భారత అంతరిక్ష ప్రయాణంలో మరో అడుగు.. ‘ఇండియన్ స్పేస్ స్టేషన్’ నమూనా విడుదల!
national | Suryaa Desk | Published : Fri, Aug 22, 2025, 10:57 PM
అంతరిక్ష రంగంలో భారత్ దూకుడు పెంచుతోంది. 2035 నాటికి స్వంతంగా అంతరిక్ష కేంద్రాన్ని ఏర్పాటుచేయాలని భారత అంతరిక్ష పరిశోధనా సంస్థ (ISRO) గట్టి సంకల్పంతో ముందుకు సాగుతోంది.ఈ దిశగా కీలక అడుగు వేసిన ఇస్రో, తాజాగా 'భారతీయ అంతరిక్ష్ స్టేషన్ (BAS)' మోడల్ను విడుదల చేసింది. న్యూఢిల్లీలోని భారత్ మండపంలో శుక్రవారం ప్రారంభమైన నేషనల్ స్పేస్ డే సందర్భంగా ఈ నమూనాను ప్రదర్శించారు. ఈ వేడుకలు రెండు రోజులపాటు జరగనున్నాయి.ప్రస్తుతం ప్రపంచ వ్యాప్తంగా కేవలం రెండు స్పేస్ స్టేషన్లు మాత్రమే ఉన్నాయి — ఐదు దేశాలు కలిసి నిర్వహిస్తున్న ఇంటర్నేషనల్ స్పేస్ స్టేషన్ (ISS), మరియు చైనా స్వయంగా నిర్మించిన తియాంగాంగ్ స్పేస్ స్టేషన్. ఇప్పుడు భారత్ కూడా స్వంతంగా ఐదు మాడ్యూల్స్తో కూడిన అంతరిక్ష కేంద్రాన్ని నిర్మించేందుకు ప్రణాళికలు రూపొందించింది. మొదటి మాడ్యూల్ను 2028 నాటికి కక్ష్యలోకి పంపించాలనే లక్ష్యంతో ఇస్రో సిద్ధమవుతోంది.బాస్-1 మాడ్యూల్ దాదాపు 10 టన్నుల బరువు కలిగి ఉండనుందని అంచనా. దీన్ని భూమి నుండి సుమారు 450 కిలోమీటర్ల ఎత్తులో ప్రవేశపెట్టనున్నారు. ఇందులో దేశీయంగా అభివృద్ధి చేసిన పర్యావరణ నియంత్రణ మరియు జీవన సహాయక వ్యవస్థ (ECLSS), భారత్ డాకింగ్ సిస్టమ్, బెర్తింగ్ మెకానిజం, ఆటోమెటెడ్ హ్యాచ్ సిస్టమ్ వంటి అనేక ఆధునిక సదుపాయాలు అమర్చనున్నారు. అంతరిక్ష పరిశోధన, ఔషధ అభివృద్ధి, మరియు గ్రహాంతర అన్వేషణల కోసం ఈ మాడ్యూల్ ఉపయోగపడనుంది.
|
|