విశాఖలో అగ్ని ప్రమాదం,,,పెట్రోల్ ఫిల్టర్ ట్యాంక్‌పై పడిన పిడుగు

విశాఖపట్నంలో అగ్ని ప్రమాదం చోటుచేసుకుంది. విశాఖలోని ఈస్ట్‌ఇండియా పెట్రోలియం కంపెనీలో ఈ ప్రమాదం సంభవించింది. పెట్రోల్‌ ఫిల్టర్‌ ట్యాంక్ మీద పిడుగు పడటంతో పెద్దఎత్తున మంటలు చెలరేగాయి. అగ్ని ప్రమాదం గురించి సమాచారం అందుకున్న వెంటనే అగ్నిమాపక సిబ్బంది.. హుటాహుటిన అక్కడకు చేరుకున్నారు. ఫైరింజన్ల సాయంతో తీవ్రంగా శ్రమించి మంటలను ఆర్పివేశారు. మరోవైపు ప్రమాద సమయంలో అక్కడ కార్మికులు లేనట్లు తెలిసింది. దీంతో పెను ప్రమాదం తప్పిందని భావిస్తున్నారు.

మరోవైపు అగ్ని ప్రమాద ఘటనపై ఏపీ హోం మంత్రి వంగలపూడి అనిత స్పందించారు. అగ్నిమాపక శాఖ అధికారులతో హోం మంత్రి వంగలపూడి అనిత మాట్లాడారు. ప్రమాదంపై వివరాలను అడిగి తెలుసుకున్నారు. ప్రస్తుతానికి మంటలు అదుపులోకి వచ్చాయన్న హోంమంత్రి అనిత.. ఎవరూ భయపడాల్సిన అవసరం లేదని అన్నారు. ఈ ఘటనపై ఉన్నతాధికారులు పర్యవేక్షిస్తున్నారని వివరించారు.

మరోవైపు విశాఖపట్నం జిల్లాలో మరో విషాదకర ఘటన జరిగింది. చేపల వేేటకు వెళ్లి చెప్పులు తీయడానికి ప్రయత్నించి ఇద్దరు యువకులు ప్రాణాలు పోగొట్టుకున్నారు. ఈత రాక నీటిలో మునిగి మృతి చెందారు. మేహాద్రి రిజర్వాయర్‌లో చేపలు పట్టేందుకు వెళ్లి ఇద్దరు యువకులు చనిపోయారు. చేపలవేటకు వెళ్లిన యువకులు ప్రమాదవశాత్తు నీటిలో పడిపోయారు. దీంతో ఊపిరాడక ప్రాణాలు కోల్పోయారు.

పెందుర్తి పోలీసులు చెప్తున్న వివరాల ప్రకారం.. జేఎన్ఎన్యూఆర్ఎం కాలనీకి చెందిన శేఖర్, సుజాతనగర్ ఆక్సిజన్ కాలనీకి చెందిన లక్ష్మణ్ కుమార్ ఆదివారం మధ్యాహ్నం చేపలు పట్టడం కోసం మేహాద్రి రిజర్వాయర్ వద్దకు వెళ్లారు. చేపలు పట్టే సమయంలో చెప్పులు నీటిలో పడిపోయాయి. దీంతో వాటిని తీయడానికి ప్రయత్నించిన శేఖర్, లక్ష్మణ్ నీటిలో పడిపోయారు. అయితే ఇద్దరకీ ఈత రాకపోవడంతో నీటిలో మునిగి ఊపిరాడక ప్రాణాలు కోల్పోయారు. పోలీసులు మృతదేహాలను రిజర్వా్యర్ నుంచి బయటికి తీశారు. పోస్టుమార్టం కోసం కేజీహెచ్‌కు తరలించారు. ఈ ఘటనపై కేసు నమోదు చేసి దర్యాప్తు ప్రారంభించారు. మరోవైపు యువకుల మృతితో వారి కుటుంబాల్లో విషాద ఛాయలు అలముుకున్నాయి.