భారత్‌పై పాకిస్థాన్ అణుదాడి చేస్తుందా..: పాక్ ప్రధాని ఏం సమాధానం ఇచ్చారంటే

ఏప్రిల్ 22వ తేదీన జమ్ము కశ్మీర్‍లోని పహల్గాంలో ఉగ్రదాడి జరిగిన విషయం అందరికీ తెలిసిందే. మొత్తంగా 22 మంది ఈ ఘటనలో ప్రాణాలు కోల్పోగా.. భారత్ ఆపరేషన్ సిందూర్ చేపట్టింది. పాకిస్థాన్, పాక్ ఆక్రమిత కశ్మీర్‌లోని ఉగ్రస్థావరాలే లక్ష్యంగా దాడులు చేసింది. వీటిని పాక్ కూడా తిప్పి కొట్టగా.. ఇరు దేశాల మధ్య అణు ఘర్షణలకు దారి తీయొచ్చనే ఆందోళనలు వచ్చాయి. అనేక మంది ఈ రెండు దేశాల మధ్య యుద్ధం జరుగుతుందని కూడా భావించారు. ముఖ్యంగా పాక్.. భారత్‌పై అణుదాడి చేస్తుందని అనుకున్నారు. అయితే తాజాగా ఇదే ప్రశ్న పాకిస్థాన్ ప్రధాని షెహబాజ్ షరీఫ్‌కు ఎదురవగా షాకింగ్ సమాధానం చెప్పారు. ముఖ్యంగా ఇస్లామాబాద్‌లోని విద్యార్థులతో మాట్లాడుతూ.. అణుదాడి కామెంట్లను తోసి పుచ్చారు.

తాజాగా పాకిస్థాన్ ప్రధాన మంత్రి షెహబాజ్ షరీఫ్.. ఇస్లామాబాద్‌లో జరిగిన ఓ కార్యక్రమానికి వెళ్లారు. అక్కడే విద్యార్థులను ఉద్దేశించి మాట్లాడుతూ దేశం గురించి షాకింగ్ కామెంట్లు చేశారు. ముఖ్యంగా భారత్-పాక్ మధ్య ఏర్పడ్డ ఉద్రిక్త పరిస్థితుల్లో దాయాది దేశం ఇండియాపై అణు దాడి చేస్తుందని అంతా అనుకున్నారు. ఇదే ప్రశ్న పాక్ ప్రధానికి ఎదురవగా.. వాటిని తోసి పుచ్చారు. పాకిస్థాన్ అణు సామర్థ్యాలు శాంతిని స్థాపించడం, తమ సార్వభౌమత్వాన్ని రక్షించుకోవడానికే ఉపయోగ పడతాయని తేల్చి చెప్పారు. ఈ విన్యాసాలు ఒక దేశంపై దాడి చేయడానికి లేదా ప్రాంతీయ స్థిరత్వాన్ని దెబ్బతీయడానికి ఉద్దేశించినవి ఎమాత్రం కావని స్పష్టం చేశారు.

పాకిస్థాన్ ఎప్పుడూ యుద్ధాన్ని కోరుకోదని.. అయితే తమ దేశంపై ఎలాంటి దురాక్రమణ జరిగినా దానిని తిప్పికొట్టడానికి పూర్తి సిద్ధంగా ఉంటుందని ఆయన పునరుద్ఘాటించారు. పాకిస్థాన్ అణు ఆయుధాలు కేవలం నిరోధక శక్తిగా మాత్రమే పని చేస్తాయని.. వాటిని మొదటగా ఉపయోగించే విధానం తమకు లేదని షెహబాజ్ షరీఫ్ మరోసారి ప్రపంచానికి గుర్తు చేశారు. అణు నిరాయుధీకరణకు తాము కట్టుబడి ఉన్నామని.. అంతర్జాతీయంగా అణు భద్రతను పెంపొందించే ప్రయత్నాలకు తాము మద్దతు ఇస్తామని పేర్కొన్నారు. ఈ వ్యాఖ్యలు ముఖ్యంగా భారత దేశంతో ఉన్న సున్నితమైన సంబంధాల నేపథ్యంలో పాకిస్థాన్ తన అణు కార్యక్రమంపై పారదర్శకతను పెంచుకునే ప్రయత్నంగా భావిస్తున్నారు.

ప్రాంతీయ శాంతి, స్థిరత్వానికి పాకిస్థాన్ అత్యంత ప్రాధాన్యత ఇస్తుందని షరీఫ్ తన ప్రసంగంలో నొక్కి చెప్పారు. అన్ని వివాదాలను చర్చల ద్వారా, దౌత్య మార్గాల ద్వారా పరిష్కరించుకోవడానికి తాము సిద్ధంగా ఉన్నామని మరోసారి ప్రకటించారు. పొరుగు దేశాలతో మంచి సంబంధాలను కలిగి ఉండాలని.. పరస్పర గౌరవం, సహకారం ద్వారా మాత్రమే ఈ ప్రాంతంలో శాశ్వత శాంతి సాధ్యం అవుతుందని ఆయన అభిప్రాయ పడ్డారు. 'ఆపరేషన్ సిందూర్‌'పై వచ్చిన అనుమానాలను తొలగించేందుకు తమ రక్షణ సామర్థ్యాలు కేవలం తమ సరిహద్దులను కాపాడుకోవడానికి మాత్రమేనని చేసిన ఈ ప్రకటన అంతర్జాతీయ సమాజానికి ఒక స్పష్టమైన సంకేతాన్ని ఇస్తున్నట్లు నిపుణులు భావిస్తున్నారు.