ఉదయం పెళ్లి.. సాయంత్రం రిసెప్షన్.. మధ్యాహ్నం లవర్‌తో నవ వధువు జంప్

ఈమధ్య కాలంలో పెళ్లి ళ్లు భయంకరమైన దారుణాలకు వేదికలుగా మారుతున్నాయి. ప్రేమించిన వాడితో కలిసి ఉండటం కోసం కట్టుకున్న భర్తను అత్యంత దారుణంగా హత్య చేస్తున్నారు కొందరు మహిళలు. అది కూడా వివాహమైన కొద్ది రోజులకే. ఇంట్లో వాళ్ల బలవంతం మీద నచ్చని వ్యక్తిని పెళ్లి చేసుకుంటున్న మహిళలు.. ఆ తర్వాత లవర్‌తో కలిసి ఉండేందుకు హత్యలు వంటి దారుణాలకు కూడా తెగిస్తున్నారు.

మొన్న మేఘాలయ హనీమూన్ కేసు, తెలంగాణలో సర్వేయర్ తేజేశ్వర్ హత్య కేసు ఈ కోవకు చెందినవే. వీటిని మరిచిపోకముందే.. రెండు రోజుల క్రితం బిహార్‌లో మరో దారుణం వెలుగు చూసింది. 55 ఏళ్ల మామ కోసం పెళ్లైన 45 రోజులకే భర్తను హత్య చేయించిందో నవ వధువు . దీంతో చాలా మంది పెళ్లంటేనే భయపడుతున్నారు. ఈ క్రమంలో తాజాగా ఓ చోట వింత సంఘటన వెలుగు చూసింది. పెళ్లైన రోజే లవర్‌తో వెళ్లి పోయింది నవ వధువు. ఆ వివరాలు..

చెన్నైలో ఈ సంఘటన వెలుగు చూసింది. పెళ్ళైన రోజు మధ్యాహ్నమే ఒక కొత్త పెళ్ళికూతురు తన ప్రియుడితో కలిసి పారిపోయింది. మాధవరం బర్మా కాలనీకి చెందిన విజయకుమార్ అనే వ్యక్తికి, పెరంబూరులోని అంబేద్కర్ నగర్‌కు చెందిన అర్చనలకు శుక్రవారం బెసెంట్ నగర్ చర్చిలో ఉదయం ఆరు గంటలకు వివాహం జరిగింది.

పెళ్ళి జరిగిన రోజు సాయంత్రం రిసెప్షన్ ఉంది. దీంతో అర్చన బ్యూటీ పార్లర్‌కి వెళ్తున్నానని చెప్పి బయటకు వెళ్లింది. అటునుంచి ఆమె తన ప్రియుడి దగ్గరకు వెళ్లి పోయింది. బ్యూటీ పార్లర్‌కు వెల్లిన అర్చ ఎంతసేపటికీ తిరిగి రాకపోవడంతో ఆమె అత్తింటి వారికి అనుమానం వచ్చింది. దీంతో ఆమె కోసం వెతకడం మొదలుపెట్టారు.

ఈ క్రమంలో వారికి అర్చన బ్యూటీ పార్లర్‌కి వెళ్లలేదని తెలిసింది. ఆమె తన ప్రియుడు కలైతో కలిసి పారిపోయిందని వెల్లడైంది. దీంతో అర్చన తల్లి నాగవల్లి తిరువిగ నగర్ పోలీస్ స్టేషన్‌లో ఫిర్యాదు చేసింది. పోలీసులు వెంటనే రంగంలోకి దిగారు. దీంతో శుక్రవారం సాయంత్రం అర్చన తిరువిగనగర్ పోలీస్ స్టేషన్‌కు వచ్చింది. ఆమె విజయకుమార్‌కు క్షమాపణ చెప్పింది. తాను ప్రేమించిన వాడితోనే కలిసి ఉంటానని తేల్చి చెప్పింది. తమకు ముందే ఈ విషయం చెబితే ఇంత వరకు వచ్చేవాళ్లం కాదు కదా.. అని పెళ్లి కొడుకు కుటుంబం ఆమెపై మండి పడింది. ఎంగేజ్‌మెంట్, పెళ్లికి అయిన ఖర్చు ఎవరు భరిస్తారని వారు ప్రశ్నించారు. అర్చన కుటుంబ సభ్యులు పెళ్లి ఖర్చులకు పరిహారం ఇస్తామని ఒప్పుకున్నారు.

ఈ విషయం తెలుసుకున్న స్థానికులు, నెటిజనులు నువ్వు అదృష్టవంతుడి బ్రదర్.. భార్య, ప్రియుడి చేతిలో హత్యకు గురికాకుండా తప్పించుకున్నావు.. ఈ అమ్మాయి కాస్త మంచిది.. ఎవరికి హానీ చేయకుండా తన జీవితం తాను చూసుకుంది అని కామెంట్ చేస్తున్నారు. ఈ సంఘటన ఇప్పుడు సోషల్ మీడియాలో వైరల్ అవుతోంది.