ఉపముఖ్యమంత్రికి రెండు ఓటర్ ఐడీ కార్డులు..: తేజస్వీ యాదవ్

బీహార్ రాజకీయాల్లో మరోసారి వేడి రాజుకుంది. రాష్ట్ర ఉపముఖ్యమంత్రి విజయ్ కుమార్ సిన్హాకు రెండు ఓటరు గుర్తింపు కార్డులు ఉన్నాయని ప్రతిపక్ష నాయకుడు తేజస్వి యాదవ్ సంచలన ఆరోపణలు చేశారు. ఈ ఆరోపణలు బీహార్ రాజకీయ వర్గాల్లో తీవ్ర కలకలం సృష్టించాయి. ఎన్నికల ప్రక్రియలో ఇలాంటి అవకతవకలు ప్రజాస్వామ్యానికే ప్రమాదకరమని తేజస్వి యాదవ్ విమర్శించారు.

తేజస్వి యాదవ్ ప్రకారం.. బీహార్ ఉప ముఖ్యమంత్రి విజయ్ కుమార్ సిన్హాకు రెండు ఓటర్ ఐడీ కార్డులున్నాయని చెప్పారు. అందులో ఒక ఓటరు ఐడీ బాంకీపూర్ అసెంబ్లీ నియోజకవర్గానికి చెందినదని, అందులో ఆయన వయస్సు 60 సంవత్సరాలుగా నమోదై ఉందని పేర్కొన్నారు. మరో ఓటరు ఐడీ లఖీసరాయ్ అసెంబ్లీ నియోజకవర్గానికి సంబంధించినదని, అందులో ఆయన వయస్సు 57 సంవత్సరాలుగా ఉన్నట్లు వెల్లడించారు. ఒకే వ్యక్తికి రెండు వేర్వేరు ఓటరు ఐడీలు, రెండు వేర్వేరు వయస్సు వివరాలు ఉండటం చట్టవిరుద్ధం అని.. ఇది ఎన్నికల కమిషన్ నిబంధనల ఉల్లంఘనేనని తేజస్వి యాదవ్ అన్నారు. ఓటరు జాబితాల ప్రత్యేక సవరణ (స్పెషల్ ఇంటెన్సివ్ రివిజన్) ప్రక్రియలో ఇలాంటి అవకతవకలు జరుగుతున్నాయని ఆయన ఆరోపించారు.

తేజస్వి యాదవ్ ఆరోపణలకు ఉపముఖ్యమంత్రి విజయ్ కుమార్ సిన్హా గట్టిగా కౌంటర్ ఇచ్చారు. ఈ ఆరోపణలను ఆయన పూర్తిగా ఖండించారు. తన పేరు గతంలో బాంకీపూర్ నియోజకవర్గ ఓటరు జాబితాలో ఉండేదని.. అయితే తాను లఖీసరాయ్‌కు మారిన తర్వాత నిబంధనల ప్రకారం బాంకీపూర్ జాబితా నుంచి తన పేరును తొలగించాలని దరఖాస్తు చేసుకున్నట్లు ఆయన వివరించారు. తాను ఎలాంటి తప్పు చేయలేదని.. కేవలం ప్రక్రియలో ఉన్న ఆలస్యం కారణంగా ఇలా జరిగి ఉంటుందని ఆయన అన్నారు. దీనిపై తప్పుడు ఆరోపణలు చేస్తూ.. తన ప్రతిష్టను దిగజార్చే ప్రయత్నం చేస్తున్నారని, తేజస్వి యాదవ్ 'జంగల్ రాజ్ యువరాజు' అని తీవ్ర విమర్శలు చేశారు. ఈ ఆరోపణలు ఎన్నికల వ్యవస్థపై ప్రజల విశ్వాసాన్ని దెబ్బతీసే కుట్రలో భాగమని ఆయన పేర్కొన్నారు.

ఈ వ్యవహారంపై బీహార్‌లో రాజకీయ యుద్ధం తారాస్థాయికి చేరింది. ఒకవైపు ప్రతిపక్షం ప్రభుత్వంపై తీవ్ర ఆరోపణలు చేస్తుంటే.. మరోవైపు అధికార పక్షం వాటిని తిప్పికొడుతోంది. ఓటరు జాబితా సవరణ ప్రక్రియలో ఇటువంటి వివాదాలు తలెత్తడం, ప్రజాస్వామ్యానికి మంచిది కాదని రాజకీయ విశ్లేషకులు అభిప్రాయ పడుతున్నారు.