నడిరోడ్డుపై 'గట్కా' ప్రదర్శన.. సిక్కు వ్యక్తిని కాల్చి చంపిన పోలీసులు

రోడ్డు మధ్యలో గట్కా (కత్తితో ప్రదర్శన) ప్రదర్శిస్తున్న భారత సంతతికి చెందిన సిక్కు యువకుడ్ని అమెరికా పోలీసులు కాల్చి చంపారు. లాస్ ఏంజెలెస్‌లో జరిగిన ఈ ఘటన చోటుచేసుకుంది. అతడ్ని 36 ఏళ్ల గురుప్రీత్ సింగ్‌గా గుర్తించారు. సీసీటీవీ ఫుటేజ్ విడుదల చేసిన లాస్ ఏంజెలెస్ పోలీస్ డిపార్ట్‌మెంట్ (ఎల్ఏపీడీ) సిక్కు సంప్రదాయ యుద్ధకళను రోడ్డుపై ప్రదర్శిస్తున్నట్టు పేర్కొన్నారు. గట్కా అనేది శారీరక శిక్షణతో పాటు మనసు, శరీరం, ఆత్మల సమన్వయం చేసుకోవడం. లాస్ ఏంజెలెస్ డౌన్‌టౌన్‌లోని క్రిప్టో.కామ్ అరీనా సమీపంలో ఒక కత్తి పట్టుకుని ఉన్నాడని పోలీసులు తెలిపారు. నచ్చచెబుతున్నా వినిపించుకోలేదు సరికదా పోలీసులపై దాడి చేయడానికి కూడా ప్రయత్నించడంతో అతడిపై కాల్పులు జరపాల్సి వచ్చిందన్నారు. సిక్కులు యుద్ద కళ నైపుణ్యం ప్రదర్శనకు వినియోగించే రెండు వైపుల పదును ఉన్న కత్తిగా తర్వాత గుర్తించారు.

జులై 13న ఈ ఘటన చోటుచేసుకుంది. రద్దీగా ఉండే ఫిగ్యురో వీధి, ఒలింపిక్ బౌలెవార్డ్‌ రోడ్డులో గురుప్రీత్ సింగ్ కత్తిసాము చేస్తూ భయభ్రాంతులకు గురిచేయడంతో అటుగా వెళ్లేవరు ఎమర్జెన్సీ నెంబరు 911కు కాల్ చేసి సమాచారం ఇచ్చారు. రోడ్డు మధ్యలో తన వాహనం నిలిపివేసి, కిందకు దిగిన సింగ్.. తన చేతిలో కత్తితో నాలుక కోసుకునేందుకు ప్రయత్నించాడని పోలీసులు తెలిపారు. చేతిలో ఆయుధాన్ని కిందపడేయాలని అధికారులు పలుసార్లు హెచ్చరించినా అతడు వినిపించుకోలేదని చెప్పారు. ఈ సమయంలో అతడ్ని వారించడానికి పోలీసులు ప్రయత్నించడంతో దాడి చేయబోయాడు. తనకు దగ్గరగా వస్తోన్న పోలీసులపై బాటిల్ విసిరి అక్కడ నుంచి పారిపోయే ప్రయత్నం చేశారు. అధికారులు అతడ్ని వెంబడించడంతో అదుపుతప్పి పోలీసు వాహనాన్ని ఢీకొట్టాడు, ఆ తర్వాత మరో వీధిలోకి వెళ్లి.. బ్లేడుతో కొందరి దాడి చేశాడు. దీంతో అతడిపై పోలీసులు కాల్పులు జరిపారని అధికారులు తెలిపారు.

ఆధారాల కోసం ఘటనా స్థలిలో రెండు అడుగుల పొడవైన కత్తిని స్వాధీనం చేసుకున్నామని పేర్కొన్నారు. బుల్లెట్ గాయాలతో ఉన్న అతడ్ని చికిత్స కోసం ఆసుపత్రికి తరలించామని, కానీ అప్పటికే అతడు మృతిచెందినట్టు వైద్యులు ధ్రువీకరించారు. ఈ ఘటనలో పోలీసులు, పౌరులకు ఎలాంటి గాయాలు కాలేదని చెప్పారు. కానీ, దీనిపై విచారణ కొనసాగుతోందని వివరించారు.