షేర్ హోల్డర్లకు గుడ్‌న్యూస్.. విప్రోకు రూ.3336 కోట్ల లాభం

దేశీయ దిగ్గజ ఐటీ కంపెనీల్లో ఒకటైన విప్రో అదరగొట్టింది. ఈ ఆర్థిక సంవత్సరం 2025- 26 తొలి త్రైమాసికం (ఏప్రిల్- జూన్ మూడు నెలలు)లో కంపెనీ నికర లాభం ఇయర్ ఆన్ ఇయర్ ప్రాతిపదికన రూ. 3336 కోట్లుగా నమోదు చేసింది. గతేడాది ఇదే సమయంలో కంపెనీ నికర లాభం రూ. 3003 కోట్లతో పోలిస్తే ఈసారి 11 శాతం పెరిగింది. మార్కెట్ నిపుణుల అంచనాలను మంచి లాభాలు ప్రకటించిన క్రమంలో ఈ ప్రయోజనాన్ని షేర్ హోల్డర్లకు బదిలీ చేసేందుకు కంపెనీ నిర్ణయించింది. ఇందులో భాగంగా షేర్ హోల్డర్లకు శుభవార్త చెప్పింది. మధ్యంతర డివిడెండ్ ప్రకటించింది.

మధ్యంతర డివిడెండ్..

ఈ ఆర్థిక సంవత్సరం 2025- 26కు సంబంధించిన తొలి త్రైమాసిక ఫలితాల ప్రకటన సందర్భంగా తమ షేర్ హోల్డర్లకు బంపర్ ఆఫర్ ఇచ్చింది. మధ్యంతర డివిడెండ్ గా ఒక్కో షేరుకు రూ.5 చొప్పున చెల్లించేందుకు కంపెనీ బోర్డ్ ఆఫ్ డైరెక్టర్లు ఆమోదం తెలిపినట్లు వెల్లడించింది. ఆగస్టు 15, 2025 లోపు షేర్ హోల్డర్లకు ఈ మధ్యతర డివిడెండ్ చెల్లిస్తామని తెలిపింది.

 ఇక ఈ ఐటీ సేవల కంపెనీ ఆపరేషన్స్ రెవెన్యూ 0.7 శాతం వృద్ధితో రూ. 22,134 కోట్లుగా నమోదు చేసింది. అంతకు ముందు ఏడాది తొలి త్రైమాసికంలో కంపెనీ ఆదాయం రూ. 21,963 కోట్లుగా ఉంది. అయితే, గత ఆర్థిక సంవత్సరం 2024- 25 చివరి త్రైమాసికం (జనవరి- మార్చి) నికర లాభం రూ. 3570 కోట్లతో పోలిస్తే ఈసారి లాభం 7 శాతం మేర తగ్గిపోయింది. ఈ క్రమంలో ఈ ఏడాడి రెండో త్రైమాసికం అంచనాలు సైతం ప్రకటించింది విప్రో. క్యూ2లో కంపెనీ ఆదాయం 2560- 2612 మిలియన్ డాలర్లుగా ఉండవచ్చని అంచనా వేసింది.

ఈ సందర్భంగా కంపెనీ సీఈఓ, మేనేజింగ్ డైరెక్టర్ శ్రీని పిల్లాయ్ కీలక వ్యాఖ్యలు చేశారు. మాక్రో ఎకనామిక్ అనిశ్చితులు తొలి త్రైమాసికంపై ప్రభావం చూపినట్లు తెలిపారు. క్లయింట్లు ఖర్చు తగ్గించుకునేందుకు ప్రయత్నించినట్లు చెప్పారు. 'రెండు మెగా ఒప్పందాలు సహా 16 పెద్ద ఒప్పందాలు వచ్చాయి. గత త్రైమాసికం నుంచి వచ్చిన ఊపు, బలమైన పైప్‌లైన్ మద్దతుతో, మేము రెండవ అర్ధభాగానికి మంచి స్థితిలో ఉన్నాము. AI ఇకపై ప్రయోగాత్మకమైనది కాదు. ఇది మా క్లయింట్ల వ్యూహాలకు కేంద్రంగా ఉంది. మేము నిజమైన ప్రభావాన్ని అందిస్తున్నాము' అని పేర్కొన్నారు. వచ్చే త్రైమాసికంలో కంపెనీ ఆదాయాలు మరింత పెరగవచ్చని ఆశాభావం వ్యక్తం చేశారు.