జపాన్‌లో ప్రధాని మోదీకి ఘన స్వాగతం.. గాయత్రీ మంత్రం, భజనలతో ఆహ్వానం

విదేశీ పర్యటనకు వెళ్లిన ప్రధానమంత్రి నరేంద్ర మోదీ ప్రస్తుతం.. జపాన్‌లో పర్యటిస్తున్నారు. జపాన్ రాజధాని టోక్యోలోని హనేడా ఎయిర్‌పోర్టులో దిగిన ప్రధాని మోదీకి అపూర్వ స్వాగతం లభించింది. భారతీయ సంప్రదాయంలో చీరలు ధరించిన జపనీస్ మహిళలు.. రాజస్థానీ శైలిలో 'పధారో మహరే దేశ్' అంటూ ప్రధానికి స్వాగతం పలికారు. వేద మంత్రాలు, గాయత్రీ మంత్ర పఠనంతో ఆహ్వానం పలికారు. ఇక ప్రధానమంత్రి కోరిక మేరకు.. జపాన్ మహిళలు.. రాజస్థానీ భజనను కూడా ఆలపించడం విశేషం. ఇక వారి కట్టు, బొట్టు, భారతీయ సంప్రదాయం, వారి భజనలకు మంత్రముగ్ధుడు అయిపోయిన ప్రధాని మోదీ.. వారిపై అభినందనలు కురిపించారు.

ఈ సందర్భంగా.. జపాన్ కళాకారులు సాంప్రదాయ, సాంస్కృతిక కార్యక్రమాలను ప్రదర్శించగా.. వాటిని ప్రధాని మోదీ తిలకించారు. ఇక ప్రధాని రాక సందర్భంగా.. చాలా మంది ప్రవాస భారతీయులు.. హనేడా ఎయిర్‌పోర్టుకు పోటెత్తారు. త్రివర్ణ పతాకాలను ఊపుతూ.. నినాదాలు చేస్తూ తమ ఆనందాన్ని వ్యక్తం చేశారు. ఇక ప్రధానికి స్వాగతం పలికిన వారిలో భారతీయ సంస్కృతి ఉట్టిపడేలా తయారైన జపనీస్ మహిళల బృందం.. నరేంద్ర మోదీని దృష్టిని బాగా ఆకర్షించింది. అచ్చమైన భారతీయ సంప్రదాయాన్ని కన్నులకు కట్టేలా.. చీరలు ధరించిన జపనీస్ మహిళలు.. రాజస్థానీ శైలిలో 'పధారో మహరే దేశ్' (మా దేశానికి స్వాగతం) అంటూ నరేంద్ర మోదీకి స్వాగతం పలికారు.

ఈ సందర్భంగా ఆ మహిళలతో ప్రధాని మోదీ ఆప్యాయంగా ముచ్చటించారు. హిందీ భాషను ఎంత కాలం నుంచి నేర్చుకుంటున్నారని వారిని అడిగి తెలుసుకున్నారు. అందులో ఓ మహిళ.. తాను గత 8 ఏళ్లుగా హిందీని నేర్చుకుంటున్నానని.. దాంతోపాటు అలాగే రాజస్థానీ, గుజరాతీ భజనలు కూడా నేర్చుకుంటున్నట్లు తెలిపారు. ఈ సందర్భంగా.. ఆ మహిళలను ఒక పాట పాడాలని ప్రధాని మోదీ విజ్ఞప్తి చేశారు. ప్రధాని అడగడంతో వారు ఆనందంగా పాటను ఆలకించారు. ఫేమస్ రాజస్థానీ భజన అయిన 'మై వారి జావు రే' అంటూ పాట పాడి ప్రధాని మోదీతోపాటు అక్కడ ఉన్నవారందరినీ ఆశ్చర్యంలో ముంచెత్తారు.

భారతీయ సంస్కృతి, భాషల పట్ల జపనీస్ మహిళలకు ఉన్న ఇష్టం, మక్కువను మోదీ అభినందించారు. ఈ సందర్భంగా ప్రధానమంత్రి నరేంద్ర మోదీ ఇన్‌స్టాగ్రామ్‌లో ఒక పోస్ట్ చేశారు. జపాన్‌లో ప్రత్యేక స్వాగతం అంటూ ఆ వీడియోను పోస్ట్ చేశారు. ఇక జపాన్‌ పర్యటకు వెళ్లేముందు.. ప్రధాని మోదీ కీలక వ్యాఖ్యలు చేశారు. తన ఈ పర్యటన భారత్, జపాన్‌లను గత కొన్ని శతాబ్దాలుగా కలిపి ఉంచిన నాగరికత సంబంధాలను, సాంస్కృతిక బంధాలను మరింత బలోపేతం చేయడానికి ఒక సువర్ణ అవకాశమని అభివర్ణించారు.