అమెరికాలో 8 మంది భారత యువకుల అరెస్ట్

కిడ్నాప్, హింస కేసుల్లో అమెరికాలో 8 మంది భారత సంతతి వ్యక్తులను కాలిఫోర్నియాలో అరెస్టు చేసినట్లు అమెరికా అధికారులు వెల్లడించారు. అరెస్టు చేసిన వారిలో మోస్ట్ వాంటెడ్ క్రిమినల్, భారత ఎన్ఐఏ వెతుకుతున్న పంజాబ్‌కు చెందిన గ్యాంగ్‌స్టర్ పవిత్తర్ సింగ్ బటాలా కూడా ఉన్నట్లు అధికారులు తెలిపారు. ఇతనిపై ఇంటర్‌పోల్ రెడ్ కార్నర్ నోటీసు కూడా ఉంది. మిగిలిన ఏడుగురిని పంజాబ్‌కు చెందిన దిల్‌ప్రీత్ సింగ్, అర్ష్‌ప్రీత్ సింగ్, అమృత్‌పాల్ సింగ్, విశాల్, గుర్తజ్ సింగ్, మన్‌ప్రీత్ రాంధావా, సరబ్‌జిత్ సింగ్‌గా గుర్తించారు.

వీరిపై కిడ్నాప్, హింస, అక్రమ నిర్బంధం, నేరపూరిత కుట్ర, సాక్షులను ప్రలోభపెట్టడం, తుపాకీతో దాడి, బెదిరింపులతో సహా పలు తీవ్రమైన నేరారోపణలు ఉన్నాయి. గతంలో వీరిపై అక్రమంగా మెషిన్ గన్, అసాల్ట్ వెపన్ లాంటివి కలిగి ఉన్నారన్న కేసులు ఉన్నాయి. అలాగే అధిక సామర్థ్యం గల మ్యాగజైన్‌ల అమ్మకం, షార్ట్-బారెల్డ్ రైఫిల్ తయారీ చేశారన్న కేసులూ ఉన్నాయి. వీరందరికీ కూడా ఉగ్ర సంస్థలతో సంబంధాలు ఉండవచ్చని భారత జాతీయ దర్యాప్తు సంస్థ (ఎన్ఐఏ) వర్గాలు అనుమానం వ్యక్తం చేస్తున్నాయి.

ఈ ఆపరేషన్ సందర్భంగా, ఐదు హ్యాండ్‌గన్‌లు, ఒక అసాల్ట్ రైఫిల్, వందలాది రౌండ్ల మందుగుండు సామగ్రి, అధిక సామర్థ్యం గల మ్యాగజైన్‌లు, 15,000 డాలర్ల నగదును స్వాధీనం చేసుకున్నారు. పవిత్తర్ సింగ్ బటాలాకు జతిందర్ జ్యోతి, బీకేఐ ఉగ్రవాది లఖ్బీర్ లాండాతో సంబంధాలు ఉన్నాయి. ఉగ్రవాదులకు ఆయుధ సరఫరా చేశారని జ్యోతి, బటాలాపై ఆరోపణలు వచ్చాయి. ఈ ముఠా ఐఎస్ఐ-లింక్డ్ రిండా సంధు ఆదేశాల మేరకు పని చేస్తున్నట్లు అధికారులు భావిస్తున్నారు. భారతీయ ఏజెన్సీలు బటాలాను తమకు అప్పగించాలని అమెరికాను కోరుతున్నాయి.