగాల్లో ఉద్యోగ, ఉపాధి అవకాశాలు కల్పించడమే 'యువగళం' ప్రధాన లక్ష్యమని ఆయన పునరుద్ఘాటించారు.
|
|