ఇంగ్లండ్తో తొలి వన్డేలో భారత మహిళా జట్టు విజయం,,,,62 పరుగులతో మ్యాచ్ విన్నర్గా నిలిచిన దీప్తి శర్మ
sports | Suryaa Desk | Published : Thu, Jul 17, 2025, 09:47 PM
టీమిండియా స్పెషల్ బ్యాటర్ రిషబ్ పంత్ గురించి, అతని షాట్స్ గురించి ప్రత్యేకంగా చెప్పాల్సిన అవసరం లేదు. క్రీజులో కుదుటుగా ఉండకుండా ఎటు చిక్కితే అటు షాట్స్ బాదుతూ గ్రౌండ్లో ఎంటర్టైన్మెంట్ ఇస్తుంటాడు. ముఖ్యంగా రిషబ్ పంత్ ఒంటి చేతి షాట్కి భారీ ఫ్యాన్సే ఉన్నారు. సరిగ్గా రిషబ్ పంత్లాగే టీమిండియా మహిళా జట్టు ఆల్రౌండర్ కూడా అలానే సిక్స్ బాదింది.
ఇంగ్లండ్ వేదికగా టీమిండియా మహిళా జట్టు వన్డే సిరీస్ మొదలైంది. సౌతాంప్టన్ వేదికగా ఇంగ్లండ్పై నిన్న తొలి వన్డే మ్యాచ్ ఆడారు. ఆద్యంతం ఉత్కంఠగా సాగిన ఈ మ్యాచ్లో భారత మహిళా జట్టు విజయం సాధించింది. ఈ మ్యాచ్లో టీమిండియా ఆల్రౌండర్ దీప్తి శర్మ వన్ మ్యాన్ షోతో జట్టుకు విజయాన్ని అందించింది.
టాప్ ఆర్డర్ తక్కువ పరుగులకే పెవిలియన్ బాట పట్టినా.. ఆరో స్థానంలో వచ్చిన దీప్తి శర్మ నాటౌట్గా నిలిచి తన సత్తా చూపెట్టింది. టీమిండియా ఇన్నింగ్స్ 37వ ఓవర్లో దీప్తి శర్మ ఒంటి చేత్తో సిక్సర్ బాది అందర్నీ ఆశ్చర్య పరిచింది. అచ్చం రిషబ్ పంత్లాగే సిక్స్ బాదేసింది. తాను ఈ షాట్ ఆడటాన్ని రిషబ్ పంత్ నుంచే నేర్చుకున్నానని చెబుతోంది.
"నేను ప్రాక్టీస్లో ఎక్కువగా ఒంటి చేత్తో షాట్స్ని ఆడేదాన్ని. రిషబ్ పంత్ నుంచే ఈ షాట్స్ ఆడటం నేర్చుకున్నాను" అని ప్లేయర్ ఆఫ్ ది మ్యాచ్గా ఎంపికైన తర్వాత దీప్తి చెప్పింది. దీప్తి శర్మ జెమీమా రోడ్రిగ్స్తో కలిసి 86 బంతుల్లో 90 పరుగుల కీలక భాగస్వామ్యం నెలకొల్పి మ్యాచ్ విజయంలో కీలకంగా మారింది.
మ్యాచ్ విషయానికి వస్తే టాస్ గెలిచిన ఇంగ్లండ్ జట్టు బ్యాటింగ్ ఎంచుకుంది. సోఫియా, డేవిడ్సన్ రిచర్డ్స్ హాఫ్ సెంచరీలతో రాణించడంతో ఇంగ్లండ్ 50 ఓవర్లలో 6 వికెట్ల నష్టానికి 258 పరుగులు చేసింది. 259 పరుగుల లక్ష్యంతో బరిలోకి దిగిన భారత్ 124 పరుగులకే నాలుగు వికెట్లు కోల్పోయింది. జెమీమా రోడ్రిగ్స్, దీప్తి శర్మ కలిసి కీలక భాగస్వామ్యం నెలకొల్పారు.
హాఫ్ సెంచరీకి దగ్గరవుతున్న సమయంలో 48 పరుగుల వద్ద జెమీమా అవుటవ్వగా.. ఆ తర్వాత వచ్చిన రిచా ఘోష్ కూడా 10 పరుగులు చేసి పెవిలియన్ బాట పట్టింది. అమంజోత్ కౌర్తో కలిసి మరో వికెట్ పడకుండా దీప్తి శర్మ మరో పది బంతులు ఉన్నాయి అనగానే మ్యాచ్ని ముగించింది. 64 బంతులు ఆడిన దీప్తి శర్మ 3 ఫోర్లు, ఒక సిక్సర్తో 62 పరుగులు చేసింది. మూడు వన్డేల సిరీస్లో భారత్ లీడింగ్లో ఉంది.
|
|