హాకీ ఆసియాకప్ విజేత భారత్.. ఫైనల్‌లో దక్షిణ కొరియాను చిత్తు

హాకీ ఆసియాకప్ విజేత భారత్.. ఫైనల్‌లో దక్షిణ కొరియా చిత్తు.. హాకీ వరల్డ్ కప్‌కు నేరుగా క్వాలిఫై!(ఫోటోలు- Samayam Telugu)

క్రికెట్ ఆసియాకప్ 2025 కంటే ముందు జరిగిన హాకీ ఆసియాకప్‌లో భారత్ అదరగొట్టింది. ఈ టోర్నీలో ఒక్క ఓటమి కూడా లేకుండా ఫైనల్ చేరిన హర్మన్‌ప్రీత్ సింగ్ నేతృత్వంలోని భారత జట్టు.. ఫైనల్‌లో పటిష్ట దక్షిణ కొరియాను చిత్తు చేసింది. ఆరంభం నుంచి దూకుడుగా ఆడి 4-1తో ప్రత్యర్థిని మట్టికరిపించింది. దీంతో నాలుగోసారి హాకీ ఆసియాకప్ టైటిల్ సాధించింది. ఎనిమిదేళ్ల తర్వాత ఈ టోర్నీలో విజేతగా నిలిచింది. అంతేకాకుండా హాకీ ప్రపంచకప్‌కు నేరుగా అర్హత సాధించింది.

బిహార్‌లోని రాజ్‌గిర్ వేదికగా ఈ ఫైనల్ మ్యాచ్ జరిగింది. లీగ్ దశలో తిరుగులేని ఆధిక్యంతో ఫైనల్ చేరిన టీమిండియా.. ఫైనల్‌లోనూ అదే జోరు కొనసాగించింది. ఫైనల్‌ మ్యాచ్‌లో భారత్ తరఫున.. దిల్‌ప్రీత్‌ సింగ్‌ రెండు గోల్స్ సాధించాడు. సుఖ్‌జీత్‌, అమిత్ రోహిదాస్ చెరో గోల్ కొట్టారు. మొత్తంగా నిర్ణీత సమయంలో భారత్ నాలుగు గోల్స్ సాధించింది. దక్షిణ కొరియా కేవలం ఒక్క గోల్‌కే పరిమితమైంది. గోల్ చేయాలని దక్షిణ కొరియా ఆటగాళ్ల ఎత్తుల్ని భారత డిఫెండర్లు చిత్తు చేశారు. రెండు గోల్స్‌ కొట్టిన దిల్‌ప్రీత్ ప్లేయర్ ఆఫ్ ది మ్యాచ్‌గా నిలిచాడు.

 నిజానికి ఈ టోర్నీ ఆసాంతం భారత్ అదిరే ప్రదర్శన చేసింది. ముఖ్యంగా సూపర్‌ 4లో చైనాను 7-0తో చిత్తు చేసింది. ఇక భారత్‌ జట్టు హాకీ ఆసియాకప్‌ గెలవడం ఇది నాలుగోసారి కావడం గమనార్హం. ఇంతకుముందు 2003, 2007, 2017లో టీమిండియా విజేతగా నిలిచింది. 8 ఏళ్ల సుదీర్ఘ విరామం తర్వాత మళ్లీ టైటిల్‌ను తన ఖాతాలో వేసుకుంది. 2013 ఆసియా కప్ ఫైనల్‌లో భారత్‌ను 4-3 తేడాతో ఓడించి టైటిల్ గెలవకుండా అడ్డుకుంది దక్షిణ కొరియా. ఇప్పుడు 12 ఏళ్ల నిరీక్షణ తర్వాత, భారత జట్టు ప్రతీకారం తీర్చుకుంది. మరోవైపు ఈ విజయంతో భారత్.. 2026లో జరగనున్న ప్రపంచ హాకీ టోర్నీకి నేరుగా అర్హత సాధించింది. వచ్చేఏడాది ఆగస్టు 14 నుంచి 30 వరకు బెల్జియం, నెదర్లాండ్స్‌ వేదికగా ఈ మెగా ఈవెంట్ జరగనుంది.