పలు దేశాలతో వాణిజ్య ఒప్పందాలు తుది దశలో ఉన్నాయన్న ట్రంప్

వాణిజ్య భాగస్వామ్య దేశాలపై అధిక సుంకాలు విధించే విషయంలో అమెరికా అధ్యక్షుడు డొనాల్డ్ ట్రంప్ ప్రభుత్వం వెనక్కి తగ్గడం లేదు. ముందుగా ప్రకటించినట్లే ఆగస్టు 1 నుంచి అధిక సుంకాలు అమల్లోకి వస్తాయని స్పష్టం చేసింది. దీనికి సంబంధించిన కొత్త టారిఫ్ రేట్ల వివరాలను జులై 9వ తేదీలోగా ఆయా దేశాలకు తెలియజేయనున్నట్లు అధ్యక్షుడు ట్రంప్ ఆదివారం వెల్లడించారు.పలు దేశాలతో వాణిజ్య ఒప్పందాలు ఖరారు చేసేందుకు అమెరికా తుది దశ చర్చలు జరుపుతోందని ట్రంప్ తెలిపారు. ఈ ఒప్పందాలపై త్వరగా నిర్ణయం తీసుకోని దేశాలకు సుంకాల పెంపు తప్పదని హెచ్చరించారు. ఈ మేరకు సుమారు 12 దేశాలకు పంపేందుకు లేఖలు కూడా సిద్ధం చేశామని, అవి సోమవారం చేరే అవకాశం ఉందని ఆయన పేర్కొన్నారు. "ఒక్కో దేశంతో కూర్చుని 15 రకాల అంశాలపై చర్చలు జరపడం కంటే, 'మీరు మాతో వ్యాపారం చేయాలంటే ఇది చెల్లించాల్సిందే' అని లేఖలు పంపడం చాలా సులభం" అని ట్రంప్ వ్యాఖ్యానించారు.అధిక సుంకాల అమలు తేదీపై వాణిజ్య కార్యదర్శి హోవార్డ్ లూట్నిక్ స్పష్టత ఇచ్చారు. ఆగస్టు 1 నుంచే పెంపు అమల్లోకి వస్తుందని, ప్రస్తుతం అధ్యక్షుడు ట్రంప్ సుంకాల రేట్లను, ఒప్పందాలను ఖరారు చేసే పనిలో ఉన్నారని తెలిపారు. అమెరికా ట్రెజరీ కార్యదర్శి స్కాట్ బెస్సెంట్ కూడా ఇదే విషయాన్ని ధ్రువీకరించారు. "ఒప్పందాలను వేగవంతం చేయకపోతే, ఏప్రిల్ 2 నాటి సుంకాల స్థాయికి తిరిగి వెళ్లాల్సి ఉంటుందని మా భాగస్వామ్య దేశాలకు ట్రంప్ లేఖలు పంపనున్నారు. దీంతో చాలా ఒప్పందాలు త్వరగా పూర్తవుతాయని భావిస్తున్నాం" అని ఆయన సీఎన్ఎన్‌తో అన్నారు.గత ఏప్రిల్‌లో ట్రంప్ ప్రభుత్వం చాలా దేశాలపై 10% మూల సుంకంతో పాటు 50% వరకు అదనపు సుంకాలను ప్రకటించింది. అయితే, అంతర్జాతీయంగా ఆర్థిక ఆందోళనలు వ్యక్తమవడంతో వాటి అమలును వాయిదా వేసింది. తాజాగా ఆగస్టు 1ని గడువుగా నిర్ణయించడంతో ఒప్పందాలు పూర్తి చేయడానికి దేశాలకు మూడు వారాల సమయం లభించింది. ఇప్పటికే అమెరికా.. యూకే, వియత్నాంతో వాణిజ్య ఒప్పందాలు కుదుర్చుకోగా, చైనా ఉత్పత్తులపై విధించిన అధిక సుంకాలను తాత్కాలికంగా తగ్గించడానికి అంగీకరించింది.