కాసేపట్లో పెళ్లనగా రోడ్డు ప్రమాదం.. నవవరుడు సహా 8 మంది మృతి

ఉత్తర ప్రదేశ్‌లోని సంభాల్ జిల్లాలో శుక్రవారం రోజు ఉదయం ఈ హృదయ విదారక ఘటన చోటు చేసుకుంది. ముఖ్యంగా హర్ గోవింద్‌పూర్ గ్రామం నుంచి సిర్తౌల్ గ్రామానికి పెళ్లి వేడుకల కోసం వెళ్తున్న బృందం ప్రయాణిస్తున్న బొలెరో వాహనం.. జీవనై గ్రామంలోని జనతా ఇంటర్ కాలేజీ సమీపానికి చేరుకోగానే అదుపు తప్పి పక్కనే ఉన్న గోడను బలంగా ఢీకొట్టింది. ప్రమాద తీవ్రతకు వాహనం మొత్తం నుజ్జునుజ్జు కాగా.. అందులో ప్రయాణిస్తున్న 10 మందిలో ఐదుగురు అక్కడికక్కడే ప్రాణాలు కోల్పోయారు. మిగతా ఐదుగురిలో ముగ్గురికి తీవ్ర గాయాలు కాగా.. మరో ఇద్దరికి స్వల్ప గాయాలు అయ్యాయి. విషయం గుర్తించిన స్థానికులు వెంటనే పోలీసులు, అంబులెన్సుకు సమాచారం అందించారు.

ఇలా హుటాహుటిన రంగంలోకి దిగిన సిబ్బంది క్షతగాత్రులను ఆస్పత్రికి తరలించగా.. అందులో ముగ్గురు అక్కడికి వెళ్లేలోపే ప్రాణాలు కోల్పోయారు. మరో ఇద్దరు మాత్రం ఆస్పత్రిలో చికిత్స పొందుతున్నారు. మరోవైపు మృతదేహాలను పోస్టుమార్టం నిమిత్తం స్థానిక ప్రభుత్వాసుపత్రికి తరలించారు. అయితే మృతుల్లో 24 ఏళ్ల వరుడు కూడా ఉన్నట్లు పోలీసులు ధృవీకరించారు. ఈ ఘటనలో మరో ఇద్దరి పరిస్థితి విషమంగా ఉందని, వారికి మెరుగైన చికిత్స అందిస్తున్నారని అధికారులు తెలిపారు.

ప్రాథమిక దర్యాప్తు ప్రకారం.. వాహనంలో పది మంది ప్రయాణిస్తున్నారని చెప్పారు. ఇది వాహన సామర్థ్యానికి మించి ఉందని అధికారులు వెల్లడించారు. వాహనం అతి వేగంగా ప్రయాణించడంతో పాటు ఓవర్‌లోడింగ్ కారణంగా నియంత్రణ కోల్పోయి ప్రమాదానికి గురైనట్లు తమ ప్రాథమిక విచారణలో గుర్తించినట్లు వివరించారు. ఈ దుర్ఘటనపై పోలీసులు కేసు నమోదు చేసి దర్యాప్తు చేపట్టారు. ఈ ఘోర ప్రమాదం పట్ల ప్రధానమంత్రి నరేంద్ర మోడీ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతిని తెలియజేశారు. ప్రధాన మంత్రి జాతీయ సహాయ నిధి నుంచి మృతుల కుటుంబాలకు రూ. 2 లక్షల చొప్పున.. గాయపడిన వారికి రూ. 50,000 చొప్పున ఎక్స్-గ్రేషియా చెల్లిస్తామని ప్రధాని కార్యాలయం ప్రకటించింది.

ఈ సంఘటన స్థానికంగా తీవ్ర విషాదాన్ని నింపింది. ముఖ్యంగా వధువు తరఫు వారైతే మరికాసేపట్లో పెళ్లనగా పెళ్లి కుమారుడు చనిపోవడంతో.. తీవ్ర దిగ్ర్భాంతి వ్యక్తం చేశారు. తమ బిడ్డను ఓ అయ్య చేతిలో పెట్టేందుకు అనేక అప్పులు చేసి పెళ్లి ఏర్పాట్లు చేస్తే.. ఇలా జరిగిందంటూ వధువు తల్లిదండ్రులు కన్నీరుమున్నీరుగా విలపిస్తున్నారు.