రెండో టెస్టులోకి బుమ్రా వైల్డ్ కార్డ్ ఎంట్రీ

వర్క్‌లోడ్ మేనేజ్‌మెంట్ దృష్ట్యా భారత స్టార్ పేసర్ జస్‌ప్రీత్ బుమ్రా ఇంగ్లాండ్‌తో రెండో టెస్టుకు దూరం కానున్నాడని జోరుగా ప్రచారం జరుగుతోంది. ఈ విషయంపై సిరీస్ ప్రారంభానికి ముందే టీమ్‌ మేనేజ్‌మెంట్ కూడా స్పష్టతనిచ్చింది. బుమ్రా కూడా తాను ఈ సిరీస్‌లో కేవలం మూడు మ్యాచ్‌లు మాత్రమే ఆడతానని.. అందుకే కెప్టెన్సీ ఆఫర్‌ను తిరస్కరించానని చెప్పాడు. అయితే తొలి టెస్టులో ఇంగ్లాండ్ చేతిలో భారత్ ఓడిపోయింది. ఈ నేపథ్యంలో రెండో టెస్టులో ఆడే అంశంపై బుమ్రా పునరాలోచనలో పడినట్లు తెలుస్తోంది.

రెండో టెస్టుకు ముందు బుమ్రా.. మిగతా బౌలర్లతో కలిసి జోరుగా సాధన చేస్తున్నాడు. మిగతా బౌలర్లకు ఏమాత్రం తగ్గకుండా బంతులు సంధిస్తున్నాడు. ఇక రెండో టెస్టు ప్రారంభానికి ముందు మాట్లాడిన టీమిండియా అసిస్టెంట్ కోచ్‌ ర్యాన్ టెన్ డస్కాటే .. బుమ్రా గురించి కీలక అప్‌డేట్ ఇచ్చాడు. బుమ్రా రెండో టెస్టు సెలక్షన్‌కు అందుబాటులో ఉంటాడని స్పష్టం చేశాడు. అయితే అతడు తుది జట్టులో ఉంటాడా? లేడా అన్నది పిచ్ పరిస్థితిని.. అప్పటి వాతావరణాన్ని బట్టి డిసైడ్ అవుతామని పేర్కొన్నాడు. ప్రస్తుతం బుమ్రా.. ఎలాంటి ఇబ్బంది లేకుండా ప్రాక్టీస్‌లో పాల్గొంటున్నాడని తెలిపాడు.

జులై 2 నుంచి ప్రారంభం కానున్న రెండో టెస్టులో ఆడేందుకు బుమ్రా సిద్ధంగా ఉన్నాడని.. కానీ వర్క్‌లోడ్ మేనేజ్‌మెంట్ అంశాలను పరిగణలోకి తీసుకుని.. అతడిపై నిర్ణయం తీసుకుంటామన్నాడు. దాన్ని బట్టే భారత తుది జట్టు ఎంపిక ఉంటుందని చెప్పాడు.

ఒకవేళ బుమ్రా ఆడకపోతే అర్షదీప్ సింగ్.. టెస్టుల్లో డెబ్యూ చేసే అవకాశం ఉంది. శార్దుల్ ఠాకూర్ ప్లేసులో నితీశ్ కుమార్ రెడ్డి కూడా తుది జట్టులోకి రావొచ్చని విశ్లేషకులు అభిప్రాయపడుతున్నారు. అనూహ్యంగా కుల్‌దీప్ యాదవ్‌కు కూడా చోటు దక్కొచ్చని.. ఏది ఏమైనా మ్యాచ్‌ రోజు ఉదయం పిచ్ పరిస్థితిని బట్టే తుది జట్టు ఎంపిక ఉండనుందని తెలుస్తోంది. మరోవైపు ఇంగ్లాండ్.. రెండో టెస్టు కోసం తమ తుది జట్టును ప్రకటించింది. ఇటీవల కౌంటీల్లో ఆడి టెస్టు జట్టులోకి వచ్చిన పేసర్ జోఫ్రా ఆర్చర్‌కు తుది జట్టులో చోటు కల్పించకపోవడం గమనార్హం.