భారత్ మెర్సిడెస్, పాకిస్థాన్ డంప్ ట్రక్..: అసిమ్ మునీర్ కామెంట్లు వైరల్

భారత్‌తో పాకిస్థాన్‌కు ఉన్న అంతరాన్ని స్వయంగా అంగీకరిస్తూ.. పాకిస్థాన్ ఆర్మీ చీఫ్ జనరల్ అసిమ్ మునీర్ చేసిన వ్యాఖ్యలు ప్రస్తుతం ప్రపంచవ్యాప్తంగా చర్చనీయాంశంగా మారాయి. అమెరికా పర్యటనలో ఉన్న ఆయన.. కార్లిస్‌లేలోని యూఎస్ ఆర్మీ వార్ కాలేజీలో ప్రసంగిస్తూ షాకింగ్ కామెంట్లు చేశారు. ముఖ్యంగా భారత దేశాన్ని మెర్సిడెస్ బెంజ్ కారుతో పోల్చగా.. తన దేశమైన పాకిస్థాన్‌ను ఒక డంప్ ట్రక్కుగా వర్ణించారు. ఈ అనూహ్యమైన పోలిక విశ్లేషకులను ఆశ్చర్యానికి గురిచేసింది.

భారత్ మెర్సిడెస్ బెంజ్, పాకిస్థాన్ డంప్ ట్రక్..

అసిమ్ మునీర్ ఉద్దేశం ప్రకారం.. భారత్ ఒక మర్సిడెస్‌లా వేగంగా, సమర్థవంతంగా, సున్నితంగా ప్రయాణిస్తుంది. అది ఆర్థికంగా, సైనికపరంగా పటిష్టంగా మరియు వ్యవస్థీకృతంగా అభివృద్ధి చెందుతోందని ఆయన పరోక్షంగా ఒప్పుకున్నారు. అయితే పాకిస్థాన్ ఒక డంప్ ట్రక్కులాగా పని చేస్తుందని, అది సున్నితంగా ఉండకపోవచ్చు కానీ కష్టమైన పనులను సమర్థవంతంగా పూర్తి చేస్తుందని ఆయన వివరించారు. ఇలాంటి ఓ ట్రక్కు వచ్చి మెర్సిడెస్‌ను ఢీకొంటే నష్టం ఎక్కువగా ఎవరికి జరుగుతుందో ఊహించుకోవాలని కూడా అసిమ్ మునీర్ వ్యాఖ్యానించారు.

పాకిస్థాన్ భవిష్యత్తు ఉజ్వలంగా మారబోతుంది.. ఎలాగంటే?

ఇక్కడితో ఆగకుండా అమెరికా, సౌదీ అరేబియా, యూఏఈ, చైనాలతో తమకు బలమైన భాగస్వామ్యాలు పెరుగుతున్నాయని వివరించారు. అలాగే తమ దేశ జనాభాలో శాతం మంది చురుకైన యువతతో పాకిస్థాన్ భవిష్యత్తు ఉజ్వలంగా మారబోతుందని పేర్కొన్నారు. అమెరికా గడ్డపై ఉండి అసిమ్ మునీర్ చేసిన ఈ కామెంట్లు ప్రస్తుతం సోషల్ మీడియాలో తెగ వైరల్ అయ్యాయి. ఇవి చూసిన ప్రతీ ఒక్కరూ ఒక్కో విధంగా కామెంట్లు చేస్తున్నారు. నిజంగానే మీ దేశం ఓ డంప్ ట్రక్కు అని.. అయితే మెర్సిడెస్‌ను ఢీకొనడానికి వచ్చేలోపే అది పూర్తిగా పాడైపోతుందని వివరిస్తున్నారు.

  మీ దేశ పరిస్థితి ఎంత దారుణమైన స్థితిలో ఉందో మీరే ఒప్పుకోవడం చాలా సంతోషం అని మరికొందరు నెటిజెన్లు వెల్లడిస్తున్నారు. ఈ వ్యాఖ్యలు చేయడానికి ముందే అసిమ్ మునీర్ భారత్‌కు అణుబాంబు బెదిరింపులు కూడా చేశారు. ముఖ్యంగా ఇండియా తమపై దాడి చేస్తే.. తమ వెంట ప్రపచంలోని సగ భాగాన్ని తీసుకెళ్తామని వివరించారు. తమ వద్ద అణుబాంబులు ఉన్నాయని వాటిని ప్రపంచ దేశాలపై వేయడానికి తాము ఏమాత్రం వెనుకాడబోమని చెప్పుకొచ్చారు. ఇవి కూడా నెట్టింట వైరల్ కాగా.. ఒక్కొక్కరూ ఒక్కో విధంగా స్పందిస్తున్నారు.