ఉగ్రవాదుల ఏరివేతకు ఆపరేషన్ అఖాల్.. జమ్మూ కాశ్మీర్‌ ఎన్‌కౌంటర్‌లో అమరులైన ఇద్దరు జవాన్లు

రాఖీ పండగ వేళ జమ్మూ కాశ్మీర్‌లో ఎన్‌కౌంటర్ జరిగింది. కుల్గాం ప్రాంతంలో జరిగిన ఎదురుకాల్పుల్లో ఇద్దరు జవాన్లు అమరులు అయ్యారు. శుక్రవారం అర్ధరాత్రి టెర్రరిస్ట్‌లు, భద్రతా బలగాల మధ్య కాల్పులు చోటు చేసుకున్నాయి. ఉగ్రవాదులను ఏరివేయడమే లక్ష్యంగా భద్రతా బలగాలు సైనిక ఆపరేషన్ చేపట్టగా.. ఈ ఘటన జరిగింది. అటవీ ప్రాంతంలో ఉగ్రవాదులు క్యాంపులు ఏర్పాటు చేసుకున్నట్లు భద్రతా బలగాలకు పక్కా సమాచారం అందడంతో రంగంలోకి దిగి.. అక్కడ ఆపరేషన్ ప్రారంభించారు. ఈ క్రమంలోనే భద్రతా బలగాలకు ఉగ్రవాదులు తారసపడ్డారు. ఈ నేపథ్యంలోనే భద్రతా బలగాలు, ఉగ్రవాదులకు ఎదురు కాల్పులు జరిగాయి. ఈ కాల్పుల్లో ఇద్దరు సైనికులు ప్రాణాలు కోల్పోయారు.

కుల్గాంలోని ఇక్కడి దట్టమైన అటవీ ప్రాంతంలో ముగ్గురు ఉగ్రవాదులు ఉన్నారని.. అక్కడ వారు రహస్యంగా స్థావరాలను ఏర్పాటు చేసుకుని.. నివసిస్తున్నట్లు సైన్యానికి పక్కా సమాచారం అందింది. దీంతో రంగంలోకి దిగిన భద్రతా దళాలు.. ఆ అటవీ ప్రాంతాన్ని మొత్తం చుట్టుముట్టి కాల్పులు చేశాయి. అటు ఉగ్రవాదులు కూడా ఎదురుకాల్పులకు దిగడంతో.. ఇద్దరు సైనికులు చనిపోగా.. మరో ఇద్దరు సైనికులు గాయాలపాలయ్యారు. లాన్స్‌నాయక్‌ ప్రీత్‌పాల్‌ సింగ్‌, సిపాయి హర్మిందర్‌సింగ్‌లు అమరులైనట్లు చినార్ కార్ప్స్ వెల్లడించింది. ఇక అటవీ ప్రాంతంలో దాగి ఉన్న ఉగ్రవాదుల కోసం ఇంకా ఆపరేషన్‌ కొనసాగుతున్నట్లు తెలిపింది.

ఇక.. ఉగ్రవాదులు దాగి ఉన్నారని వచ్చిన నిఘా సమాచారంతో ఈనెల 1వ తేదీన అఖల్‌ గ్రామ చుట్టుపక్కల.. ‘ఆపరేషన్‌ అఖాల్‌’ పేరుతో భద్రత బలగాలు ఒక సైనిక ఆపరేషన్‌ చేపట్టగా.. అది తొమ్మిదో రోజుకు చేరింది. ఇప్పటికే ఈ ఆపరేషన్‌లో భాగంగా పలువురు ఉగ్రవాదులను హతమార్చారు. ఈ ఆపరేషన్‌లో కొందరు సైనికులకు గాయాలయ్యాయి.

ఆపరేషన్‌ అఖాల్ సందర్భంగా.. తుపాకీ శబ్దాలకు స్థానిక మహిళలు, చిన్నారులు తీవ్ర భయాందోళనలకు గురవుతున్నారు. ఈ నేపథ్యంలోనే స్థానికులను సురక్షిత ప్రాంతాలకు తరలించే ఏర్పాట్లు భద్రతా బలగాలు చేస్తున్నారు. ఈ సంవత్సరం సుదీర్ఘ కాలంగా కొనసాగుతున్న యాంటీ టెర్రరిస్ట్ ఆపరేషన్‌ ఇదే అని భద్రతా దళాలు వెల్లడించారు.