దక్షిణాఫ్రికాతో మూడో వన్డేలో 414/5 స్కోరు నమోదు..ఇంగ్లాండ్ బ్యాటర్ల ఊచకోత

వన్డే ప్రపంచకప్‌ 2023 తర్వాత వన్డేల్లో పేలవ ప్రదర్శన చేస్తున్న ఇంగ్లాండ్ క్రికెట్ జట్టు జూలు విదిల్చింది. దక్షిణాఫ్రికాతో వన్డే సిరీస్‌ను ఇప్పటికే కోల్పోయిన ఆతిథ్య జట్టు.. నామమాత్రపు మూడో వన్డేలో మాత్రం విజృంభించింది. ఈ సిరీస్‌లోనే అత్యధిక స్కోరు నమోదు చేసింది. ఇద్దరు బ్యాటర్లు సెంచరీలు, మరో ఇద్దరు హాఫ్ సెంచరీలు చేయడంతో భారీ స్కోరు చేసింది. నిర్ణీత 50 ఓవర్లలో 5 వికెట్ల నష్టానికి 414 పరుగులు చేసింది.

ఈ మ్యాచ్‌లో టాస్ గెలిచిన దక్షిణాఫ్రికా.. తొలుత బౌలింగ్ ఎంచుకుంది. గత రెండు మ్యాచ్‌ల మాదిరిగానే ఇందులోనూ ఇంగ్లాండ్ బ్యాటర్లు కట్టడి చేయొచ్చని భావించిన ప్రొటీస్ కెప్టెన్ టెంబా బవూమా ఈ నిర్ణయం తీసుకున్నాడు. అయితే ఈ నిర్ణయం బెడిసికొట్టిందని అతడికి మ్యాచ్ ప్రారంభమయ్యాక అర్థమైంది. ఇంగ్లాండ్ ఓపెనర్లు జెమీ స్మిత్ (48 బంతుల్లో 62 రన్స్‌), బెన్ డకెట్ (33 బంతుల్లో 31 రన్స్)తో తొలి వికెట్‌కు 8.2 ఓవర్లలో 59 పరుగులు జోడించారు.

జో రూట్, బెథెల్ శతకాలు..

తొలి వికెట్ పడ్డాక క్రీజులోకి వచ్చిన జో రూట్.. అదరగొట్టాడు. తనదైన శైలిలో చెలరేగి.. సెంచరీ సాధించాడు. 96 బంతుల్లో 100 రన్స్‌ చేశాడు. నాలుగో స్థానంలో బ్యాటింగ్‌కు వచ్చిన జాకబ్ బెథెల్ సైతం బ్యాట్ ఝుళిపించాడు. అతడు కేవలం 82 బంతుల్లోనే 110 రన్స్ స్కోరు చేశాడు. చివర్లో జోస్ బట్లర్ (32 బంతుల్లో 62) సత్తాచాటడంతో ఇంగ్లాండ్ స్కోరు 400 పరుగుల మార్కును దాటింది. చివరకు ఇంగ్లాండ్ నిర్ణీత 50 ఓవర్లలో 5 వికెట్ల నష్టానికి 414 పరుగులు చేసింది.

దీంతో వన్డే క్రికెట్‌లో ఏడో సారి ఇంగ్లాండ్ 400 పైచిలుకు స్కోరు సాధించింది. ఇవన్నీ కూడా వన్డే ప్రపంచకప్ 2015 తర్వాతే నమోదు కావడం గమనార్హం. ఇక దక్షిణాఫ్రికా బౌలర్లలో కార్బిన్ బాష్ 2, కేశవ్ మహరాజ్ 2 వికెట్లు తీశారు. నండ్రే బర్గర్ 10 ఓవర్లు వేసి వికెట్ తీయకుండా 95 పరుగులు సమర్పించుకున్నాడు. కొడి యూసుఫ్ 80 రన్స్‌ ఇచ్చాడు.