తుర్కియే వాయువ్య ప్రాంతంలో భారీ భూకంపం రిక్టర్ స్కేలుపై 6.1గా నమోదైన తీవ్రత

వాయువ్య తుర్కియేలో ఆదివారం సాయంత్రం భారీ భూకంపం సంభవించింది. ఈ ప్రకృతి విపత్తు కారణంగా ఒకరు మృతి చెందగా, మరో 29 మంది గాయపడ్డారు. భూకంప తీవ్రతకు 16 భవనాలు కుప్పకూలినట్లు తుర్కియే అంతర్గత వ్యవహారాల మంత్రి అలీ యెర్లికాయ వెల్లడించారు. దేశంలోని అతిపెద్ద నగరమైన ఇస్తాంబుల్‌తో సహా పలు ప్రావిన్సులలో భూప్రకంపనలు సంభవించడంతో ప్రజలు భయాందోళనలకు గురయ్యారు.తుర్కియే విపత్తు నిర్వహణ సంస్థ  సమాచారం ప్రకారం, ఆదివారం స్థానిక కాలమానం ప్రకారం రాత్రి 7:53 గంటలకు ఈ భూకంపం సంభవించింది. బలికేసిర్ ప్రావిన్స్‌లో భూమికి కేవలం 11 కిలోమీటర్ల లోతున భూకంప కేంద్రం ఉన్నట్లు గుర్తించారు. భూ ఉపరితలానికి అతి సమీపంలో భూకంపం రావడంతో నష్టం తీవ్రత ఎక్కువగా ఉందని అధికారులు తెలిపారు. జర్మన్ రీసెర్చ్ సెంటర్ ఫర్ జియోసైన్సెస్ దీని తీవ్రతను 6.19గా నమోదు చేసింది.ఈ ఘటనలో భవన శిథిలాల కింద చిక్కుకున్న 81 ఏళ్ల వృద్ధుడిని సహాయక బృందాలు కాపాడి ఆసుపత్రికి తరలించినా, చికిత్స పొందుతూ మరణించారని మంత్రి యెర్లికాయ ధ్రువీకరించారు. గాయపడిన వారిని ఆసుపత్రులకు తరలించి చికిత్స అందిస్తున్నారు. ప్రస్తుతం సహాయక చర్యలు పూర్తయ్యాయని, తీవ్రమైన ప్రాణ, ఆస్తి నష్టంపై మరే ఇతర సమాచారం లేదని ఆయన స్పష్టం చేశారు.భూకంపంపై తుర్కియే అధ్యక్షుడు రెసెప్ తయ్యిప్ ఎర్డోగాన్ స్పందించారు. మృతుల కుటుంబాలకు ప్రగాఢ సానుభూతి తెలిపారు. బాధితులను ఆదుకోవడానికి తక్షణ సహాయక చర్యలు చేపట్టినట్లు ఆయన పేర్కొన్నారు. తుర్కియే భౌగోళికంగా ప్రధాన భూకంప మండలంలో ఉండటంతో తరచుగా ఇలాంటి ఘటనలు చోటుచేసుకుంటున్నాయి. తాజా భూకంపం అనంతరం కూడా తేలికపాటి ప్రకంపనలు కొనసాగుతుండటంతో అధికారులు ప్రజలను అప్రమత్తం చేశారు.