బతికుండగానే తల్లిని శవపేటికలో పెట్టి ఊరేగింపు

చైనాలోని ఆచార సంప్రదాయాలు కొన్నిసార్లు ప్రపంచాన్ని ఆశ్చర్య పరుస్తుంటాయి. వారు పాటించినన్ని వింత ఆచారాలు మరెవరూ పాటించరేమో అన్న విధంగా ఉంటుంటాయి. అచ్చంగా అలాంటి ఓ వింత ఆచారమే మరోసారి వెలుగులోకి వచ్చింది. ముఖ్యంగా చైనాలోని ఓ వ్యక్తి.. తన 70 ఏళ్ల తల్లి కోసం ఏకంగా ఓ శవపేటిక (కాఫిన్) కొనుగోలు చేశాడు. అలా అని ఆయన తల్లి చనిపోయిందేమో అనుకుంటున్నారేమో. అదేమీ లేదండి. వృద్ధురాలైన ఆయురారోగ్యాలతో నిక్షేపంగా ఉంది. మరెందుకు శవపేటిక అనే అనుమానం వస్తోంది.. ఆగండి ఆగండి చెబుతాను. ఆ శవపేటికలోనే తల్లిని కూర్చోబెట్టి ఊరేగింపు నిర్వహించాడు. ముఖ్యంగా దాన్ని మోసేందుకు 16 మందిని పనిలో కూడా పెట్టుకున్నాడు. ఇది వినడానికి వింతగా ఉన్నా.. ఇదొక ప్రత్యేకమైన ఆచారమని తెలుస్తోంది. మరి అలా ఎందుకు చేస్తారో మనం ఇప్పుడు తెలుసుకుందాం.

చైనాలోని కొన్ని ప్రాంతాల్లో.. ముఖ్యంగా గ్రామీణ ప్రాంతాల్లో పెద్ద వయస్సులో ఉన్న తల్లిదండ్రుల దీర్ఘాయువును కోరుతూ ఇలాంటి ఆచారాలు నిర్వహిస్తుంటారు. ఈ ఘటనలో కుమారుడు తన తల్లికి 70 ఏళ్లు నిండటంతో.. ఆమె సుదీర్ఘకాలం జీవించాలని ఆకాంక్షిస్తూ ఈ ప్రత్యేక పూజా కార్యక్రమాన్ని ఏర్పాటు చేశాడు. ముందుగా కొనుగోలు చేసిన కాఫిన్‌ను సంప్రదాయబద్ధంగా అలంకరించారు. ఆ తర్వాత తల్లిని ఆ కాఫిన్ లోపల కూర్చోబెట్టి.. నలుగురు వ్యక్తులు దానిని మోసుకుంటూ ఊరేగింపుగా ఇంటికి తీసుకువచ్చారు. ఇంట్లోకి ప్రవేశించిన తర్వాత కుటుంబ సభ్యులు ఆమె ఆయుష్షు పెరుగుతుందని నమ్ముతూ పూజలు నిర్వహించారు.

చైనా సంస్కృతిలో వృద్ధులను గౌరవించడం, వారి ఆరోగ్యం, దీర్ఘాయువు కోసం ప్రత్యేక ఆచారాలు పాటించడం సర్వసాధారణం. ఈ కాఫిన్ ఆచారం కూడా అలాంటి నమ్మకాలలో భాగమే. ఇది మరణానికి సంకేతంగా కాకుండా జీవితాన్ని పెంపొందించే దురదృష్టాలను దూరం చేసే ఒక శుభప్రదమైన చర్యగా పరిగణించబడుతుంది. జీవితంలో ఒక ముఖ్యమైన మైలురాయిని చేరుకున్న వృద్ధులకు ఇలాంటి వేడుకలు నిర్వహిస్తే.. వారికి మరింత కాలం ఆయుష్షు పెరుగుతుందని, కుటుంబానికి అదృష్టం వస్తుందని అక్కడి ప్రజలు బలంగా నమ్ముతారు.

ఈ వింత ఆచారానికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. ఈ దృశ్యాలు అనేక మందిని ఆశ్చర్యానికి గురిచేయగా.. మరకొందరు వారి సాంప్రదాయాలను గౌరవించాలని అభిప్రాయం వ్యక్తం చేస్తున్నారు. చైనాలో వేర్వేరు ప్రాంతాల్లో వేర్వేరు ఆచారాలు, నమ్మకాలు ఉన్నాయని వాటిలో ఇదొకటి చెబుతున్నారు. కాస్త విచిత్రమైనదే అయినప్పటికీ... అక్కడి ప్రజలకు ఇది దీర్ఘాయువును, అదృష్టాన్ని తెస్తుందనే విశ్వాసం ఉందని స్థానిక మీడియా విశ్లేషిస్తోంది.