నిద్రమాత్రలు తీసుకోవాలనుకున్నా: ఎయిడెన్‌ మార్‌క్రమ్‌

ప్రపంచ టెస్టు ఛాంపియన్ షిప్ 2025 ఫైనల్‌లో ఆస్ట్రేలియాను ఓడించిన దక్షిణాఫ్రికా టెస్టు ఛాంపియన్‌గా అవతరించింది. సుదీర్ఘ నిరీక్షణకు తెరదించుతూ.. 27 ఏళ్ల తర్వాత ఐసీసీ టైటిల్ సాధించింది. రెండో ఇన్నింగ్స్‌లో ఆ జట్టు ముందు ఆస్ట్రేలియా 282 పరుగుల లక్ష్యాన్ని నిలిపింది. ఈ సమయంలో ఆస్ట్రేలియాదే గెలుపు అని చాలా మంది అంచనా వేశారు. కానీ అద్భుతంగా రాణించిన దక్షిణాఫ్రికా బ్యాటర్లు.. విజయాన్ని అందుకున్నారు. ఇందులో ముఖ్యంగా ఆ జట్టు ఓపెనర్ ఎయిడెన్ మార్‌క్రమ్‌ సెంచరీతో జట్టును గెలిపించాడు.

గతంలో చాలా సార్లు దక్షిణాఫ్రికా ఐసీసీ నాకౌట్ మ్యాచ్‌లలో ఓడిపోయింది. కొన్ని సార్లు ఈజీగా గెలిచే స్థానం నుంచి అనూహ్యంగా తడబడి.. ఒత్తిడికి చిత్తయి పరాజయం పాలైంది. గతేడాది భారత్‌తో జరిగిన టీ20 ప్రపంచకప్ 2024 ఫైనల్‌లోనూ ఇదే పునరావృతం చేసింది. కానీ ఈసారి మాత్రం ప్రొటీస్ టీమ్ పట్టువదల్లేదు. అందుకు ప్రధాన కారణం మార్‌క్రమ్. ఫైనల్ మ్యాచ్ తర్వాత మాట్లాడిన మార్‌క్రమ్.. టీ20 ప్రపంచకప్‌ 2024 ఫైనల్‌లో భారత్ చేతిలో ఓటమి తనను ఎంతో బాధించిందని చెప్పాడు. మళ్లీ అలాంటి పరిస్థితి రాకూడదనే లక్ష్యంగా ఆడినట్లు పేర్కొన్నాడు. ఆ ఆలోచనే తనలో స్ఫూర్తి నింపిందని వివరించాడు.

“ప్రపంచ టెస్టు ఛాంపియన్ షిప్ ఫైనల్‌ మ్యాచ్‌ సందర్భంగా.. గత టీ20 ప్రపంచకప్‌ 2024 ఫైనల్‌లో ఓటమి గురించి నేను చాలా ఆలోచించా. భారత్‌తో జరిగిన ఆ మ్యాచ్‌లో ఔట్ అయ్యాక నేను ఒంటరిగా కూర్చుని ఎంతో నిరాశకు గురయ్యాను. మరోసారి అలాంటి పరిస్థితి రాకూదని అప్పుడే నిర్ణయించుకున్నాను. ఆ ఆలోచనే నాలో స్ఫూర్తినింపింది. అందుకే డబ్ల్యూటీసీ ఫైనల్‌లో ఎక్కువ సేపు క్రీజులో ఉండగలిగా” అని మార్‌క్రమ్ అన్నాడు.

“ఫైనల్‌లో సెంచరీ కొట్టాక నేను చాలా భావేద్వేగానికి లోనయ్యా. జట్టు విజయం కోసం పోరాడుతున్నందుకు ఏడుపు కూడా వచ్చింది. ముఖ్యంగా మూడో రోజు ఆట ముగిశాక.. ఆ రోజు రాత్రి నాకు అస్సలు నిద్రపట్టలేదు. మా విజయానికి ఇంకా 69 పరుగులు అవసరమైన దశ అది. నిద్ర కోసం ఓ దశలో నిద్ర మాత్రలు తీసుకోవడానికి కూడా ప్రయత్నించా. నా మనసు నిండా ఏవేవో ఆలోచనలు తిరిగాయి. కానీ చివరి రోజు మేం అనుకున్న విజయం సాధించాం” అని చెబుతూ మార్‌క్రమ్ భావోద్వేగానికి గురయ్యాడు.