విడాకుల సెలబ్రేషన్.. భార్యతో విడిపోగానే 40 లీటర్ల పాలతో భర్త స్నానం

ఇప్పటి వరకు మనం విడాకుల తీసుకున్న తర్వాత పలువురు ఫొటోషూట్‌లు జరపుకోవడం, స్నేహితులను పిలిచి పార్టీలు చేసుకోవడం వంటివే చూశాం. కానీ ఇప్పుడు అంతకు మించిన మరో అద్భుతమైన ఘట్టాన్ని ఆవిష్కకరించాడో వ్యక్తి. ముఖ్యంగా తనను కాదనుకుని.. ప్రియుడితో పలుమార్ల లేచిపోయిన భార్యను పిల్లాడి కోసం తనతో ఉంచుకోవాలనుకున్నాడు. కానీ ఆమె ఎంతకూ మారకపోయేసరికి విడాకులు తీసుకున్నాడు. అంతేనా విడాకుల తర్వాత తెగ సంబుర పడిపోతూ.. పండగ చేసుకున్నాడు. ముఖ్యంగా 40 లీటర్ల (దాదాపుగా నాలుగు బకెట్ల నిండా) పాలు తెచ్చుకుని స్నానం చేశాడు. ఈరోజు నుంచి నేను స్వేచ్ఛా జీవిని అయ్యానంటూ మురిసిపోయాడు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.

అస్సాంలోని నల్బరీ జిల్లా ముకల్మువా పోలీస్ స్టేషన్ పరిధిలోని బరలియాపర్‌ గ్రామానికి చెందిన మాణిక్ అలీ అనే వ్యక్తికి తాజాగా భార్యతో చట్టబద్ధంగా విడాకులు వచ్చాయి. ముఖ్యంగా ఈ ప్రక్రియ పూర్తయి.. ఆమెతో విడిపోయినట్లుగా ఆయన చేతిలో విడాకుల పత్రాలు పడగానే తెగ సంబుర పడిపోయాడు. తనలో తానే నవ్వుకుంటూ, మురిసిపోతూ ఇంటికి చేరుకున్నాడు. ఈ వేడుకను ఎలాగైనా సరే సంతోషంగా.. జీవితాంతం అందరికీ గుర్తుండిపోయేలా జరుపుకోవాలనుకున్నాడు. అందుకోసం ఓ వినూత్మమైన ఆలోచన కూడా చేశాడు. ముఖ్యంగా 40 లీటర్ల తాజా పాలను తెప్పించుకుని స్నానం చేశాడు. మొత్తంగా నాలుగు బకెట్ల నిండా పాలు ఉండగా.. వాటన్నింటినీ ఒంటిపై కుమ్మరించుకున్నాడు.

ఈ సందర్భంగానే మాట్లాడుతూ.. నేను కొత్తగా జన్మించినట్లు అనిపిస్తోందని చెప్పాడు. దాంపత్య జీవితం నుంచి విముక్తి పొంది స్వేచ్ఛా జీవిని అయ్యానంటూ తెలిపాడు. అలాగే కొత్త జీవితాన్ని ప్రారంభించడానికి ఈ పాల స్నానాన్ని ఒక ప్రతీకగా ఎంచుకున్నట్లు వివరించాడు. అంతేకాకుండా తన భార్య గురించి కూడా చాలానే విషయాలను చెప్పాడు. తమకు పెళ్లై ఓ కుమారుడు కూడా పుట్టాకా.. భార్య ఇప్పటికే రెండు సార్లు ప్రియుడితో పారిపోయిందని గుర్తు చేశాడు. ఈ పరిస్థితి తనను, తన కుటుంబాన్ని తీవ్ర మనస్తాపానికి గురిచేసిందని వెల్లడించాడు. కానీ కుమారుడి భవిష్యత్ దృష్టిలో పెట్టుకుని.. నచ్చకపోయినా భార్యతో ఉండాల్సి వచ్చిందని ఆవేదన చెందాడు.

రానంటున్నా పిల్లాడి కోసం ఆమెను ఇంటికి తీసుకువచ్చి పెట్టుకున్నానని.. కానీ ఈ ప్రయత్నాలన్నీ విఫలం అయి చివరకు విడాకులు ఇచ్చినట్లు చెప్పాడు. ఇకపై సంతోషంగా బతుకుతానంటూ ఆశాభావం వ్యక్తం చేశాడు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఇది చూసిన ప్రతీ ఒక్కరూ మాణిక్ అలీ నిర్ణయాన్ని సమర్థిస్తూ.. మంచి పని చేశావు బ్రో అంటూ కామెంట్లు చేస్తున్నారు. అలాంటి వాళ్లతో కలిసుండడం కంటే నీవు ఒక్కడివే కుమారుడిని పెంచుకోవడం మంచిదంటూ వివరిస్తున్నారు. మరికొందరు మాత్రం ఇంత పెద్ద మొత్తంలో పాలను వృథా చేయడం పట్ల తీవ్ర అసంతృప్తి వ్యక్తం చేశారు. ఏదేమైనా ఈ ఘటన అస్సాంలో చర్చనీయాంశంగా మారింది.