టైప్-2 డయాబెటిస్‌పై ఐఐటీ బాంబే కీలక అధ్యయనం

టైప్-2 డయాబెటిస్ వ్యాధికి సంబంధించి ముంబయి ఐఐటీ పరిశోధకులు ఒక కీలక విషయాన్ని కనుగొన్నారు. మానవ శరీరంలో అత్యంత సాధారణంగా ఉండే కొల్లాజెన్ అనే ప్రొటీన్, మధుమేహానికి దారితీస్తుందని వారి అధ్యయనంలో స్పష్టమైంది. ఈ ప్రొటీన్ కారణంగా క్లోమగ్రంథి దెబ్బతిని, రక్తంలో చక్కెర స్థాయిలు పెరిగిపోతున్నాయని పరిశోధనలో వెల్లడైంది.సాధారణంగా క్లోమగ్రంథి ఇన్సులిన్‌తో పాటు అమైలిన్ అనే మరో హార్మోన్‌ను కూడా ఉత్పత్తి చేస్తుంది. భోజనం తర్వాత రక్తంలో చక్కెర స్థాయిలు అమాంతం పెరగకుండా ఈ హార్మోన్ నియంత్రిస్తుంది. అయితే, శరీరంలోని కొల్లాజెన్-1 అనే ప్రొటీన్ ఈ అమైలిన్ హార్మోన్‌తో కలవడం వల్ల అది గడ్డకట్టి విషపూరితంగా మారుతోందని పరిశోధకులు గుర్తించారు. ఈ ప్రక్రియనే శాస్త్రీయంగా 'అమైలిన్ యాగ్రిగేషన్' అని పిలుస్తారు.విషపూరితంగా మారిన ఈ అమైలిన్, ఇన్సులిన్‌ను ఉత్పత్తి చేసే క్లోమగ్రంథిలోని కీలకమైన బీటా కణాలను నాశనం చేస్తుంది. దీని ఫలితంగా, శరీరం త‌గినంత ఇన్సులిన్‌ను ఉత్పత్తి చేయలేకపోతుంది లేదా కణాలు ఇన్సులిన్‌కు సరిగ్గా స్పందించవు. దీంతో రక్తంలో చక్కెరను నియంత్రించే సహజ సామర్థ్యాన్ని శరీరం కోల్పోయి, టైప్-2 డయాబెటిస్ బారిన పడుతుందని అధ్యయనం తేల్చి చెప్పింది.ఈ పరిశోధన ఫలితాల నేపథ్యంలో కొల్లాజెన్, అమైలిన్‌ల మధ్య సంబంధాన్ని మరింత లోతుగా అర్థం చేసుకునేందుకు పరిశోధకులు ప్రయత్నిస్తున్నారు. దీని కోసం 'క్రయో ఎలక్ట్రాన్ మైక్రోస్కోపీ' అనే అత్యాధునిక సాంకేతికతను అభివృద్ధి చేస్తున్నారు. ఈ అధ్యయనం ద్వారా భవిష్యత్తులో టైప్-2 డయాబెటిస్‌ను సమర్థంగా నియంత్రించేందుకు సరికొత్త ఔషధాలను కనుగొనేందుకు మార్గం సుగమం అవుతుందని వారు ఆశాభావం వ్యక్తం చేశారు.