మద్యం మత్తులో మహిళపై రెచ్చిపోయిన ఎంఎన్ఎస్ నేత కుమారుడు

మహారాష్ట్రలో మరాఠీయేతరులపై దాడులు జరుగుతున్న సమయంలో.. మహారాష్ట్ర నవనిర్మాణ్ సేన రాష్ట్ర ఉపాధ్యక్షుడు జావేద్ షేక్ కుమారుడు రాహిల్ షేక్ వివాదంలో చిక్కుకున్నారు. రాహిల్ మద్యం మత్తులో ఒక మహిళతో అసభ్యంగా ప్రవర్తించిన వీడియో వైరల్ అవుతోంది. తన తండ్రి చాలా పలుకుబడి కలిగిన వ్యక్తి అని రాహిల్ ఆ మహిళను బెదిరించినట్టు ఆరోపణలు వచ్చాయి. దీంతో కేసు నమోదుచేసిన పోలీసులు రాహిల్‌ను అరెస్టు చేశారు. మహిళలను అవమానించడం, నిర్లక్ష్యంగా డ్రైవింగ్ వంటి సెక్షన్ల కింద కేసు నమోదు చేశారు. ఈ సంఘటన మహారాష్ట్ర నవనిర్మాణ్ సేన ను ఇరకాటంలోకి నెట్టింది.

ఈ వీడియో సోషల్ మీడియాలో వైరల్ కావడంతో శివసేన నేత సంజయ్ నిరుపమ్ విమర్శలు గుప్పించారు. మరాఠీ సంస్కృతిని కాపాడతామని చెప్పే వారి నిజ స్వరూపం ఇదేనంటూ ఆయన ఆగ్రహం వ్యక్తం చేశారు. మరాఠీయేతరులపై ముంబయిలో దాడుల నేపథ్యంలో ఈ ఘటన ప్రాధాన్యత సంతరించుకుంది. ‘మద్యం మత్తులో ఏం చేస్తున్నాడో కూడా తెలియని స్థితిలో ఒక ఎంఎన్ఎస్ నేత కొడుకు మరాఠీ మహిళను దుర్భాషలాడాడు.. ఇది చాలదన్నట్టు తన తండ్రి రాజకీయ పలుకుబడిని ప్రదర్శించే ప్రయత్నం చేశాడు’ అని నిరుపమ్ విమర్శించారు. మరాఠీల ఆత్మగౌరవాన్ని కాపాడతామని చెప్పే వీళ్ళు రౌడీయిజం చేస్తున్నారని ఆయన విమర్శించారు.

‘‘మరాఠీల ఆత్మగౌరవానికి పరిరక్షకులమని చెప్పుకునే వారి నిజస్వరూపం ఇదీ. వీళ్లు భాష పేరిట రౌడీయిజం తప్ప మరేమీ చేయట్లేదు. ఎమ్ఎన్ఎస్ క్షేత్ర స్థాయి పరిస్థితి ఇది’ అని ఆయన అన్నారు. తమ ప్రభుత్వం మరాఠీకి వ్యతిరేకం కాదని, తామే భాషను ప్రోత్సహిస్తున్నామని ఆయన స్పష్టం చేశారు. ఈ వివాదంపై MNS స్పందించింది. ఈ ఘటనను సమర్థించబోమని, బాధ్యులపై కఠిన చర్యలు తీసుకోవాలని పోలీసులను కోరినట్లు MNS నేత అవినాశ్ జాదవ్ తెలిపారు. ‘ఈ చర్యలను పార్టీ అస్సలు సమర్థించదు’ అని ఆయన స్పష్టం చేశారు. హిందీ బోధన విషయంలో మహారాష్ట్రలో రాజకీయ వివాదం నెలకున్న సంగతి తెలిసిందే.

మరోవైపు, నెయిల్ ఆర్టిస్ట్ అయిన రాజశ్రీ మెహ్రా మాట్లాడుతూ.. ఏం చేస్తున్నాడో అతడికి తెలివి లేదు కానీ.. తండ్రి అధికారం మాత్రం గుర్తుపెట్టుకున్నాడని చెప్ాపరు. ‘‘మొదట్లో అనుకోకుండా గుద్దినట్టే అనిపించింది. కానీ తర్వాత ఇంకొకసారి కారును ఢీకొట్టాడు... నేను ఓ చిన్న లేన్‌లోకి వెళ్లాను, అక్కడ కేవలం ఒక కారు వెళ్లే మార్గం మాత్రమే ఉంది... అదే సమయంలో అతను మళ్లీ లక్ష్యంగా చేసుకున్నాడు... పూర్తిగా మద్యం మత్తులో ఉన్నాడు. అతడి ఒంటి మీద ప్యాంటు తప్ప మరేం లేదు. తన తండ్రి ఎంత శక్తిమంతుడో మాత్రం మర్చిపోలేదు. పోలీసుల మాట వినలేదు, కార్ కీలు ఇవ్వలేదు’’ అని అన్నారు.