స్నేహితుల నుంచి ప్రేమికులుగా.. శుభాన్షు శుక్లా, కామ్నాల లవ్ స్టోరీ

భారతదేశం నుంచి అంతరిక్షంలోకి వెళ్లిన రెండో వ్యోమగామిగా రికార్డు సాధించిన శుభాన్షు శుక్లా మంగళవారం రోజే భూమి మీదకు వచ్చారు. క్షేమంగా ఆయన భూమి మీద ల్యాండ్ అయిన వెంటనే ఆయన్ను హూస్టన్‌లోని పునరావాస కేంద్రానికి తరలించారు. ఆపై వైద్య పరీక్షలు చేశారు. అప్పటికే అక్కడకి ఆయన కుటుంబ సభ్యులు రాగా.. భార్యా, కుమారుడిని హత్తుకుని శుభాన్షు శుక్లా తెగ సంబుర పడిపోయారు. ముఖ్యంగా తన భార్యను హత్తుకున్న ఫొటోను సోషల్ మీడియా వేదికగా షేర్ చేస్తూ.. కామ్నాపై తనకున్న ప్రేమను మరోసారి వెల్లడించారు. ఈ ఫొటో వైరల్ అయిన తర్వాతే వీరి ప్రేమ కథ వెలుగులోకి వచ్చింది. ముఖ్యంగా వీరిద్దరూ మూడో తరగతి నుంచే స్నేహితులు కాగా.. ఎలా ప్రేమికులుగా మారారు, పెళ్లి ఎప్పుడు చేసుకున్నారో మనం ఇప్పుడు తెలుసుకుందాం పదండి.

శుభాన్షు శుక్లా, కామ్నాలది ఉత్తర ప్రదేశ్‌లోని గోండా జిల్లా. వీరిద్దరూ మూడవ తరగతిలో చదువుతున్నప్పటి నుంచే మంచి స్నేహితులు. ఒకే ప్రాంతంలో ఉండడం, ఒకే బడిలో చదువుకోవడంతో.. ముందు నుంచే వీరికి ఒకరంటే ఒకరికి ఇష్టం ఏర్పడింది. పాఠశాల దశ నుంచి కళాశాల వరకు.. ప్రతి అడుగులోనూ వీరి స్నేహం కొనసాగింది. తరగతి గదుల్లో ఎప్పుడూ పక్క పక్కనే కూర్చునే వీరు.. జీవితంలోని ప్రతీ కష్ట సుఖాన్ని పంచుకునేవారు. ఒకరి కష్ట సమయంలో మరొకరు తోడుగా ఉంటూ.. జీవితాన్ని పూలబాటగా మలుచుకున్నారు. ఇలా మొదటి నుంచి వీరిద్దరి మధ్య బలమైన మానసిక బంధం ఏర్పడగా.. వారితో పాటే అది పెరుగుతూ వచ్చింది.

అయితే ఈ అపురూపమైన స్నేహ బంధమే కాలక్రమేణా పవిత్రమైన ప్రేమగా మారింది. మొదట్లో వారికి ఆ విషయం తెలియకపోయినప్పటికీ.. కాస్త ఆలస్యంగానే ఈ విషయం అర్థం అయింది. ముఖ్యంగా ఒకరిని వదిలి ఒకరు ఉండలేని స్థాయికి చేరుకోగా తమ మధ్య ఉన్నది స్నేహం కాదు ప్రేమ అని తెలిసింది. ఇక అప్పటి నుంచి వీరి బంధం మరింత గాఢంగా పెనవేసుకుపోగా.. ఒకరికొకరు మరింత అండగా నిలబడుతూ వచ్చారు. ముఖ్యంగా శుభాన్షు శుక్లాకు భారత వైమానిక దళంలో చేరాలనే తన కలను గురించి చెప్పగా.. కామ్నా అండగా నిలిచారు. అన్ని రకాలుగా సాయం చేస్తూ.. శుభాన్షు తన కలను నెరవేర్చుకునేలా చేశారు.

అలాగే కామ్నా కూడా తనకు ఎంతో ఇష్టమైన వైద్య వృత్తిని ఎంచుకుని డెంటిస్ట్‌ అయ్యారు. ఈ ప్రయాణంలో ఒకరికి ఒకరు తోడుగా ఉండగా ఉంటూ.. తమ కలలను నెరవేర్చుకున్నారు. లైఫ్‍లో బాగా సెటిల్ అయిన తర్వాతే తమ ప్రేమ గురించి ఇరుకుటుంబాల పెద్దలకు చెప్పారు. పిల్లల ప్రేమను అర్థం చేసుకున్న రెండు కుటుంబాలకు మంచి ముహూర్తం పెట్టించి మరీ వీరికి పెళ్లి చేశారు. ఇక అప్పటి నుంచి వీరు అన్యోన్యంగా ఉంటుండగా.. వీరి ప్రేమకు గుర్తుగా ఓ బాబు కూడా పుట్టాడు. తాజాగా శుభాన్షు శుక్లా అంతరిక్షానికి వెళ్లగా.. కామ్నానే కుటుంబ సభ్యులు అందరినీ చూసుకుంది. ప్రేమగా తన బాధ్యతలు నిర్వహిస్తూనే.. భర్త రాక కోసం ఎదురు చూసింది. ఆయన వచ్చిన వెంటనే.. కన్నీళ్లతో ఎదురెళ్లి ప్రేమగా హత్తుకుంది. ఇందుకు సంబంధించిన ఫొటోలు ప్రస్తుతం నెట్టింట వైరల్ అవుతున్నాయి.