అక్రమంగా అమెరికా వెళ్లి ముగ్గురి ప్రాణాలు తీశాడు.. ఇండియన్ ట్రక్ డ్రైవర్ అరెస్ట్

అమెరికాలో గతవారం జరిగిన ఘోర రోడ్డు ప్రమాదం ఆలస్యంగా వెలుగులోకి వచ్చింది. ఫ్లోరిడా టర్న్‌పైక్ వద్ద పంజాబ్‌కు చెందిన ట్రక్ డ్రైవర్ హర్జిందర్ సింగ్ చేసిన ఒక చిన్న తప్పిదంతో ముగ్గురు అమాయకులు ప్రాణాలు కోల్పోయారు. ఈ ఘటనపై కేసు నమోదుచేసిన పోలీసులు దర్యాప్తు చేపట్టగా.. అతడి గురించి షాకింగ్ విషయాలు వెలుగులోకి వచ్చాయి. హర్జిందర్ సింగ్ అక్రమంగా అమెరికాలోకి ప్రవేశించినట్టు వెల్లడయ్యింది. దీంతో మూడు మరణాలకు కారకుడిగా, అలాగే అక్రమ వలసదారుడిగా అభియోగాలు నమోదయ్యాయి. మినీవ్యాన్, ఒక పెద్ద ట్రక్కు మధ్యలో ఢీకొట్టుకోగా.. దీనికి హర్జిందర్ సింగ్ చేసిన నిర్వాకమే కారణం.

తన ట్రక్కుతో అత్యంత నిర్లక్ష్యంగా అధికారికంగా ఉపయోగించాల్సిన ప్రదేశంలో అక్రమంగా యూ-టర్న్ తీసుకున్నాడు. ఈ మూర్ఖపు పనితో ట్రక్కు రోడ్డు మధ్యలో ఆగిపోయింది. అదే సమయంలో వేగంగా వస్తున్న ఒక మినీవ్యాన్ దాన్ని ఢీకొట్టడంతో ముగ్గురు అక్కడికక్కడే ప్రాణాలు కోల్పోయారు.

మృతులను ఫ్లోరిడా, మియామీ, పాంపానో బీచ్‌కు చెందినవారిగా గుర్తించారు. గత సోమవారం మధ్యాహ్నం 3 గంటల ప్రాంతంలో ట్రక్కు, మినీవ్యాన్ టర్న్‌పైక్‌పై ఉత్తరం వైపు వెళుతుండగా ఘటన జరిగినట్టు హైవే అధికారులు తెలిపారు. ఫ్లోరిడా హైవే పెట్రోల్ ప్రకారం.. సెమీ-ట్రక్, "అధికారికంగా ఉపయోగించాల్సిన టర్న్‌పైక్‌లోని ఒక విభాగంలోకి యూ-టర్న్‌కు ప్రయత్నించి బయటి లేన్‌లో ఉంది. ఈ సమయంలో అటుగా వస్తున్న మినీ వ్యాన్ దానిని ఢీకొట్టింది.

పోలీసులు ఈ ప్రమాదంపై దర్యాప్తు చేస్తుండగా, ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ అధికారుల సహాయంతో కొన్ని ముఖ్యమైన వివరాలు బయటపడ్డాయి. హర్జిందర్ సింగ్ 2018లో మెక్సికో సరిహద్దుల నుంచి అక్రమంగా అమెరికాలోకి వచ్చాడని తేలింది. అక్రమ వలసదారుడు అయినప్పటికీ అతడు కాలిఫోర్నియాలో కమర్షియల్ డ్రైవర్ లైసెన్స్ ఎలా పొందాడు అనేది ఇప్పుడు పెద్ద ప్రశ్నగా మారింది.

హర్జిందర్ సింగ్‌ను అరెస్ట్ చేసిన పోలీసులు.. అతడ్ని జైలుకు తరలించారు. అతడిపై 'వాహనంతో ఢీకొట్టి హత్య' కింద మూడు అభియోగాలు, అలాగే అక్రమ వలసదారుడిగా చట్ట ఉల్లంఘన అభియోగాలు నమోదయ్యాయి. ఈ కేసులో విచారణ ముగిసి, అతడు దోషిగా తేలితే, ఫ్లోరిడాలో శిక్ష అనుభవిస్తాడు. ఆ తర్వాత అతడ్ని అమెరికా నుంచి భారత్‌కు పంపించేందుకు అధికారులు సిద్ధమయ్యారు.