ఇంగ్లాండ్ 192 ఆలౌట్.. లార్డ్స్ టెస్ట్‌లో భారత్ లక్ష్యంగా 193

లార్డ్స్‌ టెస్టు రెండో ఇన్నింగ్స్‌లో ఇంగ్లాండ్‌ను 192 పరుగులకు భారత్ ఆలౌట్ చేసింది. ఓవర్‌నైట్ స్కోరు 2/0తో నాలుగో రోజు ఆట ప్రారంభించిన ఇంగ్లాండ్ బ్యాటర్లు.. భారత బౌలర్ల దెబ్బకు బెంబేలెత్తిపోయారు. పేసర్లు, స్పిన్నర్లు అనే తేడా లేకుండా టీమిండియా బౌలర్లు సమష్టి ప్రదర్శన చేశారు. దీంతో 200 పరుగుల లోపే ఆతిథ్య జట్టు 10 వికెట్లు కోల్పోయింది. టీమిండియా ముందు 193 పరుగుల లక్ష్యాన్ని నిలిపింది.

ఓవర్ నైట్ స్కోరు 2/0తో నాలుగో రోజు ఆట ప్రారంభించిన ఇంగ్లాండ్‌కు మహమ్మద్ సిరాజ్ షాక్ ఇచ్చాడు. స్వల్ప వ్యవధిలో రెండు వికెట్లు పడగొట్టాడు. ఆ తర్వాత నితీశ్ కుమార్ రెడ్డి, ఆకాశ్ దీప్‌ కూడా వికెట్ల వేటలో పాలు పంచుకున్నారు. దీంతో లంచ్ సమయానికి ఇంగ్లాండ్.. 98/4తో నిలిచింది. ఆ తర్వాత రెండో సెషన్ తొలి అర్ధభాగంగా ఇంగ్లాండ్ నిలకడగా ఆడింది. జో రూట్, బెన్ స్టోక్స్ వికెట్ల పతనాన్ని కాసేపు అడ్డుకున్నారు.

మరికాసేపట్లో రెండో సెషన్ ముగుస్తుందనగా.. వాషింగ్టన్ సుందర్‌ అద్భుతం చేశాడు. జో రూట్, జెమీ స్మిత్‌లను క్లీన్ బౌల్డ్ చేసి.. కీలక భాగస్వామ్యాన్ని తెరదించాడు. ఆ తర్వాత కెప్టెన్ బెన్ స్టోక్స్.. క్రీజులో పాతుకుపోయేందుకు ప్రయత్నించినా.. పరుగులు చేసేందుకు మాత్రం తీవ్రంగా ఇబ్బంది పడ్డాడు. అయితే వాషింగ్టన్ సుందర్ బౌలింగ్‌లో క్లీన్ బౌల్డ్ అయి.. ఏడో వికెట్ రూపంలో వెనుదిరిగాడు.

ఇంగ్లాండ్ రెండో ఇన్నింగ్స్‌లో ఏడు వికెట్లు కోల్పోయినా.. బుమ్రాకు అందులో ఒక్క వికెట్ కూడా దక్కలేదు. కానీ క్రిస్ వోక్స్, బ్రైడన్ కార్స్‌ను ఔట్ చేసిన బుమ్రా.. ఇంగ్లాండ్ టెయిలెండెర్ల పోరాటనికి తెరదించాడు. వాషింగ్టన్ సుందర్‌ బౌలింగ్‌లో షోయబ్ బషీర్ క్లీన్ బౌల్డ్ కావడంతో ఇంగ్లాండ్ ఇన్నింగ్స్‌కు తెరపడింది. 62.1 ఓవర్లలో ఆ జట్టు.. 192 పరుగులకు ఆలౌట్‌ అయింది.

తొలి ఇన్నింగ్స్‌లో ఇంగ్లాండ్, భారత్‌లు సరిగ్గా 387 పరుగులకు ఆలౌట్ అయ్యాయి. ఇంగ్లాండ్ రెండో ఇన్నింగ్స్‌లో 192 పరుగులు చేయగా.. భారత్ లక్ష్యంగా 193 పరుగులగా నిలిచింది. భారత బౌలర్లలో వాషింగ్టన్ సుందర్ అత్యధికంగా నాలుగు వికెట్లు తీశాడు. జస్‌ప్రీత్ బుమ్రా, మహమ్మద్ సిరాజ్‌ రెండేసి వికెట్లు పడగొట్టారు. నితీశ్ కుమార్ రెడ్డి, ఆకాశ్‌ దీప్‌లకు ఒక్కో వికెట్ దక్కింది.