మేడ్చల్ కాలేజీ గంజాయి కేసులో ట్విస్ట్

డ్రగ్స్‌‌పై యుద్ధం ప్రకటించిన తెలంగాణ ప్రభుత్వం.. ఉక్కుపాదం మోపుతున్నా కేటుగాళ్లు పోలీసుల కళ్లుగప్పి మత్తు పదార్థాలను ఎలాగోలా తీసుకొచ్చే ప్రయత్నాలు చేస్తున్నారు. ఈగిల్ టీమ్ మెరుపు దాడులతో హడలెత్తిస్తోంది. ఈ క్రమంలో ఇటీవల హైదరాబాద్ నగర శివారు మేడ్చల్ పరిధిలోని ఓ వైద్య కళాశాలలో వెలుగుచూసిన విద్యార్థులు గంజాయి సేవిస్తున్న వ్యవహారంలో కొత్త విషయాలు బయటపడ్డాయి. కాలేజీలోని సీనియర్ విద్యార్థులు కూడా గంజాయి విక్రయిస్తున్నట్టు నార్కోటిక్ బ్యూరో పోలీసులు విచారణలో వెల్లడయ్యింది. ఈ మేరకు హైదరాబాద్ యాంటీ నార్కోటిక్స్‌ బ్యూరో సర్కిల్ ఇన్‌స్పెక్టర్ వెంకటేశ్వర్లు మీడియాకు వివరాలు వెల్లడించారు. డ్రగ్స్‌పై ఈగల్‌ టీమ్ చేపట్టిన ఆపరేషన్‌లో మెడిసిటీ కాలేజీ స్టూడెంట్లు గంజాయి తీసుకున్నట్లు గుర్తించారు.

వారి నమూనాలను సేకరించి, ల్యాబ్‌లో పరీక్షలు నిర్వహించగా కొందరికి గంజాయి పాజిటివ్‌ వచ్చిందని అన్నారు. వీరిలో కొందర్ని డీ-అడిక్షన్‌ సెంటర్‌కు తరలించినట్టు తెలిపారు. ఈ కేసులో దర్యాప్తు కొనసాగిస్తోన్న ఈగిల్ టీమ్ అధికారులు మరిన్ని వాస్తవాలను వెలుగులోకి తెచ్చారు. మూడేళ్లుగా ఆ కాలేజీలో మెడిసిన్ చదువుతోన్న విద్యార్తులు... జూనియర్లకు గంజాయి అలవాటు చేసి, సరుకు వాళ్లే అమ్మినట్టు గుర్తించారు. స్టూడెంట్స్‌కు గంజాయి అమ్మిన బొల్లారానికి చెందిన హరాఫత్‌ అలీఖాన్‌ అనే పెడ్లర్‌ను అరెస్టు చేసినట్లు పేర్కొన్నారు. బీదర్‌కు చెందిన జరీనా బాను అనే మహిళ నుంచి నిందితుడు అలీఖాన్‌ గంజాయిని కొనుగోలు చేసి.. మెడికల్ స్టూడెంట్లకు అమ్ముతున్నట్లు పోలీసులు చెప్పారు.

గంజాయి విక్రయం ద్వారా ఏడాదిలోనే జరీనా బాను రూ.1.50 కోట్ల మేర సంపాదించిందని అన్నారు. ఆమె ఖాతాకు బదిలీ అయిన కోటిన్నరలో రూ.26 లక్షలు హైదరాబాద్‌కు చెందిన 51 మంది నుంచి బదిలీ అయ్యింది. మిగతా మొత్తం వివిధ ప్రదేశాలకు చెందిన దాదాపు 100 మంది ద్వారా అందినట్టు గుర్తించారు. వీరిలోనే మెడిసిటి మెడికల్ కాలేజీకి చెందిన 32 మంది విద్యార్థులు ఉన్నట్లు తెలిపారు. 24 మంది శాంపిల్స్ టెస్ట్ చేయగా.. ఇద్దరు అమ్మాయిలు సహా 9 మందికి పాజిటివ్ వచ్చింది. వీరంతా హాస్టల్‌లో ఉన్న స్టూడెంట్స్ కావడం గమనార్హం.