ప్రధాని మోదీకే చేస్తా..: ట్రంప్‌నకు బ్రెజిల్ అధ్యక్షుడి ఘాటు సమాధానం

అగ్రరాజ్యం అమెరికా అధ్యక్షుడు డొనాల్డ్ ట్రంప్ బ్రెజిల్‌పై సుంకాలు విధిస్తానని హెచ్చరించిన విషయం అందరికీ తెలిసిందే. అయితే సమస్యల పరిష్కారం కోసం ఎప్పుడైనా మీరు నాక్ ఫోన్ చేయొచ్చంటూ ఆ దేశ అధ్యక్షుడికి ఆఫర్ కూడా ఇచ్చారు. అయితే దీనిపై బ్రెజిల్ అధ్యక్షుడు లులా డ సిల్వా ట్రంప్‌నకు గట్టిగా జవాబిచ్చారు. ట్రంప్ తనతో మాట్లాడటానికి ఇష్టపడటం లేదని, అందుకే నేను ఆయనకు ఫోన్ చేయనని లులా స్పష్టం చేశారు. అయితే ఆయన స్థానంలో తాను బ్రిక్స్ భాగస్వాములైన భారతదేశ ప్రధాని నరేంద్ర మోదీ, చైనా అధ్యక్షుడు షీ జిన్‌పింగ్‌లకు ఫోన్ చేసి.. వాణిజ్య సంబంధాలను బలోపేతం చేసుకుంటానని తేల్చి చెప్పారు.

అమెరికా బ్రెజిల్ నుంచి దిగుమతి చేసుకునే వస్తువులపై 50 శాతం సుంకాలు విధిస్తామని ట్రంప్ చేసిన హెచ్చరికతో ఈ వివాదం మొదలైంది. ట్రంప్ ఈ సమస్యపై లులాతో మాట్లాడటానికి ఆసక్తి చూపినప్పటికీ.. లులా మాత్రం ఆయన ఆఫర్‌ను తిరస్కరించారు. ఈ సందర్భంగా లులా డ సిల్వా మాట్లాడుతూ.. తాను ట్రంప్‌కు ఫోన్ చేయనుని అన్నారు. ఎందుకంటే ఆయన తనతో మాట్లాడటానికి ఇష్టపడటం లేదని వివరించారు. అందువల్లే తాను చైనా అధ్యక్షుడు షీ జిన్‌పింగ్‌కు, భారత ప్రధాని నరేంద్ర మోదీకి ఫోన్ చేసి విదేశీ వాణిజ్యాన్ని బలోపేతం చేసుకోవడానికి ప్రయత్నిస్తానని పేర్కొన్నారు. రష్యా అధ్యక్షుడు పుతిన్ ప్రస్తుత పరిస్థితుల్లో ప్రయాణించలేరు కాబట్టి ఆయనకు ఫోన్ చేయలేనని కూడా లులా చమత్కరించారు.

మరోవైపు తన మిత్రుడు అయిన బ్రెజిల్ మాజీ అధ్యక్షుడు జైరో బోల్సెనారోపై దర్యాప్తు చేపట్టడాన్ని ట్రంప్ తీవ్రంగా ఖండించారు. బ్రెజిల్‌పై అత్యధికంగా 50 శాతం పన్ను విధించారు. దీంతో వాషింగ్టన్-రియో డి జనేరియాల మధ్య సంబంధాలు దెబ్బతిన్నాయి. ఈ ఏడాది బ్రెజిల్‌లో కాప్30 సదస్సు జరగనుంది. విభేదాలను పక్కన పెట్టి ఈ కార్యక్రమానికి ట్రంప్‌ను ఆహ్వానిస్తానని కూడా డిసిల్వా చెప్పారు. కేవలం వాతావరణ మార్పులపై ఆయన అభిప్రాయం తెలుసుకోవడానికి ఇలా చేస్తానని వివరించారు. ఆయన రావాలని అనుకోకపోతే గైర్హాజరు అవుతారని వెల్లడించారు. అలాగే బ్రెజిల్ చర్చలకు సిద్ధంగా ఉన్నట్లు కూడా స్పష్టం చేశారు.

అమెరికా ఆధిపత్యాన్ని అంగీకరించడానికి బదులుగా.. బ్రెజిల్ లాటిన్ అమెరికా, బ్రిక్స్ దేశాలతో తమ సంబంధాలను బలోపేతం చేసుకోవడానికి సిద్ధంగా ఉందని లులా చేసిన వ్యాఖ్యలు వింటుంటేనే అర్థం అవుతోంది. ట్రంప్ లాంటి నాయకుల రక్షణవాద విధానాలకు వ్యతిరేకంగా.. బ్రెజిల్ ప్రపంచ వాణిజ్యాన్ని మరింత విస్తృతం చేయాలని చూస్తోంది. ముఖ్యంగా తన ప్రయోజనాలను కాపాడుకోవడానికి స్వతంత్రంగా నిర్ణయాలు తీసుకుంటుందని, బ్రిక్స్ వంటి ఇతర కూటములతో తన సంబంధాలను పటిష్టం చేసుకోవడానికి సిద్ధంగా ఉందని ప్రపంచానికి చాటి చెప్పారు.