ఏపీలో భవనాలు కడుతున్నారా.? రూల్స్ మార్చిన ప్రభుత్వం..

భవన నిర్మాణ రంగానికి సంబంధించి ఏపీ ప్రభుత్వం మరో కీలక నిర్ణయం తీసుకుంది. భవన నిర్మాణ రంగాన్ని ప్రోత్సహించాలనే ఉద్దేశంతో ఈ ఏడాది ఆరంభంలో ఏపీ ప్రభుత్వం సెల్ఫ్ సర్టిఫికేషన్ స్కీమ్ తీసుకువచ్చిన సంగతి తెలిసిందే. సెల్ఫ్ సర్టిఫికేషన్ స్కీమ్‌లో భాగంగా రాష్ట్రంలోని పట్టణ ప్రాంత స్థానిక సంస్థలే భవన నిర్మాణాలకు అనుమతులు ఇచ్చేలా ఆదేశాలు జారీచేశారు. ఐదు అంతస్తులలోపు నిర్మాణాలకు, అలాగే విస్తీర్ణం300 చదరపు మీటర్లు దాటకుండా ఉన్నట్లయితే.. యజమానులే ప్లాన్ ధ్రువీకరిస్తూ అనుమతుల కోసం దరఖాస్తు చేసుకునేలా సెల్ఫ్ సర్టిఫికేషన్ స్కీమ్ తీసుకువచ్చారు. అయితే తాజాగా సెల్ఫ్ సర్టిఫికేషన్ స్కీమ్‌లో ఏపీ ప్రభుత్వం కొన్ని మార్పులు చేసింది.

వైట్ కేటగిరీ పరిశ్రమలకు గతంలో సెల్ఫ్ సర్టిఫికేషన్ స్కీమ్ అమలు చేయలేదు. తాజాగా కాలుష్య నియంత్రణ మండలి అనుమతించిన వైట్ కేటగిరీ పరిశ్రమలకు కూడా సెల్ఫ్ సర్టిఫికేషన్ స్కీమ్ అమలు చేయనున్నారు. అలాగే 500 చదరపు మీటర్లలోపు నిర్మించే వైట్‌ కేటగిరీ పరిశ్రమలకు కూడా సెల్ఫ్ సర్టిఫికేషన్ స్కీమ్ అమలుచేయనున్నారు. గతంలో భవన నిర్మాణాలను అనుమతులు ఇచ్చే అధికారం అర్భన్ డెవలప్‌మెంట్ అథారిటీల పరిధిలో ఉండేది. అయితే సెల్ఫ్ సర్టిఫికేషన్ స్కీమ్‌లో భాగంగా ఆ అధికారాన్ని అర్బన్ డెవలప్‌మెంట్ అథారిటీల నుంచి పట్టణ ప్రాంత స్థానిక సంస్థలకు బదిలీ చేశారు. అలాగే 300 చదరపు మీటర్లలోపు నిర్మాణాలు అయితే స్వయంగా వాటి యజమానులు లేదా ఇంజనీర్లు ప్లాన్ అప్‌లోడ్ చేసి అనుమతుల కోసం దరఖాస్తు చేసుకునే సౌకర్యం కల్పించారు.

మరోవైపు ఏపీ ప్రభుత్వం స్పేస్ పాలసీని తీసుకువచ్చింది. ఈ స్పేస్ పాలసీ ఐదేళ్ల పాటు అమల్లో ఉంటుంది. ఈ పాలసీ అమలు చేయడం కోసం ఏపీ స్సే్స్ సిటీ కార్పొరేషన్ ఏర్పాటు చేయనున్నారు. ఈ కార్పొరేషన్ ద్వారా పెట్టుబడులను ఆకర్షించాలని.. జాతీయ, అంతర్జాతీయ సంస్థలతో భాగస్వామ్యం ఏర్పాటు చేసుకోవాలని ఏపీ ప్రభుత్వం భావిస్తోంది. అలాగే తిరుపతి, శ్రీసత్యసాయి జిల్లాలలో స్పేస్ సిటీలు ఏర్పాటు చేయాలనే ఆలోచనలో ప్రభుత్వం ఉంది. ఇందుకోసం ఓ కమిటీని కూడా ఏర్పాటు చేసే ఆలోచన చేస్తున్నట్లు సమాచారం.