విడాకులు తీసుకోకుండానే నటితో బీజేపీ నేత రెండో పెళ్లి.., షాకిచ్చిన పార్టీ

ఉత్తరాఖండ్ మాజీ ఎమ్మెల్యే సురేష్ రాథోడ్ తీరు ఇప్పుడు తీవ్ర వివాదాస్పదంగా మారింది. బీజేపీ నేత అయిన సురేష్ రాథోడ్ విడాకులు తీసుకోకుండానే నటి ఉర్మిళా సనావర్‌ను రెండో పెళ్లి చేసుకోవడం తీవ్ర దుమారం రేపుతోంది. అయితే ఉత్తరాఖండ్‌లో యూనిఫామ్ సివిల్ కోడ్ (యూసీసీ) అమల్లోకి వచ్చిన తర్వాత ఈ ఘటన చోటు చేసుకున్నట్లు ప్రతిపక్షాలు ఆరోపిస్తున్నాయి. కానీ వారు మాత్రం.. తమ పెళ్లి యూసీసీ అమల్లోకి రాకముందే జరిగినట్లు పేర్కొనడం తీవ్ర చర్చనీయాంశంగా మారింది. అక్కడ అధికార పార్టీగా ఉన్న బీజేపీపై ప్రతిపక్ష కాంగ్రెస్ తీవ్ర విమర్శలు చేస్తుండగా.. ఆ మాజీ ఎమ్మెల్యేపై పార్టీ సీరియస్ అయింది. ఉత్తరాఖండ్ బీజేపీ అధ్యక్షుడు మహేంద్ర భట్ ఆదేశాలతో ఉత్తరాఖండ్ రాష్ట్ర బీజేపీ ప్రధాన కార్యదర్శి రాజేంద్ర బిష్త్ సురేష్ రాథోడ్‌కు షోకాజ్ నోటీసులు జారీ చేశారు. దీనిపై 7 రోజుల్లోగా సమాధానం చెప్పాలని ఆదేశించారు.

జ్వాలాపూర్ మాజీ ఎమ్మెల్యే అయిన సురేష్ రాథోడో.. సహారన్‌పూర్ నటి ఊర్మిళ సనవార్‌తో తన పెళ్లి సంబంధాన్ని బహిరంగంగా అంగీకరించడంతో ఈ వివాదం బయటికి వచ్చింది. ఈనెల 15వ తేదీన సహారన్‌పూర్‌లో జరిగిన మీడియా సమావేశంలో సురేష్ రాథోడ్.. తన భార్య ఊర్మిళ సనవార్‌ అని పరిచయం చేశారు. ఈ ప్రకటన ఉత్తరాఖండ్ రాజకీయాల్లో పెను ప్రకంపనలు సృష్టించింది. కాంగ్రెస్ సహా పలు ప్రతిపక్ష పార్టీలు యూసీసీపై బీజేపీ రెండు నాల్కల ధోరణి అవలంభిస్తోందని ఆరోపించాయి. బహుభార్యత్వాన్ని నిషేధించి, వివాహాల రిజిస్ట్రేషన్‌ను తప్పనిసరి చేస్తూ ఇప్పటికే ఉత్తరాఖండ్‌లోని బీజేపీ ప్రభుత్వం యూసీసీని అమల్లోకి తీసుకువచ్చిన సంగతి తెలిసిందే.

మరోవైపు.. సురేష్ రాథోడ్‌కు ఇప్పటికే పెళ్లి కాగా.. ఆయన తన మొదటి భార్య నుంచి విడాకులు తీసుకున్నట్లు బహిరంగంగా ఎక్కడా ధృవీకరించలేదు. అయితే వీరిద్దరి వివాహంపై ఊర్మిళా సనవార్ సోషల్ మీడియా వేదికగా స్పష్టతనిచ్చారు. తాము ఇద్దరం 2022 అక్టోబర్ 4వ తేదీన నేపాల్‌లోని పశుపతినాథ్ ఆలయంలో హిందూ సంప్రదాయాల ప్రకారం పెళ్లి చేసుకున్నట్లు తేల్చి చెప్పారు. తమ పెళ్లి పరస్పర అంగీకారంతో జరిగిందని వివరించారు.

మరోవైపు.. ఈ పెళ్లి యూసీసీని ఉల్లంఘించి చేసుకున్నారని వస్తున్న ఆరోపణలను కూడా ఊర్మిళా సనవార్ ఖండించారు. ఉత్తరాఖండ్‌లో యూసీసీ అమల్లోకి (2025 జనవరి)రాకముందే తమ పెళ్లి జరిగిందని స్పష్టం చేశారు. కావాలనే కొందరు తప్పుడు సమాచారం వ్యాప్తి చేస్తున్నారని.. ఈ ఏడాది జూన్ నెలలో తాము పెళ్లి చేసుకున్నట్లు తప్పుడు ప్రచారం చేస్తున్నారని మండిపడ్డారు. దీనికి సంబంధించి ఆమె బీజేపీ రాష్ట్ర అధ్యక్షుడు మహేంద్ర భట్‌కు రాసిన లేఖలో తెలిపారు.

మరోవైపు.. బీజేపీ సీనియర్ నేత, రవిదాస్ అఖారా మాజీ అధిపతి అయిన సురేష్ రాథోడ్ మాత్రం తన వైఖరిని మార్చుకోలేదు. తన వివాహం చట్టబద్ధమైందని, ఆధ్యాత్మికమైందని.. తాను పార్టీకి, సనాతన ధర్మానికి సేవ చేస్తూనే ఉంటానని స్పష్టం చేశారు. తాను 44 ఏళ్లకు పైగా బీజేపీ కోసం పనిచేశానని.. ఇక ముందు కూడా దాన్ని కొనసాగిస్తానని తేల్చి చెప్పారు. అయితే సురేష్ రాథోడ్ పెళ్లి విషయంపై కాంగ్రెస్ పార్టీ తీవ్ర విమర్శలు గుప్పించింది. యూసీసీ చట్టాన్ని ఉల్లంఘించిన సురేష్ రాథోడ్‌పై కఠిన చర్యలు తీసుకోవాలని డిమాండ్ చేసింది.