పొరపాటున కూడా ఈ రైల్వే స్టేషన్ వద్ద బండి పార్క్ చేయకండి

కామారెడ్డి జిల్లా కేంద్రంలోని రైల్వే స్టేషన్ ఇప్పుడు ద్విచక్ర వాహన దొంగల అడ్డాగా మారింది. గత ఏడు నెలల్లో సుమారు 21 బైక్‌లు ఎత్తుకెళ్లబడ్డాయి. ముఖ్యంగా మూడో నంబర్ ప్లాట్‌ఫాం వద్ద పార్క్ చేసిన వాహనాలే లక్ష్యంగా మారుతున్నాయి. అధికారిక పార్కింగ్ ప్లేస్‌లో వాహనాలు పార్క్ చేస్తే అద్దె కట్టాలి కాబట్టి చాలామంది రూ.10 కోసం బయట ఉంచుతున్నారు. కానీ అదే వారిని తీవ్ర నష్టంలోకి నెడుతోంది. జూలై 18న స్థానికుడైన సయ్యద్ సాదిక్ తన కుమార్తెను ట్రైన్ ఎక్కించడానికి వచ్చి.. బైక్‌ను మూడో ప్లాట్‌ఫాంలో నిలిపి లోపలికి వెళ్లాడు. తిరిగి వచ్చే సరికి వాహనం కనిపించలేదు. రాజంపేటకు చెందిన అబ్దుల్ యూనస్ కూడా ఇలాంటి అనుభవాన్నే ఎదుర్కొన్నాడు. హైదరాబాదుకు వెళ్ళేందుకు వాహనాన్ని స్టేషన్ వద్ద వదిలి వెళ్లి.. మరుసటి రోజు రాగానే బైక్ మాయమైపోయింది.

పోలీసులకు పట్టుబడిన దొంగలు..

వరుస చోరీలతో పోలీసు విభాగం నిద్రలేచింది. పలు నిఘా చర్యలు, పెట్రోలింగ్, మఫ్టీ డ్యూటీలు చేపట్టగా ముగ్గురు దొంగలు పట్టుబడ్డారు. వారి వద్ద నుంచి తొమ్మిది వాహనాలను తిరిగి స్వాధీనం చేసుకున్నారు. అయినప్పటికీ ఇంకా మిగిలిన ముఠాలు బయట తిరుగుతున్నాయి. మూడో ప్లాట్‌ఫాంవైపు అభివృద్ధి పనులు కొనసాగుతుండటంతో అక్కడ సీసీ కెమెరాలు లేవు. ఇదే బలహీనతను దొంగలు సద్వినియోగం చేసుకుంటున్నారు. రైల్వే స్టేషన్‌లో మొత్తం 36 సీసీ కెమెరాలు మంజూరు అయినా.. మూడో ప్లాట్‌ఫాంలో వాటి ఏర్పాటుకు ఆరు నెలలకు పైగా సమయం పట్టే అవకాశం ఉందని అధికారులు చెబుతున్నారు.

  జిల్లా కేంద్రమైన స్టేషన్ మధ్యలో ఇంతటి దొంగతనాలు జరగడం ప్రజల్లో ఆందోళన కలిగిస్తోంది. ఈ ఘటనలు బైక్‌లకే కాకుండా మరిన్ని నేరాలకు మార్గం సుగమం చేస్తుందనే భయం వ్యక్తమవుతోంది. తాత్కాలికంగా అయినా సీసీ కెమెరాలు ఏర్పాటు చేయాలని.. స్టేషన్ వద్ద పార్కింగ్‌ను తప్పనిసరిగా వినియోగించాలని స్థానికులు డిమాండ్ చేస్తున్నారు. వాహనాలను ఎక్కడపడితే అక్కడ పార్క్ చేయకుండా కేటాయించిన ప్రదేశాల్లో నిలపాలని, అనుమానాస్పదంగా తిరుగుతున్న వారిని వెంటనే పోలీసులకు తెలియజేయాలని ఏఎస్పీ చైతన్యరెడ్డి విజ్ఞప్తి చేశారు.