వడ్డీ రేట్లు తగ్గించిన ఎస్‌బీఐ .. ఇప్పుడు రూ.30 లక్షల హోమ్ లోన్‌కు.. ఈఎంఐ ఎంత కట్టాలి

అతిపెద్ద ప్రభుత్వ బ్యాంక్ అయిన స్టేట్ బ్యాంక్ ఆఫ్ ఇండియా రుణాల వడ్డీ రేట్లను తగ్గిస్తున్నట్లు ప్రకటించి శుభవార్త చెప్పింది. రిజర్వ్ బ్యాంక్ ఆఫ్ ఇండియా (RBI) రెపో రేటును ఇటీవలే 50 బేసిస్ పాయింట్లు తగ్గించగా అదే దారిలో ఎస్‌బీఐ తమ కస్టమర్లకు ఊరట కల్పించింది. ఎస్‌బీఐ తన EBLR (ఎక్స్‌టర్నల్ బెంచ్‌మార్క్ బేస్డ్ లెండింగ్ రేటు), రెపో లింక్డ్ లెండింగ్ రేటు (RLLR ) 50 బేసిస్ పాయింట్ల తగ్గించి గుడ్‌న్యూస్ చెప్పింది. సవరించిన కొత్త వడ్డీ రేట్లు జూన్ 15, 2025 నుంచి అమలు చేస్తున్నట్లు అధికారిక వెబ్‌సైట్లో తెలిపింది. దీంతో ఆయా లెండింగ్ రేట్లకు లింకైన పర్సనల్, హోమ్ లోన్ వడ్డీ రేట్లు ఒక్కసారిగా దిగివస్తాయి.

ఎస్‌బీఐ బ్యాంక్ ప్రస్తుతం ఈబీఎల్ఆర్ రేటును 8.65 శాతం నుంచి 8.15 శాతానికి తగ్గించింది. అలాగే ఆర్ఎల్ఎల్ఆర్ రేటు 8.25 శాతం నుంచి 7.75 శాతానికి తగ్గించింది. ఈ ప్రకటనతో గృహ రుణాలు, వాహన, వ్యక్తిగత రుణాలపై వడ్డీ భారం తగ్గనుంది. నెలవారీగా చెల్లించే ఈఎంఐ తగ్గుతుంది. ఫ్లోటింగ్ రేట్ వడ్డీతో లోన్ ఎంచుకున్న వారికి ఈ బెనిఫిట్ వర్తిస్తుంది. హోమ్ లోన్స్ ఎక్స్‌టర్నల్ బెంచ్‌మార్క్ రేటు (EBR)కు లింకై ఉంటాయి. ప్రస్తుతం ఈబీఎల్ఆర్ రేటు 7.75 శాతానికి తగ్గింది. దీనిపైన వడ్డీ రేట్లు నిర్ణయిస్తారు. క్రెడిట్ స్కోర్, రుణ చెల్లింపు సామర్థ్యం వంటి అంశాల ఆధారంగా వడ్డీ రేట్లు నిర్ణయిస్తారు. మంచి క్రెడిట్ స్కోర్ ఉంటే తక్కువ వడ్డీతో రుణాలు మంజూరు చేస్తారు.

రూ.30 లక్షలు హోమ్ లోన్‌పై ఈఎంఐ ఎంత?

ఎస్‌బీఐలో హోమ్ లోన్లకు ఈబీఎల్ఆర్ లింక్ అయి ఉంటుంది. ఎస్‌బీఐ అధికారిక వెబ్‌సైట్ ప్రకారం.. హోమ్ లోన్ వడ్డీ రేట్లు 7.50 శాతం నుంచి 8.45 శాతం మధ్య ఉన్నాయి. మంచి క్రెడిట్ స్కోర్ ఉంటే తక్కువ వడ్డీకే రుణం పొందవచ్చు. మీరు రూ.30 లక్షల హోమ్ లోన్ తీసుకున్నారు అనుకుందాం. మంచి క్రెడిట్ స్కోర్ ఉండి 8.15 శాతం వడ్డీకే రుణం ఇచ్చారు అనుకుంటే 10 సంవత్సరాల టెన్యూర్ పై నెలవారీ ఈఎంఐ రూ.36,700 వరకు పడుతుంది. ఎస్‌బీఐ ఆన్‌లైన్ కాలిక్యులేటర్ ద్వారా మీ ఈఎంఐ తెలుసుకోవచ్చు. మీ వడ్డీ రేటు 7.50 శాతంగానే ఉందని అనుకుందాం అప్పుడు నెలవారీ ఈఎంఐ.. రూ.25,600 వరకు ఉంటుంది.

అదే మీరు 15 సంవత్సరాల టెన్యూర్ పెట్టుకుంటే 8.15 శాతం వడ్డీతో ఈఎంఐ రూ.29,000 అవుతుంది. అంటే ఈఎంఐ వడ్డీ రేటుతో పాటు ఎంచుకునే టెన్యూర్‌పై ఆధారపడుతుందని అర్థం చేసుకోవాలి. ఎక్కువ టెన్యూర్ ఎంచుకుంటే ఈఎంఐ తగ్గుంతుంది. వడ్డీ రేటు నిర్ణయించేందుకు బ్యాంకులు మీ లోన్ అమౌంట్, టెన్యూర్, క్రెడిట్ స్కోర్ వంటి వివరాలను పరిగణనలోకి తీసుకుంటాయి.