వైట్ హౌస్‌లో ఫైటింగ్ ఛాంపియన్‌షిప్

అమెరికా రాజధాని వైట్ హౌస్‌ ప్రాంగణంలో అల్టిమేట్ ఫైటింగ్ ఛాంపియన్‌షిప్ ( యూఎఫ్‌సీ ) పోరాటం జరగనుంది. ఈ విషయాన్ని యూఎఫ్‌సీ చీఫ్ ఎగ్జిక్యూటివ్ డానా వైట్ ధృవీకరించారు. అధికారికంగా ఖరారైన విషయాన్ని ఆయన గురువారం సోషల్ మీడియా ద్వారా వెల్లడించారు. అమెరికా స్వాతంత్య్ర 250వ వార్షికోత్సవంలో భాగంగా 2026లో ఈ పోటీని నిర్వహించాలనే ప్రతిపాదన జూలైలో వెలుగులోకి వచ్చింది. అప్పటి నుంచి ఈ ఆలోచన చుట్టూ పెద్ద చర్చే సాగింది. అధ్యక్షుడు డొనాల్డ్ ట్రంప్ కూడా ఈ కార్యక్రమానికి బహిరంగంగా మద్దతు తెలిపారు. ఇటీవల ఐవోవాలో జరిగిన సభలో ట్రంప్ స్వయంగా ప్రజలకు ఈ ప్రణాళికను వివరించారు.

“వైట్ హౌస్‌లోని మా సమావేశం అద్భుతంగా జరిగింది. దానికంటే బాగా జరగదని చెప్పొచ్చు. ఇది అద్భుతంగా ఉండబోతోంది. మరిన్ని వివరాలు రాబోయే రెండు వారాల్లో వెల్లడిస్తాను” అని డానా వైట్ పేర్కొన్నాడు.వైట్ హౌస్‌లో ప్రొఫెషనల్ క్రీడా పోరాటం ఎప్పుడూ జరగలేదు. చరిత్రలో జట్లు, క్రీడాకారులు అధ్యక్ష భవనాన్ని సందర్శించిన సందర్భాలు ఉన్నా..1865లో ఫిలడెల్ఫియా అథ్లెటిక్స్, వాషింగ్టన్ నేషనల్స్ జట్లు వైట్ హౌస్‌కి రావడం, లేదా 1962లో అధ్యక్షుడు జాన్ ఎఫ్.కెన్నెడీ మైదానంలో టచ్ ఫుట్‌బాల్ ఆడటం వంటి సందర్భాలే గుర్తుకు వస్తాయి.

ఇక ప్రొఫెషనల్ స్థాయి పోరాటం మాత్రం ఇదే మొదటిసారి. కాబట్టి ఈ యూఎఫ్‌సీ ఫైట్ అమెరికా రాజకీయ - క్రీడా చరిత్రలో ప్రత్యేకమైన మైలురాయిగా నిలిచే అవకాశం ఉంది. ఈ ప్రతిష్టాత్మక పోరాటంపై ఇప్పటికే పలువురు ఫైటర్లు ఆసక్తి వ్యక్తం చేశారు. మాజీ యూఎఫ్‌సీ ఛాంపియన్ కానర్ మెక్‌గ్రెగర్ తనను ఈ ఈవెంట్‌లో భాగం చేస్తే గౌరవంగా భావిస్తానని ‘ఎక్స్’ వేదికగా పేర్కొన్నాడు. 2021 నుంచి ఆయన రింగ్‌లోకి అడుగుపెట్టలేదు. 2024లో తిరిగి రావాల్సిన పోరాటం కూడా గాయంతో వాయిదా పడింది.

ఇక మాజీ హెవీ వెయిట్ ఛాంపియన్ జాన్ జోన్స్ కూడా తన రిటైర్మెంట్ తర్వాత కూడా శిక్షణ కొనసాగిస్తున్నానని, వైట్ హౌస్ పోరాటంలో పాల్గొనే అవకాశంపై ఆశావహంగా ఉన్నానని ఇటీవల తెలిపారు. జోన్స్ రిటైర్మెంట్ అనంతరం ఆయన బెల్ట్ టామ్ ఆస్పినాల్‌కు వెళ్లింది. ఆస్పినాల్ గతంలోనే జోన్స్‌తో తలపడాలనే కోరిక పలుమార్లు వెల్లడించారు.