సెప్టెంబర్ 28న బీసీసీఐ కీలక సమావేశం – నిర్ణయాలపై దృష్టి
national | Suryaa Desk | Published : Sat, Sep 06, 2025, 09:53 PM
బీసీసీఐ (BCCI) వార్షిక సర్వసభ్య సమావేశం సెప్టెంబర్ 28న ముంబైలో జరగనుంది. ఈ సమావేశంలో ప్రధాన అజెండాగా బీసీసీఐ అధ్యక్షుడు, ఐపీఎల్ (IPL) ఛైర్మన్ సహా పలు కీలక పదవులపై ఎన్నికలు నిలవనున్నాయి.ఇటీవల టీమ్ఇండియా మాజీ క్రికెటర్ రోజర్ బిన్నీ బీసీసీఐ అధ్యక్ష పదవికి రాజీనామా చేయడంతో ఆ పదవి ఖాళీ అయింది. అలాగే, ఐపీఎల్ ఛైర్మన్ అరుణ్ ధుమల్ ఆరు సంవత్సరాల పదవీ కాలం పూర్తిచేసుకున్న కారణంగా కూల్ఆఫ్ పీరియడ్లోకి వెళ్లే అవకాశం ఉంది. అయితే, బీసీసీఐలో అన్ని పదవులకు ఎన్నికలు జరపాల్సి ఉన్నప్పటికీ, ఈసారి ఒక్క పదవికి మాత్రమే ఎన్నికలు జరగవచ్చని సమాచారం. మిగతా సభ్యులు ప్రస్తుత పదవుల్లో కొనసాగే అవకాశమే ఎక్కువగా ఉంది.దాదాపు మూడు సంవత్సరాలుగా బీసీసీఐలో సేవలందిస్తున్న దేవజిత్ సైకియా కార్యదర్శి పదవిలోనే కొనసాగనున్నారు. ఆయన రెండు సంవత్సరాల పాటు జాయింట్ సెక్రటరీగా, అనంతరం తొమ్మిది నెలల పాటు సెక్రటరీగా పని చేశారు. ఈ సంవత్సరం జనవరిలో ఏకగ్రీవంగా కార్యదర్శిగా ఎన్నికైన సైకియా, ప్రస్తుతం కూడా ఆ బాధ్యతలు నిర్వర్తిస్తున్నారు. అలాగే, మార్చిలో జాయింట్ సెక్రటరీగా ఎన్నికైన రోహన్ గౌన్స్ దేశాయ్, కోశాధికారిగా బాధ్యతలు చేపట్టిన ప్రభతేజ్ భాటియా కూడా తమ స్థానాల్లో కొనసాగనున్నారు.గత నెలలో రోజర్ బిన్నీ రాజీనామా చేసిన తర్వాత ఉపాధ్యక్షుడు రాజీవ్ శుక్లా తాత్కాలిక అధ్యక్షుడిగా బాధ్యతలు స్వీకరించారు. కొత్త అధ్యక్షుడి ఎన్నిక పూర్తయ్యే వరకు ఆయనే బీసీసీఐకి నాయకత్వం వహించనున్నారు.
|
|