అమెరికా జైల్లో 47 రోజుల పాటు నరకయాతన అనుభవించిన ప్రవాస భారతీయుడు

ఓ చిన్నారిని కిందపడకుండా కాపాడబోయిన పాపానికి ఓ ప్రవాస భారతీయుడు ఏకంగా 47 రోజుల పాటు జైల్లో నరకం అనుభవించాల్సి వచ్చింది. చేయని నేరానికి తన జీవితం, పరువు నాశనమయ్యాయని ఆవేదన వ్యక్తం చేస్తూ, తనకు జరిగిన అన్యాయానికి పోలీసులు బహిరంగ క్షమాపణ చెప్పాలని ఆయన డిమాండ్ చేస్తున్నారు. అమెరికాలోని జార్జియాలో జరిగిన ఈ ఘటన ఆలస్యంగా వెలుగులోకి వచ్చింది. భారత సంతతికి చెందిన 62 ఏళ్ల మహేంద్ర పటేల్ మార్చి నెలలో ఓ వాల్‌మార్ట్‌కు వెళ్లారు. అక్కడ మొబిలిటీ స్కూటర్‌పై ఉన్న రెండేళ్ల బాలుడు పడిపోతుండటాన్ని గమనించి, వెంటనే అతడిని పట్టుకున్నారు. అయితే, బాలుడి తల్లి పొరబడి తన కొడుకును పటేల్ కిడ్నాప్ చేయబోయాడని ఆరోపించింది. దీంతో పోలీసులు ఆయనను అరెస్ట్ చేసి జైలుకు పంపారు.అయితే, వాల్‌మార్ట్‌లోని సీసీటీవీ ఫుటేజ్‌ను పరిశీలించగా అసలు నిజం బయటపడింది. స్కూటర్ వేగంగా తిరిగినప్పుడు బాలుడు పడిపోకుండా పటేల్ ఆపినట్లు అందులో స్పష్టంగా కనిపించింది. దీంతో ఈ నెలలో ఆయనపై ఉన్న కేసును అధికారులు కొట్టివేశారు. ఈ 47 రోజుల జైలు జీవితం తనను శారీరకంగా, మానసికంగా కృంగదీసిందని పటేల్ ఓ జాతీయ మీడియాకు ఇచ్చిన ఇంటర్వ్యూలో వాపోయారు."జైల్లో 17 పౌండ్ల బరువు తగ్గాను. నాకు మందులు కూడా సరిగా ఇవ్వలేదు. నేను శాకాహారిని కావడంతో కేవలం బ్రెడ్, పీనట్ బటర్, పాలతోనే గడిపాను. ఒక ఖైదీ అయితే, స్నానాల గదిలోకి తీసుకెళ్లి కొడితే ఏం చేస్తావని బెదిరించాడు. మరో ఖైదీ రక్షణ కల్పిస్తానని ఏకంగా అర మిలియన్ డాలర్లు డిమాండ్ చేశాడు. పిల్లలను ముక్కలుగా నరికి తినేవాడినని కొందరు ప్రచారం చేశారు" అని పటేల్ తన భయానక అనుభవాలను పంచుకున్నారు.జైలు బయట తన కుటుంబం కూడా సోషల్ మీడియాలో తీవ్ర దూషణలను ఎదుర్కొందని ఆయన తెలిపారు. తనను దేశం నుంచి బహిష్కరించాలని, నిలువునా తగలబెట్టాలని కొందరు పోస్టులు పెట్టారని గుర్తుచేసుకున్నారు. తనకు నష్టపరిహారం అవసరం లేదని, కేవలం పోలీసులు, డిస్ట్రిక్ట్ అటార్నీ తనకు బహిరంగ క్షమాపణ చెప్పాలని పటేల్ డిమాండ్ చేస్తున్నారు. భవిష్యత్తులో మరో నిర్దోషికి ఇలాంటి అన్యాయం జరగకుండా ఎలాంటి చర్యలు తీసుకుంటారో స్పష్టం చేయాలని ఆయన కోరారు.