పుతిన్ చేసిన పనికి అమెరికా రాయబారి ఫ్యూజులు ఔట్

అమెరికా సహా పశ్చిమ దేశాధినేతలు, ప్రతినిధులకు రష్యా అధ్యక్షుడు వ్లాదిమిర్‌ పుతిన్‌ను కలిసేటప్పుడు లోపల ఏదో తెలియని ఆందోళన ఉంటుంది. ఎందుకంటే పుతిన్ తనదైన మైండ్‌గేమ్స్‌తో వారికి షాక్‌లు ఇస్తుంటారనే ప్రచారం ఉంది. ఓ సందర్భంలో జర్మనీ నేత వద్దకు తన పెంపుడు శునకాన్ని పంపి భయపెట్టిన క్రెమ్లిన్ అధినేత.. మరో సందర్భంలో ఫ్రాన్స్ నేతను దూరంగా కూర్చోబెట్టి మాట్లాడారు. ఈసారి ఆ ఆఫర్ అమెరికా అధ్యక్షుడు ట్రంప్‌ ప్రత్యేక దూత స్టీవ్‌ విట్కాఫ్‌కు దక్కింది. ఇటీవల రాయబారానికి వచ్చిన విట్కాఫ్‌కు పుతిన్‌ ఇచ్చిన కానుక చూసి మైండ్ బ్లాంక్ అయ్యింది.

ఉక్రెయిన్ శాంతి ఒప్పందం గురించి అధ్యక్షుడు డొనాల్డ్ ట్రంప్ సందేశం పుతిన్‌కు అందజేయడానికి రష్యా చేరుకున్న అమెరికా దూత స్టీవ్‌ విట్కాఫ్‌.. క్రెమ్లిన్‌ ప్యాలెస్‌కు వెళ్లారు. ఈ సమయంలో ‘ఆర్డర్‌ ఆఫ్‌ లెనిన్‌’ పతకాన్ని అమెరికా దూత చేతిలో పెట్టారు మాస్కో అధినేత. తన గిఫ్ట్‌గా సీఐఏ డిప్యూటీ డైరెక్టర్‌ జూలియన్‌ గల్లినాకు దానిని అందజేయాలని పుతిన్ సూచించారు. ఉక్రెయిన్‌తో యుద్ధంలో రష్యా తరఫున గల్లినా కుమారుడు మైఖెల్‌ గ్లోస్‌ (21) పోరాడి మరణించాడని.. అతడి సాహసానికి గుర్తుగా ఈ పతకం ఇస్తున్నట్లు వివరించారు. ప్రస్తుతం సీఐఏ డిజిటల్ ఇన్నోవేషన్ విభాగంలో జూలియన్‌ పనిచేస్తున్నారు.

కానీ, పుతిన్‌ అవార్డ్‌ ఇచ్చిన సందర్భం చూస్తే కచ్చితంగా ఇది ఆయన మైండ్‌గేమే అని నిపుణులు అంటున్నారు. అంతేకాదు, సీఐఏ ఉన్నతస్థాయి అధికారిణి కుమారుడే రష్యా తరఫున యుద్దం చేశాడనే అంశాన్ని లేవనెత్తడానికే పుతిన్ ఈ చర్యకు దిగినట్టు భావిస్తున్నారు. అయితే, విట్కాఫ్ ఈ అవార్డును స్వీకరించరా? లేదా అనేది మాత్రం స్పష్టంగా తెలియరాలేదు. దీనిపై వైట్‌హౌస్, సీఐఏ, విట్కాఫ్‌‌లు స్పందించలేదు. అటు, రష్యా నుంచి కూడా ఎటువంటి ప్రకటన రాలేదు. ఇది ఓ రకంగా అమెరికా అధ్యక్షుడు ట్రంప్‌కి పుతిన్ పంపిన సంకేతంగా భావిస్తున్నారు.

మరోవైపు, ఉక్రెయిన్‌‌తో యుద్ధంలో ప్రాణాలు కోల్పోయినట్టు భావిస్తోన్న గ్లోస్‌.. సామాజిక మాధ్యమాల్లో రష్యాకు మద్దతుగా పెట్టిన పోస్ట్‌లు.. మాస్కోలో దిగిన ఫోటోలు వైరల్ అయ్యాయి. 2024 ఏప్రిల్‌ 4న తూర్పు ఐరోపా ప్రాంతంలో మైఖేల్ మరణించినట్టు భావిస్తున్నారు. మృతదేహం అమెరికాకు చేరుకున్న అనంతరం ఓ ప్రకటన విడుదలు చేసిన సీఐఏ.. అతడి మరణం జాతీయ భద్రతకు సంబంధించింది కాదని తెలిపింది. గ్లోస్ అనేక మానసిక సంఘర్షణలను ఎదుర్కొన్నాడని.. తమ ఆఫీసర్ జూలియన్‌ ఫ్యామిలీలో తీవ్ర విషాదాన్ని నింపిందని అందులో వివరించింది. జూలియన్ భర్త లారీ గ్లోస్‌ మీడియాతో మాట్లాడుతూ.. తమ బిడ్డ రష్యా సైన్యంలో చేరి, ఉక్రెయిన్‌ యుద్ధంలో పాల్గొన్న విషయం తమకు తెలియదని అన్నారు. కాగా, గ్లోస్ కుటుంబ వివరాలు గురించి మాస్కోకు తెలియదని, అతడు 2023లో రష్యా దళాల్లో చేరడానికి విశ్వసనీయ వర్గాలు తెలిపాయి.