భూకంపం ఎఫెక్ట్.. 600 ఏళ్ల తర్వాత మేల్కొన్న అగ్నిపర్వతం!

నాలుగు రోజుల వ్యవధిలో రష్యాలో మరోసారి భారీ భూకంపం సంభవించింది. జులై 30న కమ్చట్కా దీవుల్లో రిక్టర్ స్కేల్‌పై 8.8 తీవ్రతతో శక్తివంతమైన భూకంపం సంభవించడంతో పసిఫిక్ తీరంలో సునామీ విరుచుకుపడిన సంగతి తెలిసిందే. ఆదివారం (ఆగస్టు 3న) కురిల్ దీవుల్లో రిక్టర్ స్కేల్‌పై 7.0 తీవ్రతతో భూకంపం వచ్చినట్టు జపాన్‌ వాతావరణ శాఖ, యూఎస్ జియోలాజికల్ ఏజెన్సీ వెల్లడించాయి. ఈ నేపథ్యంలో రష్యా అత్యవసర సేవల విభాగం పలు ప్రాంతాల్లో సునామీ హెచ్చరికలు జారీ చేసింది. భూకంపం ధాటికి పలు నగరాల్లోని భవనాలు ఊగిపోవడంతో ప్రజలు భయభ్రాంతులకు గురై ఇళ్ల నుంచి పరుగులు తీశారు.

ఇదిలా ఉండగా, కమ్చట్కా ద్వీపం సమీపంలో ఉన్న క్రషెనినికోవ్ అగ్నిపర్వతం విస్ఫోటనం చెందింది. దాదాపు 600 సంవత్సరాల తర్వాత అగ్నిపర్వతం బద్దలవడం ఇదే తొలిసారి. గత వారం వచ్చిన భారీ భూకంప కారణంగానే ఇది విస్ఫోటనం చెంది ఉండొచ్చుని రష్యా ప్రభుత్వ వార్తా సంస్థ ఆర్ఐఏ నోవోస్టి, శాస్త్రవేత్తలు అభిప్రాయపడ్డారు. ‘క్రషెనినికోవ్ అగ్నిపర్వతం చరిత్రలో ధ్రువీకరించిన మొదటి విస్ఫోటనం’ అని కమ్చట్కా అగ్నిపర్వత విస్ఫోటనాల అధ్యయన బృందం చీఫ్ ఒల్గా గిరినా తెలిపారు.

ఆమె వెల్లడించిన వివరాల ప్రకారం.. ఈ అగ్నిపర్వతం చివరిసారి క్రీ.శ. 1463కు 40 ఏళ్లు అటు ఇటుగా బద్దలైనట్టు రికార్డులు ఉన్నాయి. ఆ తర్వాత క్రషెనోనివిన్ పర్వతంలో ఎలాంటి విస్ఫోటనాలు నమోదు కాలేదు. గత బుధవారం (జులై 30న) రష్యా తూర్పు ప్రాంతాన్ని వణికించిన భారీ భూకంపం కారణంగా ఫ్రెంచ్ పోలినీషియా నుంచి దక్షిణ అమెరికాలోని చిలీ తీరం వరకు సునామీ హెచ్చరికలు జారీ అయ్యాయి. ఆ భూకంపం తర్వాత కమ్చట్కాలోనే అత్యంత క్రియాశీలక అగ్నిపర్వతం ‘క్లుచెవ్‌స్కాయ్’ సైతం విస్ఫోటనం చెందింది. ఈ క్రమంలో క్రషెనినికోవ్ అగ్నిపర్వతం తాజాగా బద్దలైనట్టు కనిపిస్తోంది.

రష్యా అత్యవసర సేవల ప్రకారం.. ‘‘అగ్నిపర్వతం విస్ఫోటనంతో 6,000 మీటర్ల (3.7 మైళ్లు) ఎత్తుకు బూడిద ఆకాశంలోకి ఎగసింది. ఇది తూర్పు దిశగా పసిఫిక్ మహాసముద్రం వైపు విస్తరిస్తోంది... ఈ మార్గంలో నివాస ప్రాంతాలేవీ లేవు’’ తెలిపింది. మరోవైపు, క్రషెనినికోవ్ అగ్ని పర్వతం విస్ఫోటనంతో విమానాయాన రంగానికి ఆరెంజ్ హెచ్చరికలు జారీ అయ్యాయి. ఈ విస్ఫోటనం ప్రకృతి వైపరిత్యాలు, భూకంపాలు, అగ్నిపర్వతాల విస్ఫోటనాలై శాస్త్రవేత్తలకు కీలక సమాచారం అందించే అవకాశం ఉంది. ఇక, ఆదివారం నాటి భూకంపం కారణంగా ప్రాణ, ఆస్తినష్టం గురించి ఇప్పటి వరకూ ఎటువంటి సమాచారం లేదు. దీనిపై అధికారులు ప్రకటన చేయలేదు.