సైనికుడి విగ్రహానికి రాఖీ కట్టిన మహిళ.. ఈ ఫొటో వెనక కన్నీరు పెట్టించే కథ

రాఖీ పండుగకు మన దేశంలో ఎంతో ప్రాముఖ్యతతో పాటుగా.. చారిత్రక నేపథ్యం కూడా ఉంది. తమ సోదరులు జీవితాంతం సుఖసంతోషాలతో వర్థిల్లాలని కోరుకుంటూ సోదరీమణలు వారికి రాఖీ కడితే.. అక్కాచెల్లెళ్లకు జీవితాంతం తోడుగా ఉంటామనే హామీ ఇస్తూ అన్నదమ్ములు రాఖీ కట్టించుకునే అపురూపమైన పండగే రాఖీ పౌర్ణమి. ప్రతి ఏటా శ్రావణ మాసంలో పుర్ణిమ రోజున సోదరులకు అక్కాచెల్లెళ్లు రాఖీ కడతారు. దూరాభారాలను లెక్క చేయకుండా వెళ్లి మీర రాఖీ కడతారు. విదేశాల్లో ఉంటే కొరియర్ ద్వారా రాఖీ పంపుతారు. ఏదో ఒకలా అయితే సోదరుడికి రాఖీ చేర్చి సంతోషపడతారు. ప్రతి సంవత్సరం మాదిరే ఈ ఏడాది కూడా తోబుట్టువులంతా ఒక్క చోట చేరి ఎంతో సంతోషంగా రాఖీ పండుగ జరుపుకుంటున్నారు. ఈక్రమంలో ప్రస్తుతం సోషల్ మీడియాలో వైరల్ అవుతోన్న ఓ ఫొటో ప్రతి ఒక్కరిని కంటతడి పెట్టుకునేలా చేస్తుంది. ఇంతకు ఆ ఫొటోలో ఏముందంటే..

దేశం కోసం ప్రాణాలర్పించి.. అమరుడైన ఓ సైనికుడి విగ్రహానికి అతడి సోదరి రాఖీ కట్టిన దృశ్యం ప్రతి ఒక్కరిని కదిలిస్తోంది. ఈ సైనికుడి వివరాల విషయానికి వస్తే.. రాజస్థాన్, జోధ్‌పూర్ నగర సమీపంలో ఖుడియాలా గ్రామానికి చెందిన గణపత్ రాం కద్వాస్ అనే యువ సైనికుడు.. జమ్మూకశ్మీరులో శత్రువులతో పోరాడుతూ.. ఎనిమిది సంవత్సరాల క్రితం అనగా 2017 సెప్టెంబరు 24వ తేదీన వీరమరణం పొందారు. అతడి త్యాగాన్ని నిత్యం స్మరించుకోవాలనే ఉద్దేశంతో గ్రామస్తులు కద్వాస్ విగ్రాహాన్ని ఏర్పాటు చేశారు. చేతిలో తుపాకీ పట్టుకుని గుండెల నిండా దైర్యం నింపుకుని.. చూడగానే నిజంగానే సైనికుడే అక్కడికి వచ్చి నిల్చున్నాడేమో అనేలా విగ్రహాన్ని రూపొందించారు.

రాఖీ పండుగ సందర్భంగా కద్వాస్ సోదరి.. సైనికుడి విగ్రహానికి రాఖీ కట్టింది. ఈ సందర్భంగా తీసినదే ఈ ఫొటో. అయితే ఇది మూడు సంవత్సరాల క్రితం నాటి ఫొటో. కానీ ప్రతి సంవత్సరం రాఖీ పండుగ నాడు ఎవరో ఒకరు ఈ ఫొటోను సోషల్ మీడియాలో షేర్ చేస్తూనే ఉంటారు. అలానే ఈసారి రాఖీ పండుగ సందర్భంగా ఈ ఫొటో మరోసారి సోషల్ మీడియాలో చక్కర్లు కొడుతుంది. అయితే కద్వాస్ సోదరి ప్రతి సారి రాఖీ పండుగ సందర్భంగా అన్న విగ్రహానికి రాఖీ కట్టడం మాత్రం మర్చిపోదని అంటున్నారు. ఈసారి రక్షాబంధన్ నాడు ప్రవీణ్ కుమార్ అనే ఐఎఫ్ఎస్ అధికారి అందరూ కొన్నే త్యాగం చేయగలరు.. కానీ కొందరు మాత్రం సర్వస్వం త్యాగం చేస్తారు అనే క్యాప్షన్‌తో షేర్ చేసిన ఫొటో మరోసారి వైరల్ అవుతోంది.