కూతురి పెళ్లికి బాలకృష్ణను పిలవడానికి వెళ్లిన మంత్రి నిమ్మల రామానాయుడు

టీడీపీ ఎమ్మెల్యే, సినీ నటుడు నందమూరి బాలకృష్ణ తత్వం, ఉత్సాహం గురించి ప్రత్యేకంగా చెప్పాల్సిన పని లేదు. మనసులో ఉన్నది ఉన్నట్లుగా చెప్పడం బాలయ్ నైజం. ఇక ఆయన మాటిచ్చారంటే జరిగి తీరుతుందంతే అని పలుసార్లు రుజువైంది కూడా. అయితే తాజాగా నందమూరి బాలకృష్ణ, ఏపీ జలవనరుల శాఖ మంత్రి నిమ్మల రామానాయుడు మధ్యన జరిగిన సంభాషణ సోషల్ మీడియాలో వైరల్ అవుతోంది. స్వయంగా మంత్రి నిమ్మల రామానాయుడు ఈ వీడియోను సోషల్ మీడియాలో పోస్టు చేయగా.. ప్రస్తుతం నెట్టింట చక్కర్లు కొడుతోంది. దీనికి సంబంధించిన వివరాల్లోకి వెళ్తే నిమ్మల రామానాయుడు కుమార్తె శ్రీజ వివాహం సెప్టెంబర్ 24వ తేదీ జరగనుంది. పాలకొల్లులో శ్రీజ వివాహం జరగనుంది. కుమార్తె వివాహాన్ని పురస్కరించుకుని బంధుమిత్రులు, సన్నిహితులను ఆహ్వానిస్తున్నారు నిమ్మల రామానాయుడు..

ఈ క్రమంలోనే హైదరాబాద్‌ ప్రసాద్ ల్యాబ్స్‌ వద్ద బాలకృష్ణను కలిశారు నిమ్మల రామానాయుడు. బాలయ్యను కలిసి శుభలేఖను అందించి పెళ్లికి ఆహ్వానించారు. ఈ సందర్భంగా వారి మధ్య ఆసక్తికర సంభాషణ జరిగింది. ఈ సందర్భంగా వివాహ తేదీ, వివరాలను తెలుసుకున్న బాలకృష్ణ.. తన మాటలతో నవ్వులు పూయించారు. ఈ సమయంలో దర్శకుడు బోయపాటి శ్రీను కూడా అక్కడే ఉన్నారు. ఈ సంభాషణ వీడియోను మంత్రి నిమ్మల రామానాయుడు సోషల్ మీడియాలో పోస్ట్ చేయగా.. ప్రస్తుతం వైరల్ అవుతోంది. ఈ సంభాషణ సారాంశం ఇదీ..

నందమూరి బాలకృష్ణ : పాప ఏం చదివింది?

నిమ్మల రామానాయుడు: బీటెక్ అండి.. వర్క్ ఫ్రమ్ హోం చేస్తోంది.

బాలయ్య: బాబు ఏం చేస్తున్నాడు?

నిమ్మల: బాబు ఇక్కడేనండి.

బాలయ్య: ఇక్కడేనంటే.. ఇక్కడేం పనిచేస్తాడని..

నిమ్మల: హైదరాబాద్‌లోనే నండి.. ఇన్ఫోసిస్‌లో పనిచేస్తాడు

బాలయ్య: ఊరేదండి..

నిమ్మల: ఊరు భీమవరం అండి..

బాలయ్య: మరది.. నేను హైదరాబాద్ అనుకున్నా, భీమవరమా..

బాలయ్య: పెళ్లెప్పుడు..

నిమ్మల: 24 అండి, సెప్టెంబర్

బాలకృష్ణ: ఎక్కడ?

నిమ్మల: పాలకొల్లు

బాలకృష్ణ: 24న సాంగ్ ఉంటుందా అండి.. (బోయపాటి శ్రీనుతో)

బోయపాటి శ్రీను: అయిపోతుందండి..

బాలకృష్ణ: మీరు ఇది నాలుగోసారా ఎమ్మెల్యే కావటం?

నిమ్మల రామానాయుడు: మూడు అండి..

బాలకృష్ణ: ఓ నేను కూడా మూడే, అయితే ఇద్దరూ ఒక్కటే

బాలకృష్ణ: వస్తాను.. ఎట్లా వస్తా, ఏంటనేది చెప్పను, వస్తా.. అంటూ బాలయ్య పెళ్లికి వస్తానని హామీ ఇచ్చారు. అలా సరదాగా సాగిన సంభాషణ వైరల్ అవుతోంది.