తెరపైకి ట్రంప్ తాత బర్త్ సర్టిఫికేట్

 అగ్రరాజ్యం అమెరికా అధ్యక్షుడి తాత జనన ధ్రువీకరణ పత్రం ప్రస్తుతం నెట్టింట వైరల్‌గా మారింది. ఇప్పటి వరకు ఆయన తాత ఎవరో కూడా తెలియని నెటిజన్లకు.. దీని వల్ల ఆయన పుట్టుపూర్వొత్తరాలన్నీ తెలుస్తున్నాయి. అయితే ఇందుకు ప్రధాన కారణం జర్మనీ ఛాన్సలర్ ఫ్రెడ్రిక్ మెర్జే. ఎందుకంటే ఆయనే ట్రంప్ తాత బర్త్ సర్టిఫికేట్‌ను వెలుగులోకి తీసుకు వచ్చారు. ముఖ్యంగా అమెరికా పర్యటన కోసం వెళ్లిన ఆయన ఓవల్ ఆఫీసులో ట్రంప్‌ను కలిశారు. ఈ సందర్భంగానే అమెరికా అధ్యక్షుడికి ఆయన తాత జనన ధ్రువీకరణ పత్రాన్ని బహుమతిగా అందజేశారు.

అమెరికా అధ్యక్షుడు డొనాల్డ్ ట్రంప్‌నకు జర్మనీ ఛాన్సలర్ ఫ్రెడ్రిచ్ మెర్జ్ అందించిన ఒక ప్రత్యేక బహుమతి ప్రస్తుతం అంతర్జాతీయంగా చర్చనీయాంశం అయింది. ఇంతలా అందరినీ ఆకర్షిస్తున్న ఆ బహుమతి మరేంటో కాదు ట్రంప్ తాత జనన ధ్రువీకరమ పత్రం. ట్రంప్ తాత పేరు కూడా ఫెడ్రికే. అయితే ఈ బర్త్ సర్టిఫికేట్ ట్రంప్ చేతికి అందిస్తూ.. మీ కుటుంబ మూలాలు జర్మనీలోనే ఉన్నాయని గుర్తు చేశారు. ఈ బహుమతి మీ కుటుంబ వారసత్వానికి గుర్తుగా అంటూ జనన ధ్రువీకరణ పత్రాన్ని అందజేశారు. డొనాల్డ్ ట్రంప్ తాత ఫెడ్రిక్ ట్రంప్ 1869 మార్చి 14వ తేదీన జర్మనీలోని కల్‌స్టాడ్ వద్ద జన్మించారు. మొదట్లో అక్కడే చదువుకున్నారు కూడా.

కానీ యవ్వనంలోకి వచ్చాకా అంటే 1885లో.. అమెరికాకు వలస వెళ్లి రియల్ ఎస్టేట్ వ్యాపారం చేయడం ప్రారంభించారు. అద్భుతమైన విజయాలను అందుకుంటూ అతి తక్కువ కాలంలోనే కోటీశ్వరుడిగా మారారు. అయితే 1918లో ఫ్లూ మహమ్మారి వ్యాపించిన వేళ.. ఫెడ్రిక్ న్యూయార్క్ క్వీన్స్‌లో మరణించారు. ఈ నేపథ్యాన్ని గుర్తు చేస్తూ.. ఛాన్సలర్ మెర్జ్ ఇచ్చిన ఈ బహుమతిని భావోద్వేగంగా స్వీకరించినట్టు ట్రంప్ కుటుంబ వర్గాలు వెల్లడించాయి. ప్రస్తుతం ఇందుకు సంబంధించిన వీడియో, బర్త్ సర్టిఫికేట్ సామాజిక మాధ్యమాల్లో వైరల్‌గా మారింది. పలువురు నెటిజన్లు దీనిని జర్మనీ–అమెరికా సంబంధాల బలాన్ని సూచించేదిగా భావిస్తున్నారు.

ఇదిలా ఉండగా.. మెర్జ్ ఆ తర్వాత ట్రంప్‌తో సమావేశం అయ్యారు. శ్వేత సౌధంలోనే కూర్చుని ఉక్రెయిన్ యద్ధం, వాణిజ్యం, బలగాలు వంటి అంశాల గురించి మాట్లాడుకున్నారు. సమావేశం పూర్తైన తర్వాత ట్రంప్ మాట్లాడుతూ.. మెర్జ్ ఓ మంచి జర్మనీ ప్రతినిధి అని చెప్పారు. ఆమెరికా దళాలు జర్మనీలోనే కొనసాగుతాయని చెప్పారు. ఇక రక్షణ రంగానికి బెర్లిన్ కేటాయింపులు పెంచడాన్ని కూడా స్వాగతించారు.