సుందర్ మ్యాజిక్.. 6 వికెట్లు కోల్పోయిన ఇంగ్లాండ్‌

లార్డ్స్‌ టెస్టు నాలుగో రోజు ఆటలో టీమిండియా బౌలర్లు పట్టుబిగిస్తున్నారు. ఇంగ్లాండ్‌ బ్యాటర్లను రెండో ఇన్నింగ్స్‌లో కట్టడి చేస్తున్నారు. వికెట్ల పడగొడుతూ, పరుగులు కట్టడి చేస్తూ ఆతిథ్య జట్టుపై ఒత్తిడి పెంచుతున్నారు. మూడో రోజు ఆట రెండో సెషన్‌లో ఇంగ్లాండ్ 2 వికెట్లు కోల్పోయింది. క్రీజులో కుదురుకున్నట్లే కనిపించిన జో రూట్‌, వికెట్ కీపర్ జెమీ స్మిత్‌లను వాషింగ్టన్ సుందర్ ఔట్ చేశాడు.

హ్యారీ బ్రూక్ జట్టు స్కోరు 87 వద్ద నాలుగో వికెట్‌గా ఔట్ అయినప్పుడు క్రీజులోకి వచ్చిన బెన్ స్టోక్స్ ఆచీతూచీ ఆడుతున్నాడు. ఈ క్రమంలోనే సీనియర్ ప్లేయర్ జో రూట్‌ (40)తో కలిసి కీలక భాగస్వామ్యం నెలకొల్పాడు. వీరిద్దరూ ఐదో వికెట్‌కు 67 పరుగులు జోడించారు. ప్రమాదకరంగా మారుతున్న ఈ జోడీని వాషింగ్టన్ సుందర్ విడగొట్టాడు. పేసర్లకు వికెట్లు పడకపోవడంతో కెప్టెన్ గిల్.. రవీంద్ర జడేజా, వాషింగ్టన్ సుందర్‌తో ముప్పేట దాడి చేయించాడు.

ఈ క్రమంలోనే స్వీప్ షాట్ ఆడబోయి.. జో రూట్ (40).. వాషింగ్టన్ సుందర్ బౌలింగ్‌లో క్లీన్ బౌల్డ్ అయ్యాడు. దీంతో టీమిండియాకు సుందర్ బ్రేక్‌ త్రూ అందించాడు. కాసేపటికే జెమీ స్మిత్ (8)ను కూడా క్లీన్ బౌల్డ్ చేశాడు. దీంతో పది పరుగుల వ్యవధిలోనే భారత్‌కు రెండు వికెట్లు దక్కాయి. ఆ తర్వాత క్రీజులోకి వచ్చిన క్రిస్ వోక్స్ (23 బంతుల్లో 8 నాటౌట్‌)తో కలిసి.. స్టోక్స్ టీ బ్రేక్‌కు ముందు మరో వికెట్ పడకుండా జాగ్రత్త పడ్డాడు. ప్రస్తుతం ఇంగ్లాండ్ స్కోరు 175/6గా ఉంది. బెన్ స్టోక్స్ (83 బంతుల్లో 27 రన్స్ నాటౌట్‌) క్రీజులో ఉన్నారు.

కాగా బజ్ బాల్‌ ఆటను పక్కకు పెట్టి ఇంగ్లాండ్.. ఈ మ్యాచ్‌లో నిదానంగా బ్యాటింగ్ చేస్తోంది. నాలుగో రోజు ఆట తొలి సెషన్‌లో 24 ఓవర్ల పాటు బ్యాటింగ్ చేసిన ఆ జట్టు కేవలం 96 రన్స్ మాత్రమే స్కోరు చేసింది. నాలుగు వికెట్లు కోల్పోయింది. ఇక రెండో సెషన్‌లో మరింత దారుణంగా బ్యాటింగ్ చేసింది. 27 ఓవర్లలో 77 రన్స్ మాత్రమే స్కోరు చేసింది. రూట్, జెమీ స్మిత్ వికెట్లు కోల్పోయింది. తొలి ఇన్నింగ్స్‌లో ఇంగ్లాండ్, భారత్‌లు 387 పరుగులు చేసి ఆలౌట్ అయిన విషయం తెలిసిందే.