ఫారెస్ట్ ఆఫీసర్ ఇంట్లో గుట్టలుగా నోట్ల కట్టలు, బంగారం

అక్రమ సంపాదనకు అలవాటుపడి ఓ అవినీతి అధికారి గుట్టురట్టయ్యింది. ఆయన ఇంట్లో గుట్టలు గుట్టలుగా నోట్ల కట్టలు బయటపడటంతో విజిలెన్స్ అధికారులు నోరెళ్లబెట్టారు. ఆ కరెన్సీని లెక్కించడానికి మెషీన్లు తీసుకొచ్చారు. ఒడిశాకు చెందిన ఫారెస్ట్ అధికారి రామచంద్ర నేపక్ ఇంట్లో విజిలెన్స్ అధికారులు సోదాల్లో రూ.1.44 కోట్ల నగదు, 16 బంగారు నాణేలు పట్టుబడ్డాయి ఇటీవల ఒడిశాలో నిత్యానంద నాయక్ అనే ఫారెస్టట్ అధికారికి సంబంధించిన 115 ప్లాట్ల వ్యవహారం మరువక ముందే ఇది వెలుగులోకి రావడం గమనార్హం. ఆదాయానికి మించిన ఆస్తులు కలిగి ఉన్నారన్న ఆరోపణల నేపథ్యంలో ఈ సోదాలు చేపట్టారు.

రామచంద్ర నేపక్ గతంలో జైపూర్ ఫారెస్ట్ రేంజ్ అధికారిగా పనిచేశారు. ఆయనపై వచ్చిన ఆరోపణల కారణంగా ఒడిశా, జైపూర్‌ సహా ఆరు ప్రాంతాల్లో విజిలెన్స్ అధికారులు ఏకకాలంలో దాడులు చేపట్టారు. ఈ క్రమంలో జైపూర్‌లోని ఆయన నివాసంలో పెద్ద మొత్తంలో డబ్బు కట్టలు బయటపడటంతో లెక్కించడానికి కరెన్సీ కౌంటింగ్ మెషీన్‌ను ప్రత్యేకంగా తెప్పించారు. అధికారులు తెలిపిన వివరాల ప్రకారం.. ఆయన ఇల్లు, పనిచేసిన కార్యాలయం, అత్తగారిల్లు, భువనేశ్వర్‌లోని సోదరుడి ఇంట్లో కూడా సోదాలు కొనసాగుతున్నాయి.

నాలుగు రోజుల కిందట నిత్యానంద నాయక్ అనే డివిజనల్ ఫారెస్ట్ ఆఫీసర్ ఇంట్లో విజిలెన్స్ అధికారులు సోదాలు నిర్వహించారు. ఆ సమయంలో 115 ప్లాట్లు అతడి పేరుతో ఉన్నట్లు తేలింది. నాయక్ పేరుతో 53 ప్లాట్లు, ఆయన భార్య పేరుపై 42, ఇద్దరు కుమారులకు 16, కుమార్తె పేరు మీద మరో నాలుగు ప్లాట్లు రిజిస్టర్‌ అయినట్లు గుర్తించారు.

ఒడిశాలో వరుసగా ఇలా అటవీ శాఖ అధికారుల ఇళ్లలో భారీగా నగదు, బంగారం బయటపడుతుండటంతో ప్రజలు ఆశ్చర్యం వ్యక్తం చేస్తున్నారు. ఒక అధికారి అవినీతి బాగోతం మరువకముందే మరొకరి అక్రమార్జన వెలుగులోకి రావడంతో ఇది చర్చనీయాంశంగా మారింది. విజిలెన్స్ అధికారులు ఈ కేసులను సీరియస్‌గా తీసుకుని దర్యాప్తు చేస్తున్నారు. ఈ సోదాల్లో ఇంకా ఏ విషయాలు బయటపడతాయో వేచి చూడాలి.