లోకార్నో ఫిల్మ్ ఫెస్టివల్‌లో సందడి చేసిన జాకీ చాన్

ప్రపంచవ్యాప్తంగా తన సాహసోపేతమైన స్టంట్లతో కోట్లాది మంది అభిమానులను సంపాదించుకున్న గ్లోబల్ యాక్షన్ స్టార్ జాకీ చాన్, తన గురించి ఓ షాకింగ్ నిజాన్ని బయటపెట్టారు. తెరపై ఎలాంటి భయం లేకుండా కనిపించే తాను, ప్రతి స్టంట్‌కు ముందు తీవ్రంగా భయపడతానని అంగీకరించారు. "నేనేమీ సూపర్‌మ్యాన్‌ను కాదు. నాకు భయం వేస్తుంది. ప్రతి స్టంట్ చేసే ముందు, ఈసారి నేను చనిపోతానా అనే ఆలోచన వస్తుంది" అంటూ ఆయన చేసిన వ్యాఖ్యలు అందరినీ ఆశ్చర్యపరిచాయి. స్విట్జర్లాండ్‌లో జరుగుతున్న ప్రతిష్ఠాత్మక లోకార్నో ఫిల్మ్ ఫెస్టివల్‌లో జరిగిన ఓ మాస్టర్‌క్లాస్‌లో ఆయన ఈ విషయాలను పంచుకున్నారు.ఈ కార్యక్రమంలో జాకీ చాన్ తన కెరీర్ ఆరంభం నుంచి ఇప్పటి వరకు ఎదుర్కొన్న అనేక అనుభవాలను ప్రేక్షకులతో పంచుకున్నారు. లెజెండరీ యాక్టర్ బ్రూస్ లీతో కలిసి పనిచేసిన రోజులను ఆయన గుర్తుచేసుకున్నారు. "బ్రూస్ లీ ఐకానిక్ ఫిల్మ్ 'ఎంటర్ ది డ్రాగన్'లో నేను ఒక చిన్న పాత్ర చేశాను. ఓ యాక్షన్ సీన్‌లో బ్రూస్ లీ పొరపాటున కర్రతో నా ముఖంపై కొట్టారు. అయినా సరే, నేను ఆ టేక్‌ను పూర్తి చేశాను" అని తెలిపారు. ఈ సందర్భంగా ఆ ఫైట్ సీన్‌ను ఆయన సరదాగా రీక్రియేట్ చేసి ప్రేక్షకులను అలరించారు.తన చిన్ననాటి విషయాలను చెబుతూ, "నాది చాలా పెద్ద కథ. నేను చాలా సోమరిపోతుని, అల్లరి పిల్లాడిని. చదువుకోవడం నాకు ఇష్టం ఉండేది కాదు. అందుకే మా నాన్న నన్ను మార్షల్ ఆర్ట్స్ స్కూల్‌లో చేర్పించారు. అక్కడ నాకు బాగా నచ్చింది. ఎందుకంటే టీచర్‌ను కాలితో తన్నొచ్చు, ఎవరినైనా కొట్టొచ్చు. నేనేం చేయాలనుకుంటే అది చేసే స్వేచ్ఛ ఉండేది" అని నవ్వుతూ చెప్పారు. మొదట్లో స్టంట్‌మ్యాన్‌గా కెరీర్ ప్రారంభించి, ఆ తర్వాత నటనలోకి అడుగుపెట్టినట్లు వివరించారు.ఈ సందర్భంగా తన తండ్రిని గుర్తుచేసుకుని జాకీ చాన్ భావోద్వేగానికి గురయ్యారు. "మా నాన్న నన్ను విడిచి దూరంగా ఉన్నప్పుడు, తన వాయిస్‌ను టేపుల్లో రికార్డ్ చేసి పంపేవారు. ఆ టేపులను ఇప్పుడు వింటే నాకు కచ్చితంగా ఏడుపొస్తుంది" అని అన్నారు. తాను ఫిల్మ్ మేకింగ్‌ను మొదటి నుంచి నేర్చుకోవాలనుకున్నానని, అందుకే సొంతంగా మేకప్ కూడా వేసుకునేవాడినని తెలిపారు. "నేటి తరం దర్శకులకు నేను చెప్పేది ఒక్కటే. కేవలం డైరెక్షన్ నేర్చుకుంటే సరిపోదు. సినిమాకు సంబంధించిన ప్రతీది నేర్చుకోవాలి" అని ఆయన సూచించారు.