కేవలం 24 రూపాయలే.... వారందరికీ జియో మంచి ఛాన్స్!

ముకేశ్ అంబానీ నేతృత్వంలో ప్రారంభమైన జియో వ్యాపారాలు దూసుకెళ్తున్నాయి. కొత్త కొత్త రంగాల్లోకి ప్రవేశిస్తూ సంచలనాలు సృష్టిస్తున్నాయి. ఆర్థిక సేవల విభాగం జియోఫైనాన్స్ మరో సంచలనానికి తెరలేపింది. గతంలో ఎన్నడూ లేని విధంగా అతి తక్కువ ధరకే ఇన్‌కమ్ ట్యాక్స్ రిటర్న్స్ ఫైల్ చేసే అవకాశాన్ని కల్పిస్తోంది. కేవలం 24 రూపాయలతో ఐటీఆర్ ఫైలింగ్ సదుపాయాన్ని అందుబాటులోకి తెచ్చింది. వ్యక్తిగత పన్ను చెల్లింపుదారులకు ఇది అదిరే శుభవార్త అనే చెప్పాలి. జియో ఫైనాన్స్ యాప్ ద్వారా కొత్త ట్యాక్స్ ప్లానింగ్, ఫైలింగ్ ఫీచర్ తెచ్చింది. ట్యాక్స్ పేయర్లు ఈ యాప్ ద్వారా పన్ను విధానం ఎంచుకోవడంతో పాటుగా గరిష్ఠ మినహాయింపులు పొందేందుకు సహాయం చేయనున్నట్లు జియోఫైనాన్స్ పేర్కొంటోంది.

అయితే, ట్యాక్స్ పేయర్లలో ఒక ప్రశ్న మొదలైంది. రూ.24 ప్లాన్ అనేది ట్యాక్స్ పేయర్లందరికీ వర్తిస్తుందా? ఇతర ప్లాట్‌ఫామ్స్ అయిన క్లియర్ ట్యాక్స్, ట్యాక్స్ బడ్డీ, ట్యాక్స్ 2 విన్, మైఐటీ రిటర్న్స్ వంటి వాటితో ఎలా భిన్నంగా ఉంటుంది? అని ప్రశ్నిస్తున్నారు. జియోఫైనాన్స్ సంస్థ ట్యాక్స్ బడ్డీ భాగస్వామ్యంతో ఈ రూ.24 ప్లాన్ ప్రకటించింది. ప్రస్తుత ట్యాక్స్ మార్కెట్లో అత్యంత చీఫ్ ప్లాన్ అని చెప్పవచ్చు.

జియో ఫైనాన్స్ రూ.24 ప్లాన్ ఎవరికి వర్తిస్తుంది?

ఇది ఒక బేసిక్ ప్లాన్. రూ.24 ప్లాన్ అనేది కేవలం ఐటీఆర్-1 ఫైలింగ్ కి మాత్రమే వర్తిస్తుంది. అంటే కేవలం రూ.5 లక్షల లోపు ఆదాయం ఉండి ఒకే ఫారం 16 అందుకునే ఉద్యోగులకు మాత్రమే వర్తిస్తుంది. ఈ ప్లాన్ ద్వారా సీఏ సహాయం ఉండదు. ట్యాక్స్ పేయర్ స్వయంగా ఫైలి చేయాల్సి ఉంటుంది. నిల్ ఐటీఆర్ లేదా సింపుల్ ఐటీఆర్ 1 ఫైలింగ్ చేసేందుకు మాత్రమే వర్తిస్తుంది. అయితే ఇది బిజినెస్ ఆదాయం, క్యాపిటల్ గెయిన్స్, విదేశీ పెట్టుబడుల వంటి కాంప్లెక్స్ ట్యాక్సులు ఉన్న వారికి పని చేయదు. నిపుణుల సహాయం తీసుకోవాలని అనుకునే వారికి జియోఫైనాన్స్ రూ.999 ప్లాన్ అందిస్తోంది.

ఇతర ప్లాట్‌ఫామ్స్‌లో బేస్ ప్లాన్ల ధరలు ఇలా..

ట్యాక్స్2విన్ (Tax2Win)ప్లాట్ ఫామ్‌లో బేస్ ప్లాన్ రూ.49గా ఉంది. సీఏ సహాయంతో ఉండే ప్లాన్ ధరలు రూ.1274 నుంచి రూ.7968 వరకు ఉన్నాయి.

మైఐటీరిటర్న్ (Myitreturn) ప్లాట్ ఫామ్‌లో బేస్ ప్లాన్ రూ.199గా ఉండగా.. ఆల్ ఇన్‌కమ్ ప్లాన్ రూ.499గా ఉంది. సీఏ అసిస్టెడ్ ప్లాన్ రూ.1000 నుంచి రూ.6000 మధ్య ఉన్నాయి.

క్లియర్ ట్యాక్స్ (ClearTax) ప్లాట్‌ఫామ్‌లో బేసిక్ ప్లాన్ రూ.2540గా ఉంది. లక్స్ ప్లాన్ రూ.25 వేలుగా ఉంది.

ట్యాక్స్ బడ్డీ (TaxBuddy)లో సెల్ఫ్ ఫైలింగ్ బేస్ ప్లాన్ రూ.699గా ఉండగా కాంప్లెక్స్ ఐటీఆర్ ఫైలింగ్ రూ.2999గా ఉన్నాయి.