భారత్‌పై సుంకాల ఎఫెక్ట్.. భారీగా పడిపోయిన ట్రంప్ ప్రజామోదం

రెండోసారి అమెరికా అధ్యక్షుడిగా బాధ్యతలు చేపట్టిన డొనాల్డ్ ట్రంప్ .. సంచలన నిర్ణయాలతో నిత్యం వార్తల్లో నిలుస్తున్నారు. ప్రపంచ దేశాలపై టారిఫ్‌లు విధిస్తూ.. గత కొంత కాలంగా అన్ని దేశాలకు కొరకరాని కొయ్యగా మారిపోతున్నారు. మేక్ అమెరికా గ్రేట్ అగైన్ అనే నినాదంతో.. కఠిన నిర్ణయాలు తీసుకుంటున్న ట్రంప్.. అమెరికన్లలో కూడా విశ్వాసం కోల్పోతుండటం సంచలనంగా మారింది. ట్రంప్ నిర్ణయాలు, పాలన, విధానాలతో అమెరికన్లు కూడా సంతృప్తిగా లేరని తెలుస్తోంది. తాజాగా నిర్వహించిన సర్వేలో షాకింగ్ ఫలితాలు వెల్లడయ్యాయి. డొనాల్డ్ ట్రంప్ ప్రజామోదం రేటింగ్.. అధికారంలోకి వచ్చినప్పటికీ, ఇప్పటికీ భారీగా పడిపోయినట్లు అర్థం అవుతోంది.

తాజాగా క్వినిపియాక్ యూనివర్సిటీ నిర్వహించిన పోల్ సర్వే ప్రకారం.. కేవలం 37 శాతం మంది అమెరికన్లు మాత్రమే డొనాల్డ్ ట్రంప్ పనితీరును ఆమోదించగా.. 55 శాతం మంది వ్యతిరేకించడం ఇప్పుడు తీవ్ర చర్చనీయాంశంగా మారింది. మరోవైపు.. ఆయన సొంత పార్టీ అయిన రిపబ్లికన్ పార్టీ ఓటర్లలో కూడా ప్రజాదరణ బాగా తగ్గినట్లు తేలింది. జూలై నెలలో రిపబ్లికన్ల ఆమోదం 90 శాతంగా ఉండగా.. అది ఆగస్ట్‌కు వచ్చేసరికి 84 శాతానికి పడిపోయిందని వెల్లడైంది. ఆగస్ట్ 21వ తేదీ నుంచి 25వ తేదీ మధ్య 1,220 మంది నమోదిత రిపబ్లికన్ ఓటర్లతో ఈ సర్వేను నిర్వహించారు.

డొనాల్డ్ ట్రంప్ ప్రజామోదం రేటింగ్.. అధికారంలోకి వచ్చిన 7 నెలల్లోనే 10 శాతం పడిపోయినట్లు ఈ సర్వేలో తేలింది. ఈ ఏడాది జనవరిలో అమెరికా అధ్యక్షుడిగా బాధ్యతలు చేపట్టేనాటికి.. ట్రంప్ ప్రజామోదం రేటింగ్ 47 శాతం ఉండగా.. ప్రస్తుతం అది 37 శాతానికి తగ్గినట్లు వెల్లడైంది. వాణిజ్య యుద్ధాలు.. మరీ ముఖ్యంగా భారత్‌పై భారీగా సుంకాలు విధించడం వంటి నిర్ణయాలే ట్రంప్ రేటింగ్ పతనానికి ప్రధాన కారణమనే అభిప్రాయాలు వ్యక్తం అవుతున్నాయి.

ట్రంప్‌కు 37 శాతం మాత్రమే ప్రజామోదం రేటింగ్ ఉండగా.. భారత ప్రధానమంత్రి నరేంద్ర మోదీకి మాత్రం ప్రజాదరణ ఇప్పటికీ 74 శాతానికి పైగానే ఉన్నట్లు వెల్లడైంది. మోర్నింగ్ కన్సల్ట్ సంస్థ చేసిన ఒక ఇంటర్నేషనల్ సర్వే ప్రకారం.. ప్రపంచంలోనే అత్యంత ప్రజాదరణ పొందిన నాయకుడిగా నరేంద్ర మోదీ కొనసాగుతున్నారు.

ట్రంప్ ప్రజాదరణ పడిపోవడానికి కారణాలు

ప్రధానంగా ట్రంప్ ప్రజాదరణ తగ్గడానికి కారణాల్లో ఒకటి.. టారిఫ్‌ యుద్ధం. ప్రపంచ దేశాలు, ముఖ్యంగా భారత్‌పై ట్రంప్ వేసిన అడ్డగోలు సుంకాల కారణంగానే ఆయనకు ప్రజల్లో విశ్వాసం పోయినట్లు అర్థం అవుతోంది. ఏకంగా భారత్‌పై 50 శాతం సుంకాలు విధించడం వంటి వాణిజ్య విధానాలు.. ట్రంప్ ప్రతిష్ఠకు భారీగా గండికొట్టినట్లు తెలుస్తోంది. అదే సమయంలో గవర్నర్ల అధికారాలు, హార్వర్డ్ వంటి ఐవీ లీగ్ యూనివర్సిటీలకు నిధుల నిర్వహణ వంటి అంతర్గత సమస్యలు కూడా ట్రంప్ రేటింగ్‌ను ప్రభావితం చేసినట్లు సమాచారం.