యూకే ఇమ్మిగ్రేషన్ వ్యవస్థలో కీలక మార్పులు.. కొత్తగా ఈ-వీసా అమలు

యునైటెడ్ కింగ్‌డమ్‌కు ఉన్నత విద్య కోసం వెళ్లే అంతర్జాతీయ విద్యార్థులకు ఆ దేశం శుభవార్త చెప్పింది. అలాగే కొన్ని కొత్త నిబంధనలను కూడా పాటించాల్సిన అవసరం ఉందని పేర్కొంది. జులై 15వ తేదీ నుంచి బ్రిటన్ ప్రభుత్వం ఈ-వీసా విధానాన్ని ప్రవేశ పెడుతోంది. ఇప్పటి వరకు అమల్లో ఉన్న భౌతిక వీసా స్టిక్కర్ల స్థానంలో సురక్షితమైన డిజిటల్ రికార్డులను వాడుకలోకి తీసుకు రాబోతున్నారు. ఈర్పు భారతీయ విద్యార్థులతో సహా యూకేకు వెళ్లే అందరు అంతర్జాతీయ విద్యార్థులను ప్రభావితం చేస్తుంది.

కొత్త ఈ-వీసా వ్యవస్థ ఎలా పనిచేస్తుంది?

ఈ కొత్త విధానం కింద విద్యార్థులకు ఇకపై పాస్‌పోర్ట్‌పై భౌతిక వీసా ముద్ర (విగ్నేట్) ఉండదు. బదులుగా వారి ఇమ్మిగ్రేషన్ స్థితికి సంబంధించిన సమాచారం పాస్‌పోర్ట్‌కు లింక్ చేయబడిన సురక్షితమైన డిజిటల్ రికార్డుగా ఉంటుంది. ఈ డిజిటల్ రికార్డును ఆన్‌లైన్ యూకేవీఐ (UKVI - UK Visas and Immigration) ఖాతా ద్వారా యాక్సెస్ చేయవచ్చు. విశ్వవిద్యాలయాలు, గృహ యజమానులు, ఉద్యోగదాతలు కూడా గుర్తింపు, ఇమ్మిగ్రేషన్ స్థితిని ధృవీకరించడానికి ఈ డిజిటల్ వ్యవస్థను ఉపయోగిస్తారు.

  విద్యార్థులు తప్పనిసరిగా పాటించాల్సిన అంశాలు.

ఈ కొత్త వ్యవస్థకు అనుగుణంగా విద్యార్థులు యూకేకు ప్రయాణానికి ముందు కొన్ని కీలక దశలను పూర్తి చేయడం అత్యవసరం. వీటిలో ముఖ్యంగా ఐదు అంశాలు ఉన్నాయి. అవేంటంటే?

1. యూకేవీఐ ఖాతా సృష్టి: విద్యార్థులు తమ వ్యక్తిగత సమాచారం, పాస్‌పోర్ట్ వివరాలను అప్‌డేట్ చేస్తూ.. తప్పనిసరిగా ఆన్‌లైన్ యూకేవీఐ ఖాతాను సృష్టించుకోవాలి. ఈ ఖాతా లాగిన్ వివరాలను గుర్తుంచుకోవడం చాలా ముఖ్యం.

2. వీసా డెసిషన్ లేఖ: భౌతిక వీసా లేనందున, వీసా నిర్ణయ లేఖను (Visa Decision Letter) ప్రింటెడ్ లేదా డిజిటల్ కాపీని వెంట తీసుకెళ్లాలి. సరిహద్దు అధికారులు పాస్‌పోర్ట్‌ను స్కాన్ చేయడం ద్వారా ఈ-వీసాను యాక్సెస్ చేస్తారు.

3. పాస్‌పోర్ట్ నవీకరణ: వీసా ఆమోదం తర్వాత పాస్‌పోర్ట్‌ను పునరుద్ధరిస్తే.. ప్రయాణానికి ముందు ఈ మార్పులను యూకేవీఐ ఖాతాలో తప్పనిసరిగా అప్‌డేట్ చేయాలి.

4. విశ్వవిద్యాలయ, వసతి విధానాలు: విశ్వవిద్యాలయాల్లో నమోదు కోసం, వసతి కోసం ఇమ్మిగ్రేషన్ స్థితిని ధృవీకరించడానికి ఈ-వీసా అవసరం. కాబట్టి సంబంధిత విశ్వవిద్యాలయ, వసతి విధానాలను ముందుగానే పరిశీలించాలి.

5. వీసా నిబంధనలకు కట్టుబడి ఉండటం: యూకేలో ఉన్నప్పుడు వీసా నిబంధనలకు కట్టుబడి ఉండటం సమస్యలను నివారించడానికి కీలకం.

ఈ మార్పులన్నీ విద్యార్థుల ప్రయాణాన్ని సులభతరం చేయడంతో పాటు యూకే సరిహద్దుల్లో మరింత పటిష్టమైన డిజిటల్ ఇమ్మిగ్రేషన్ ఫ్రేమ్‌వర్క్‌ను నిర్మిస్తాయి. విద్యార్థులు ఈ సూచనలను తప్పనిసరిగా పాటించి, ఎలాంటి ఇబ్బందులు లేకుండా తమ ఉన్నత విద్యను ప్రారంభించాలని యూకే ప్రభుత్వం సూచిస్తోంది.